7000 հետազոտության արդյունքում ապացուցվել է, որ քրքումն ամենաօգտակար համեմունքներից մեկն է. քրքումի օգտագործման 7 եղանակ

Քրքումն ամենահայտնի համեմունքներից մեկն է: Այն դարեր շարունակ օգտագործվել է իր հիանալի բուժիչ հատկությունների համար: Բժիշկ Ջոզեֆ Մերկոլի խոսքով այն հազարամյակներ շարունակ օգտագործվել է հնդկական ու չինական բժշկության մեջ՝ որպես ուժեղ հակաբորբոքային միջոց:

Քրքումի բաղադրության մեջ պարունակվող կուրկումինն օժտված է հակաբորբոքային ազդեցությամբ և ազդում է ինչպես դեղամիջոցները, սակայն, ի տարբերություն այդ դեղամիջոցների, չի առաջացնում կողմնակի բարդություններ, ինչպիսիք են խոցերը, ներքին արյունահոսությունը և այլն:

Ամբողջ աշխարհում անցկացված ավելի քան 7000 գիտական հետազոտություններն ապացուցել են, որ քրքումը շատ արդյունավետ է բազմաթիվ հիվանդությունների բուժման ու կանխարգելման համար, ինչպիսիք են դեպրեսիաները, էպիլեպսիան, Ալցհեյմերի հիվանդությունը և մի շարք նեյրոդեգեներատիվ խանգարումները:

Բացի այդ, այն բարենպաստ ազդեցություն է ունենում նաև մարդու նյարդային համակարգի վրա և նպաստում է ուշադրության կենտրոնացմանն ու մտավոր կարողությունների բարելավմանը:

Քրքումի պարբերաբար օգտագործումը շատ օգտակար է առողջության համար և ունի բազմաթիվ առավելություններ: Ձեր ուշադրությանն ենք ներկայացնում քրքումի օգտագործման 7 պարզ եղանակ:

1.    Քրքում և կեֆիր

Սա շատ համեղ ու հեշտ պատրաստվող ըմպելիք է: Անհրաժեշտ է պարզապես կեֆիրին ավելացնել մեկ թեյի գդալ քրքում:

2.    Քրքումով ու կիտրոնով հյութ

Բաղադրությունը.

·         ½ քրքումի արմատ կամ 1 թեյի գդալ քրքումի փոշի,

·         ծովի աղ,

·         ½ կիտրոն:

Պատրաստման եղանակը.

Քամել կիտրոնի հյութը, ավելացնել քրքումն ու ծովի աղը և լավ խառնել (կարելի է խառնել հարիչի օգնությամբ):

3.    Քրքումով արգանակ

Բաղադրությունը.

·         1 քրքումի արմատ (կտրատված),

·         4 բաժակ բուսական արգանակ:

Պատրաստման եղանակը.

Եռացնել արգանակն ու քրքումը 15 րոպե, այնուհետև ավելացնել սև պղպեղ:

4.    Քրքումով թեյ

Մանրացնել քրքումն ու ավելացնել թեյին: Բացի այդ, թեյը կարելի է պատրաստել հետևյալ կերպ.

Բաղադրությունը.

·         ½ թեյի գդալ թարմ քրքումի արմատի քերուկ,

·         մի պտղունց սև պղպեղ,

·         մեղր՝ ըստ ճաշակի,

·         1 բաժակ տաք ջուր:

Պատրաստման եղանակը.

Ջուրը եռացնել, ավելացնել քրքումը և եռացնել թույլ կրակի վրա ևս 5 րոպե: Քամել և ավելացնել մնացած բաղադրիչները:

5.    Ոսկե կաթ

Այս ըմպելիքը կարելի է շատ արագ պատրաստել՝ մի բաժակ տաք կոկոսահյութին մի թեյի գդալ քրքումի փոշի ավելացնելով: Այնուամենայնիվ ստորև բերված բաղադրատոմսով շատ ավելի համեղ ըմպելիք կստացվի:

Բաղադրությունը.

·         1 թեյի գդալ քրքումի փոշի,

·         2 թեյի գդալ մեղր,

·         ¼ թեյի գդալ կոճապղպեղի քերուկ,

·         1 բաժակ կոկոսյան ընկույզի կամ նուշի կաթ,

·         ¼ թեյի գդալ վանիլին,

·         մի պտղունց դարչին,

·         մի պտղունց մեխակ,

·         ¼ բաժակ ջուր,

·         մի պտղունց հիլ (кардамон)

Պատրաստման եղանակը.

Բոլոր բաղադրիչները լցնել կաթսայի մեջ և եռացնել մեկ րոպե:

6.    Քրքումով ու ձվով ուտեստներ

Առավոտյան նախաճաշին ձվածեղ կամ ձվով որևէ այլ ուտեստ պատրաստելիս՝ կարելի է ավելացնել նաև մի փոքր քրքում:

7.    Քրքումով կոկտեյլ

Կարելի է սիրելի կոկտեյլին պարզապես ավելացնել քրքում կամ պատրաստել հետևյալ բաղադրատոմսով.

Բաղադրությունը.

·         1 թեյի գդալ քրքումի փոշի կամ թարմ քրքում,

·         2 ճաշի գդալ կոկոսյան ընկույզի քերուկ,

·         1 թեյի գդալ խաշխաշի (мак) արմատ,

·         ½ բաժակ կոկոսյան ընկույզի կամ նուշի կաթ,

·         մի պտղունց սև պղպեղ,

·         1.5 բաժակ սառեցված արքայախնձոր կամ մանգո:

Պատրաստման եղանակը.

Խառնել բոլոր բաղադրիչները հարիչի օգնությամբ, մինչև դառնա համասեռ զանգված և վայելել կոկտեյլը:

Նյութի աղբյուրը՝ fitnutritionandhealth.com