Օգտակար տերևներ՝ թուրմեր պատրաստելու համար

11:45 • 24.09.16

Սև հաղարջի և վայրի ելակի հատապտուղների օգտակար հատկությունների մասին բոլորն էլ գիտեն, սակայն այն մասին, որ այդ հատապտուղների տերևները նույնպես օժտված են բազմաթիվ բուժիչ հատկություններով և երբեմն ավելի արդյունավետ են, քան պտուղները, շատերը չգիտեն:

Սև հաղարջ

Սև հաղարջի տերևներում պարունակվում է նույնքան շատ վիտամին C, որքան պտուղներում: Բացի այդ, տերևները պարունակում են նաև ֆիտոնցիդներ: Այս տերևների թուրմերն օգտագործվում են ավիտամինոզի բուժման, իմունիտետի բարձրացման համար, ինչպես նաև կոկորդի հիվանդությունների, նշիկաբորբի, բրոնխիտների, շնչառական օրգանների սուր վարակիչ հիվանդությունների դեպքում: Ժողովրդական բժշկության մեջ այս թուրմերն օգտագործում են նաև երիկամների և միզապարկի հիվանդությունների բուժման համար: Բացի այդ, մաշկային հիվանդությունների դեպքում սև հաղարջի տերևների թուրմը կարելի է ավելացնել նաև լոգանքի համար նախատեսված ջրին:

Թուրմը պատրաստելու համար հարկավոր է 3 ճաշի գդալ չոր տերևներին ավելացնել 1 լիտր եռման ջուր, տարրան ծածկել, թրմել 3-4 ժամ, այնուհետև քամել և խմել օրական 3-4 անգամ՝ կես բաժակ:

Վայրի ելակ

Ֆիտոթերապևտները խորհուրդ են տալիս օգտագործել վայրի ելակի չոր տերևների թուրմը որպես միզամուղ միջոց, որն արդյունավետ կերպով դուրս է բերում օրգանիզմից աղերը: Այն շատ օգտակար է հոդատապի, արթրիտի, միզաքարային հիվանդության ժամանակ: Այն նաև հիանալի ամոքիչ միջոց է վերքերի դեպքում և հարուստ է մի շարք վիտամիններով: Այս թուրմը խորհուրդ է տրվում օգտագործել անքնության, արյան մեջ խոլեստորինի բարձր մակարդակի, ստոմատիտների և նշիկաբորբի (ողողումների տեսքով) ժամանակ, ինչպես նաև արյունատար անոթների պատերի ամրապնդման համար:

Թուրմը պատրաստելու համար հարկավոր է 2 ճաշի գդալ հումքին ավելացնել 1 բաժակ եռման ջուր, 5 րոպե դնել տաք գոլորշու վրա, թրմել ևս 3 ժամ, քամել և ընդունել օրական 3 ամգամ՝ ուտելուց առաջ, մեկ ճաշի գդալ:

Հարկ է նշել, որ վայրի ելակը հակացուցված է ալերգիայի դեպքում:

Աղբյուրը՝ detskoe-menu.com