11 տարածված «միֆ» «գինեկոլոգիական» քաղցկեղի մասին

Քաղցկեղը համարվում է ամբողջ աշխարհում մահացության հիմնական պատճառներից մեկը: Յուրաքանչյուր տարի քաղցկեղից մահանում է գրեթե 10 միլիոն մարդ: Ընդ որում՝ Առողջապահության համաշխարհային կազմակերպության տվյալներով՝ տղամարդկանց ու կանանց մոտ քաղցկեղի առավել հաճախ հանդիպող տեսակները տարբեր են լինում:

Եթե տղամարդկանց մոտ ավելի հաճախ հանդիպողները թոքերի քաղցկեղն է, լյարդի քաղցկեղը և այլն, ապա կանանց մոտ՝ նրանք, որոնք հատուկ են միայն կանանց՝ կրծքագեղձերի քաղցկեղն ու «գինեկոլոգիական» քաղցկեղը:

Gogetnews.info կայքը, հղում անելով բրիտանական Аск Eve տեղեկատվական գործակալության ղեկավար, կանանց օնկոլոգիական խնդիրների մասնագետ Թրեյսի Մայլսին, ներկայացրել է, թե որոնք են ամենատարածված «միֆերը»՝ կապված կանանց օնկոլոգիական հիվանդությունների հետ:

1.      Կանանց մոտ կարող է լինել «գինեկոլոգիական» քաղցկեղի միայն 2 տեսակ՝ արգանդի վզիկի քաղցկեղ և ձվարանների քաղցկեղ

Քաղցկեղի գինեկոլոգիական տեսակները կարող են ախտահարել սեռական բոլոր օրգանները: Ամենից հաճախ հանդիպում է արգանդի վզիկի քաղցկեղը, սակայն երբեմն կարող է նաև հանդիպել արտաքին սեռական օրգանների քաղցկեղը, որը ոչ պակաս վտանգավոր է, կամ հեշտոցի, արգանդի, ինչպես նաև ձվարանների քաղցկեղը:

2.      «Գինեկոլոգիական» քաղցկեղն առաջանում է միայն տարեց կանանց մոտ

Քաղցկեղի բոլոր տեսակներն էլ կարող են հանդիպել տարեց կանանց մոտ, ինչը պայմանավորված է լինում օրգանիզմի «մաշվածությամբ», սակայն լինում են դեպքեր, երբ այս հիվանդությունն ախտահարում է նաև երիտասարդ կնոջը: Օրինակ՝ արգանդի վզիկի քաղցկեղն, իսկապես, ավելի հաճախ հանդիպում է տարեց կանանց մոտ, սակայն արտաքին սեռական օրգանների քաղցկեղի դեպքերն ավելի հաճախ նկատվում են երիտասարդների մոտ:

3.      Կանանց մոտ հանդիպող քաղցկեղը «լուռ մարդասպան» է՝ առանց որևէ ախտանշանների

Իրականում շատերը պարզապես չեն նկատում այդ նշանները, անտեսում են կամ վերագրում այլ հիվանդություններին:

4.      Արգանդի քաղցկեղը կարող է առաջանալ միայն դաշտանադադարից հետո

Արգանդի քաղցկեղի դեպքերի գրեթե ¾ հանդիպում է 40-74 տարեկան կանանց մոտ և հաճախ իրոք առաջանում է դաշտանադադարից հետո, սակայն լինում են դեպքեր, երբ ուռուցքն ավելի շուտ է առաջանում: Այս թվում են նաև քաղցկեղի այն դեպքերը, որոնք պայմանավորված են լինում ծննդաբերությամբ կամ գենետիկ հակվածությամբ:

5.      «Գինեկոլոգիական» քաղցկեղի առաջացումն ավելի շատ սպառնում է թեթևաբարո կանանց

Սա իրականությանը ընդհանրապես չի համապատասխանում: Կինը կարող է հիվանդանալ «գինեկելեգիական» քաղցկեղի ցանկացած տեսակով, նույնիսկ կույս լինելու դեպքում: Այս պնդումը պայմանավորված է այն փաստով, որ արգանդի վզիկի քաղցկեղի դեպքերի մեծ մասի պատճառ է հանդիսանում մարդու պապիլոմա վիրուսը, որը փոխանցվում է նաև սեռական ճանապարհով, ընդ որում՝ լիարժեք սեքսը պարտադիր չէ:

Բացի այդ, կան ռիսկի ավելի լուրջ գործոններ, ինչպիսիք են տարիքը, ծխելը, ավելորդ քաշը, վատ սնունդը, թույլ իմունային համակարգը կամ ժառանգականությունը:

6.      Արգանդի վզիկի քսուքի միջոցով կարելի է հայտնաբերել «գինեկոլոգիական» քաղցկեղի բոլոր տեսակները, այդ թվում նաև ձվարանների քաղցկեղը

Ցավոք, դա այդպես չէ: Այս թեստը նախատեսված է արգանդի վզիկի հատվածում նախաքաղցկեղային փոփոխությունների հայտնաբերման համար, որոնք չբուժելու դեպքում կհանգեցնեն քաղցկեղի զարգացման:

7.      Կույսերն այս թեստի կարիքը չունեն

Արգանդի վզիկի քաղցկեղի դեպքերի ճնշող մեծամասնությունն առաջանում է պապիլոմա վիրուսի հետևանքով, որը, ինչպես արդեն նշվել է, կարող է փոխանցվել նույնիսկ ոչ լիարժեք սեքսի դեպքում: Սա է պատճառը, որ անկախ սեռական ակտիվությունից, բոլոր կանայք պետք է պարբերաբար բուժզննում անցնեն:

Նաև հարկ է հիշել, որ պապիլոմա վիրուսն արգանդի վզիկի քաղցկեղի հիմնական պատճառը է, բայց ոչ միակը և կան նաև ռիսկի այլ գործոններ: Սակայն այս վիրուսը դեռ խուճապի մատնվելու պատճառ չէ, քանի որ երբեմն այն անցնում է առանց որևէ բուժման, ինչպես հասարակ մրսածությունը:

8. Հակաբեղմնավորիչ միջոցները բարձրացնում են քաղցկեղի առաջացման հավանականությունը

Զարմանալի է, բայց այս դեպքում տեղի է ունենում հակառակ գործընթացը: Բազմիցս ապացուցվել է, որ հակաբեմնավորիչ դեղամիջոցները նվազեցնում են արգանդի քաղցկեղի և ձվարանների քաղցկեղի առաջացման հավանականությունը:

9. Արտաքին սեռական օրգանների տեսքի փոփոխությունը սովորական երևույթ է

Յուրաքանչյուր կին էլ կարող է նկատել արտաքին սեռական օրգանների տեսքի որոշ փոփոխություններ: Օրինակ դրանց գույնը կարող է մգվել սեռական գրգռվածության ժամանակ, կամ դրանք կարող են կորցնել իրեն տեսքը տարիքի հետ, սակայն որևէ խոցեր, կոշտացումներ, կարմիր, սպիտակ կամ մուգ հետքեր նկատելու դեպքում հարկավոր է անմիջապես բուժզննում անցնել, քանի որ մաշկային որոշ հիվանդություններ կարող են լինել չարորակ:

10. Դաշտանների միջև արյունահոսությունը սովորական երևույթ է

Այս խնդիրն, իհարկե, կարող է պայմանավորված լինել հորմոնալ դեղամիջոցներով, սակայն դա չի նշանակում, որ կարելի է անտեսել այն: Հաճախ հանկարծակի սկսվող հեշտոցային արյունահոսությունը կապված է լինում «գինեկոլոգիական» քաղցկեղի հետ: Ընդ որում այն կարող է լինել «գինեկոլոգիական» քաղցկեղի ցանկանած տեսակի ախտանշան:

11. Մանուկ հասակում արված պատվաստումը մարդու պապիլոմա վիրուսի դեմ կարող է նպաստել դեռահաս տարիքում թեթևաբարո պահվածքի ձևավորմանը

Մարդու սեռական ակտիվության ու պատվաստան միջև ոչ մի ուղղակի կապ չկա: Սա պարզապես քաղցկեղի դեմ արված պատվաստում է, իսկ երեխայի պահվածքը կախված է նրա դաստիարակությունից: Ցանկալի է, որ բոլոր երիտասարդները նման պրոցեդուրա անցնեն:

Սակայն հարկ է նաև հիշել, որ այն չի պաշտպանում սեռավարակներից: