Վիրուսային հեպատիտների ախտանշանները, փոխանցման ճանապարհներն ու կանխարգելումը

Վիրուսային հեպատիտը վարակիչ հիվանդություն է, որի ժամանակ ախտահարվում է լյարդը: Վիրուսային հեպատիտներ առաջացնում են հեպատիտ Ա-ի, Բ-ի, Ց-ի, Դ-ի, Ե-ի վիրուսները: Առավել տարածված են վիրուսային հեպատիտներ Ա-ն, Բ-ն, Ց-ն:

Սուր վիրուսային հեպատիտ Բ-ի և Ց-ի ախտանշաններն են` ընդհանուր թուլությունը, հոգնածությունը, գլխացավը, հոդացավը, ախորժակի անկումը, ցավերն աջ ենթակողային հատվածում, մաշկի և աչքերի լորձաթաղանթի դեղնությունը, հիվանդությունը կարող է ընթանալ նաև առանց որևէ ախտանշանի (հիմնականում քրոնիկ ձևով ընթացքի ժամանակ): 

Վիրուսային հեպատիտներ Բ-ն և Ց-ն փոխանցվում են բուժական և ախտորոշիչ միջամտությունների (արյան փոխներարկման, օրգանների և հյուսվածքների փոխպատվաստման, հեմոդիալիզի, ինչպես նաև աղտոտված բժշկական նշանակության իրերի օգտագործման) միջոցով:

Հիվանդությունը փոխանցվում է նաև սեռական և կոնտակտակենցաղային ճանապարհով: 

Մահաբեր վիրուս կարելի է «ձեռք բերել» ամենահասարակ կենցաղային առարկաների՝ ատամի խոզանակի, սափրիչների, մատնահարդարման պարագաների օգտագործման ժամանակ, որից օգտվել է հիվանդ մարդը: Ականջ դակելու և պիրսինգի ժամանակ վարակի աղբյուր կարող են հանդիսանալ նույնիսկ «ատրճանակները», որոնցով կատարում են ականջի դակումը և որոնք շատ դժվար են ենթարկվում ախտահանման: 

Վերջին տասնամյակում մոդայիկ է դարձել մաշկը տարբեր մեթոդներով զարդարելը: Դաջվածք, սպիավորում, պիրսինգ՝ այս բոլորը գործողություններ են, որոնց ժամանակ կատարվում է մաշկի ամբողջականության խախտում: Հեպատիտներով վարակման ռիսկը դրանց ժամանակ շատ մեծ է: Նորից խոսքը գնում է ոչ բավարար ախտահանված գործիքների մասին: Ընդ որում, մանրէազերծ պետք է լինեն ոչ միայն ասեղները, այլև բոլոր տեսակի տարաները, սեղանի մակերեսը և այն ամենը, ինչին կարող է հպվել գործիքը: Իդեալականն այն է, երբ բոլոր պարագաները լինեն մեկանգամյա օգտագործման: 

Վիրուսային հեպատիտներից խուսափելու համար՝

Պատվաստվե՛ք հեպատիտ Բ-ի դեմ (հեպատիտ Ց-ի դեմ պատվաստանյութ չկա),
Օգտագործե՛ք պահպանակներ սեռական հարաբերությունների ժամանակ,
Օգտագործե՛ք անհատական սափրվելու պարագաներ, ատամի խոզանակ, մատնահարդարման պարագաներ,

Պահանջե՛ք մաշկի և լորձաթաղանթի դակումը, մատնահարդարումը, ոտնահարդարումը և դաճվածքները իրականացնել մանրէազերծված կամ մեկանգամյա կիրառման գործիքներով:

Աղբյուր՝ Հիվանդությունների վերահսկման և կանխարգելման Ազգային Կենտրոն