Որոնք են սրտանոթային հիվանդությունների ատիպիկ ախտանշաններն ու ինչպես կանխարգելել սրտամկանի կաթվածը. խորհուրդներ բժիշկ Ա. Դանոյանից

Սրտանոթային հիվանդությունները համարվում են ամբողջ աշխարհում մահացության ու հաշմանդամության հիմնական պատճառներից մեկը: Ժամանակին պատշաճ բուժօգնություն չցուցաբերելու կամ ավելի վաղ կանխարգելիչ միջոցներ չձեռնարկելու հետևանքով՝ աշխարհում տարեցտարի հազարավոր մահվան ու հաշմանդամության դեպքեր են գրանցվում:

Սրտանոթային համակարգի հիվանդությունները հիմնականում հատուկ են միջինից բարձր տարիքի անձանց, սակայն վերջին տարիներին, ցավոք, նկատվում է այս հիվանդությունների «երիտասարդացման» միտում: Անառողջ ապրելակերպն ու էկոլոգիական վատ պայմաններն էլ ավելի են նպաստում հիվանդությունների զարգացմանը, ինչի հետևանքով իրավիճակը դարձել է խիստ ռիսկային:

ՀՀ-ում սրտանոթային հիվանդությունների տարածվածության, դրանց ախտանշանների և կանխարգելման միջոցների մասին Med.tert.am-ը զրուցեց «Աստղիկ» բժշկական կենտրոնի բժիշկ-առիթմոլոգ Արման Դանոյանի հետ:

Ինչո՞վ է պայմանավորված այն փաստը, որ այսօր ՀՀ-ում շատ մեծ է սրտի հիվանդություններով տառապողների թիվը:

Ճիշտն ասած ՀՀ-ն ոչնչով չի տարբերվում ցանկացած այլ երկրից: Ընդհանրապես մահացության առումով առաջին տեղում սրտանոթային հիվանդություններն են: Նույնիսկ եթե գումարենք ինսուլտի, քաղցկեղի, ՄԻԱՎ-ի հետևանքով մահացության դեպքերի թվերը, ապա այդ բոլորը միասին ավելի փոքր թիվ են կազմում, քան սրտանոթային հիվանդությունների հետևանքով գրանցվող մահվան դեպքերի թիվն է: Սա ամբողջ աշխարհի վիճակագրությունն է, ուստի առանձնահատուկ ուշադրություն է դարձվում սրտանոթային հիվանդությունների կանխարգելմանը:

Իսկ ի՞նչ ատիպիկ ախտանշաններ են լինում սրտանոթային հիվանդությունների դեպքում:

Եթե խոսենք վտանգավոր հիվանդությունների, այսինքն` սրտամկանի ինֆարկտի մասին, ապա որոշ դեպքերում, իսկապես, կարող են լինել ոչ բնորոշ տեղակայման ցավեր: Դրանք կարող են լինել և՛ ծնոտի, և՛ թևերի, և՛ մատների, և՛ երբեմն նույնիսկ որովայնի շրջանում: Դրանք ատիպիկ ցավեր են, սակայն դրանց քանակությունը, բարեբախտաբար, ավելի քիչ է, քան բնորոշ տեղակայումով ցավերի քանակն է:

Իսկ կա՞ն խորհուրդներ, որոնք կօգնեն մարդկանց կանխարգելել սրտամկանի կաթվածը կամ սրտանոթային այլ հիվանդությունները:

Սրտանոթային հիվանդությունների ռիսկի գործոնները, բարեբախտաբար, հայտնի են: Կան որոշակի ռիսկի գործոններ, որոնք մոդիֆիկացիայի՝ կարգավորման ենթակա չեն: Օրինակ՝ մարդու ժառանգականությունը: Այսինքն նա արդեն ժառանգել է դա. ծնողները, հորեղբայրը կամ առհասարակ որևէ այլ ազգականը տառապել են ինֆարկտով և նրա գենետիկան այս առումով այդքան էլ լավը չէ: Այսպիսի ռիսիկի գործոնները չեն մոդիֆիկացվում, քանի որ մարդը ժառանգում է և վերջ: Սակայն կան որոշակի գործոններ, որոնց վրա մենք լուրջ ազդեցություն կարող ենք ունենալ: Դա ծխելն է և խոլեստերինի մակարդակի վերահսկումը: Այսինքն՝ որոշակի ռիսկային տարիքից հետո (տղամարդիկ՝  40, կանայք՝  դաշտանադադարից հետո) մարդիկ մտնում են սրտանոթային հիվանդությունների ռիսկային խումբ և պետք է շատ մեծ ուշադրություն դարձնեն այդ հավելյալ ռիսկի գործոններին, որոնք կարելի է սեփական ուժերով մոդիֆիկացնել և չեզոքացնել: