Հուզական այրման համախտանիշ կամ սպառման սինդրոմ. գերհոգնածության պատճառներն ու դրա դեմ պայքարի միջոցները

Հուզական այրման համախտանիշը ներկայումս շատ տարածված խնդիր է: Բժիշկները կարծում են, որ դա այն գինն է, որը մարդիկ վճարում են տեղեկատվությամբ ու տեխնիկայով լեցուն քաղաքակիրթ աշխարհի համար:

Հուզական այրման համախտանիշի ախտանշաններն են հետաքրքրության ու ուրախության կորուստն ու մշտական հոգնածությունը: Նույնիսկ ամենապարզ աշխատանքը խլում է ուժերը: Հաճախ մարդիկ, ովքեր այս հիվանդության շեմին են կանգնած, փորձում են գտնել իրենց հարցերի պատասխանը համացանցում: Նրանք անընդհատ ստուգում են իրենց էլ.փոստը, ուսումնասիրում են ինքնաբուժության մասին կայքերն ու սոցցանցերի լրահոսը: Գիտնականների կարծիքով՝ գերհոգնածությունը պայմանավորված է լինում մշտական և ոչ ռացիոնալ ակտիվությամբ, որը հատկապես հատուկ է քաղաքաբնակներին, ովքեր ցանկության դեպքում կարող են ակտիվ լինել 24 ժամ շարունակ:

Հետաքրքիր է, որ հուզական այրման համախտանիշն ամենից շատ տարածված է բուժաշխատողների շրջանում: Բրիտանացի գիտնականների հետազոտությունների համաձայն՝ բժիշկների գրեթե 50%-ը բողոքում է մշտական հոգնածությունից: Գիտնականները եկել են այն եզրահանգման, որ մարդկանց գլխուղեղը դեռ չի հարմարվել այն տեղեկատվական պայմաններին, որոնք նրանք ստեղծել են իրենց համար և շարունակում են ստեղծել:

Հուզական այրման համախտանիշը տարբերվում է ընկճախտից (դեպրեսիա) նրանով, որ առաջինի դեպքում ոչ միշտ է տեղի ունենում ինքնաոչնչացում, որը դեպրեսիայի ախտանշաններից մեկն է: Հուզական այրման դեպքում սեփական անձի մասին կարծիքը մնում է նույնը, սակայն որևէ բան անելու ցանկություն ու ուժ այլևս չի լինում և մարդն արդեն գոյատևում է միայն իներցիայով: Հուզական այրման դեպքում զարյրույթը, որպես պաշտպանական ռեակցիա, երբեք ուղղված չի լինում սեփական անձի դեմ, սակայն ուղղված է լինում ուրիշների դեմ:

Գիտնականներն ընդգծում են, որ գիտությանը դեռևս հայտնի չէ, թե ինչու են մարդիկ միանգամից դառնում էներգիայով լեցուն ու եռանդուն, իսկ հաջորդ օրը ուժերը կարծես լքում են նրանց: Հայտնի չէ, թե արդյոք այդ վիճակը պայմանավորված է լինում արտաքին գործոնների ազդեցությամբ, թե «առաջանում» է մարդու օրգանիզմում: Սակայն պարզ է, որ զգացմունքներն ու համոզմունքները շատ մեծ ազդեցություն են ունենում մարդու ֆիզիոլոգիայի վրա:

Գիտնականների պնդմամբ՝ գերհոգնածությունից ազատվելու միջոցները խիստ անհատական են և մարդիկ պետք է ինքնուրույն հասկանան, թե ինչն է խլում իրենց ուժերը և ինչպես վերականգնել դրանց պաշարը: Գիտնականները խորհուրդ են տալիս գոնե աշխատանքային օրն ավարտել ժամանակին և չշարունակել մնալ հեռուստացույցի կամ գաջեթների առջև: Հարկավոր է, որ օրգանիզմը քնելուց առաջ գոնե մեկ ժամ հանգստանա: Բացի այդ, բժիշկները վստահ են, որ հարկավոր է պառկել քնելու մինչ ժամը 12-ը: Սակայն բուժման համար ամենակարևոր քայլը կլինի այն, որ հիվանդը սովորի ուրախանալ հասարակ բաներով և հանգստանալ:

Նյութի աղբյուրը՝ gogetnews.info