Արմատապտուղ, որը կարգավորում է արյան մեջ շաքարի մակարդակն ու բուժում հոդերը. սև բողկի ամենաօգտակար հատկությունները

Այս զարմանահրաշ արմատապտուղն աճում է գրեթե ամեն տեղ և օգտագործվում է ժողովրդական բժշկության մեջ՝ տարբեր հիվանդությունների բուժման համար: Դրա օգտագործումն օգնում է կանխել գերճնշումը, կարգավորել արյան մեջ շաքարի մակարդակը և բուժել հիվանդ հոդերը:

Սև բողկն անչափ օգտակար բույս է, որը դարեր շարունակ համարվում է մարդու օրգանիզմի սանիտարը:

Այս պտղի հայրենիքը համարվում է Ասիան, որտեղ այն դարեր ի վեր աճեցվել է որպես բանջարեղեն: Ներկայումս այն տարածված է գրեթե ամենուր:

Հայտնի է, որ դեռ Հին Եգիպտոսում բուրգերի կառուցման ժամանակ շինարարներն իրենց սննդակարգի մեջ օգտագործում էին սև բողկ՝ առողջության պահպանման, աշխատունակության բարձրացման ու օրգանիզմին տոնուս հաղորդելու համար: Այսօր այն օգտագործվում է և՛ որպես սննդամթերք, և՛ որպես բուժիչ միջոց:

 Բողկի տեսակները տարբերվում են պտուղի ձևով և գույնով, սակայն սև բողկը համարվում է ամենաօգտակարն ու արդյունավետը:

Սև բողկի բաղադրությունը

Սև բողկը բանջարեղենի այլ տեսակների համեմատ չի պարունակում այդքան շատ վիտամիններ ու հանքանյութեր, սակայն այն շատ օգտակար է իր կատարյալ բաղադրության շնորհիվ, քանի որ պարունակում է գրեթե ամեն ինչ չափավոր չափաբաժիններով: Հանքանյութերի, եթերայուղերի, վիտամինների և այլ օգտակար նյութերի յուրահատուկ համադրությունը սև բողկը վերածում է շատ արդյունավետ դեղամիջոցի:

Սև բողկը պարունակում է սպիտակուցներ, ածխաջրեր (սախարոզա և ֆրուկտոզա), ճարպեր, պրովիտամին A (կարոտին), A, B9, K և C վիտամիններ և օգտակար միկրոտարրեր (երկաթ, կալցիում, ֆոսֆոր, մագնեզիում, նատրիում, կալիում, ցինկ): Այն հատկապես օգտակար է թարմ վիճակում: Դրա 100 գրամում պարունակվում է գրեթե 2 գրամ սպիտակուցներ, 0,2 գրամ ճարպեր, 6,7 գրամ ածխաջրեր, 2,1 գրամ սննդային մանրաթելեր, ինչպես նաև օրգանական թթուներ, ջուր, օսլա, ածուխ և մոնո- ու դիսախարոիդներ:

Սև բողկի օգտակար հատկությունները

Սև բողկի բաղադրության մեջ պարունակվող B խմբի վիտամինները և C վիտամինը նպաստում են մարդու օրգանիզմի բնականոն գործունեությանը:

Այն նաև հարուստ է ասկորբինաթթվով, որն օգնում է բուժել լյարդի և լեղապարկի հիվանդությունները, բրոնխիալ ասթման, ինչպես նաև նպաստում է հիվանդությունից հետո օրգանիզմի արագ վերականգնմանը:

Բացի այդ, սև բողկը նաև հարուստ է վիտամին B1-ով, որն անչափ անհրաժեշտ է երեխաներին աճի համար, նպաստում է ճարպերի փոխանակմանը և սրտանոթային ու նյարդային համակարգերի աշխատանքին:

Սև բողկն օժտված է միզամուղ հատկությամբ: Այն նպաստում է երիկամներում ու լեղապարկում գտնվող քարերի ու ավազի արագ լուծմանն ու օրգանիզմից դուրս բերմանը:

Բացի այդ, այն ունի նաև բակտերիասպան հատկություններ: Դրանում պարունակվող ֆիտոնցիդները ոչնչացնում են մանրէներն ու պաշտպանում օրգանիզմը տարբեր վարակներից: Սև բողկը սոխի ու սխտորի հետ համադրելու դեպքում կարելի է ստանալ աղիների միկրոֆլորայի առողջացմանը նպաստող լավագույն բնական դեղամիջոցը:

Այս արմատապտուղը նաև շատ օգտակար է  բրոնխիտի, կապույտ հազի, արյունոտ հազի դեպքում, քանի որ այն արագացնում է խորխի դուրս բերման գործընթացը: Երկարատև հազի ժամանակ խորհուրդ է տրվում օգտագործել մեղրով բողկ:

Սև բողկը պարունակում է ծծումբային եթերայուղեր, որոնք բարձրացնում են ախորժակն ու խթանում մարսողությունը:

Սև բողկն օժտված է ցավազրկող հատկություններով: Սև բողկի հյութով արվող կետային մերսումը կօգնի ազատվել ինչպես ռադիկուլիտի ցավերից, այնպես էլ վնասվածքների հետևանքով առաջացած ցավերից:

Այն նաև իջեցնում է արյան մեջ խոլեստերինի մակարդակը, ուստի օժտված է հակասկլերոտիկ ազդեցությամբ:

Սև բողկը նաև շատ օգտակար է վահանաձև գեղձի գործառույթի խանգարումների և այդ գեղձի հիվանդությունների ժամանակ, քանի որ այն հարուստ է յոդով, որը նպաստում է անհրաժեշտ հորմոնների արտադրմանը:

Սև բողկի մեջ պարունակվող մեծ քանակությամբ մանրաթելերը նպաստում են մարսողական օրգանների աշխատանքին: Այն շատ օգտակար է քրոնիկ հեպատիտի, լյարդի ցիռոզի, խոլեցիստիտի, միզաքարային հիվանդության, փորկապության ու աղիների խնդիրների դեպքում:

Այս արմատապտուղը դուրս է բերում օրգանիզմից ավելորդ հեղուկը, կարգավորում է ջրի ու աղի հավասարակշռությունը, ինչի շնորհիվ էլ օգնում է կարճ ժամանակահատվածում ազատվել այտուցվածություններից:

Սև բողկը պարունակում է նաև լիզոցիմ, ուստի անփոխարինելի միջոց է տարատեսակ մակաբույծների դեմ պայքարելու համար:

Այս անչափ օգտակար և համեղ արմատապտուղն աճում է գրեթե ամենուր և շատ հասանելի է: Այն կարող է դառնալ դեղատների թանկարժեք դեղորայքին փոխարինող հիանալի բուժիչ միջոց տարբեր հիվանդությունների դեպքում:

Նյութի աղբյուրը՝ 1m-idea.ru