Հնարավոր է արդյո՞ք վարակվել սալմոնելոզով ձմերուկից

Սակմոնելոզը սուր աղիքային հիվանդություն է, բնորոշվում է օրգանիզմի ծանր թունավորումով։ Հիվանդության գաղտնի շրջանը տևում է մի քանի ժամից մինչև 6 օր։ Հիվանդի մոտ դիտվում են փսխումներ, ջերմության բարձրացում, կանաչալորձային ջրիկ կղանք, ցավեր որովայնի շրջանում։

Սալմոնելոզային վարակը կենդանուց մարդուն է փոխանցվում վարակված սննդամթերքի և ջրի միջոցով։
Նկարագրված են ձմերուկից սալմոնելոզով վարակման դեպքեր: 

Ձմերուկ կերած անձանց շրջանում սալմոնելոզի խոշոր բռնկումներ են արձանագրվել Մեծ Բրիտանիայում և Գերմանիայում՝ 2012թ., Ավստրալիայում՝ 2014թ., ԱՄՆ-ում՝ 2011թ. և այլն:

Ինչպե՞ս կարող է ձմերուկը սալմոնելոզային վարակի պատճառ հանդիսանալ.

1. Ձմերուկի մակերեսը կարող է աղտոտվել սալմոնելոզի հարուցիչներով, որոնք էլ ձմերուկը կտրելիս թափանցում են ներս,

2. Ձմերուկը ոչ պատշաճ հիգիենիկ պայմաններում պահելու դեպքում կամ ախտոտված ջրով լվանալիս, սալմոնելոզի հարուցիչները կարող են ձմերուկի ներսն անցել ցողունային հատվածից, հատկապես, երբ այնտեղ ամբողջականության խախտումներ կան:

Սալմոնելոզի հարուցիչը՝ սալմոնելաները (S. typhimurium, S. heidelberg, S. anatum, S. Derby) կայուն են արտաքին միջավայրում։ Սենյակային փոշում կենսունակ են 60 օր, չորացած արտաթորանքում՝ մինչև 4 տարի, -10°C պայմաններում՝ 4 ամիս։ 18-20°C ջերմության պայմաններում լավ զարգանում են տարբեր սննդամթերքում, մասնավորապես, կաթնամթերքում և մսամթերքում։ Ոչնչանում են 85°C ջերմության պայմաններում` 1 ժամվա ընթացքում։

Վարակի տարածման կանխարգելման նպատակով անհրաժեշտ է պահպանել անձնական հիգիենայի կանոնները, միրգը և բանջարեղենն օգտագործելուց առաջ խնամքով լվանալ հոսող ջրով, իսկ ջերմային մշակում պահանջող սննդամթերքներն օգտագործել միայն լավ եփելուց հետո:

ՈՒՇԱԴՐՈՒԹՅՈՒ՛Ն, ձմերուկ գնելիս հաճախ վաճառողները ձմերուկի հասած լինելը հաստատելու համար առաջարկում են կտրվածք անել, այնուհետև կեղտոտ դանակով կտրում են արդեն աղտոտված ձմերուկը և կեղտը դանակի հետ թափանցում է ներս, որտեղ մանրէների աճի և բազմացման համար առկա են բարենպաստ պայմաններ՝ սննդային միջավայր և բարձր ջերմաստիճան: Միևնույն ժամանակ ակնհայտ է, որ կտրված ձմերուկը դժվար կլինի մանրամասն լվանալ, հետևաբար տանը ձմերուկը կտրատելիս՝ այն կրկնակի աղտոտման է ենթարկվում:

Երբեք թույլ մի տվեք, որ վաճառողը կտրվածք անի ձմերուկի վրա:

Աղբյուր՝ Հիվանդությունների վերահսկման և կանխարգելման Ազգային Կենտրոն