Ի՞նչ է գրիպը և ինչով է այն տարբերվում մրսածությունից. ախտանշանների նմանություններն ու տարբերությունները

Մարդիկ երբեմն դասում են գրպը ամենածանր հիվանդություններին, երբեմն էլ՝ ամենաթեթևներին:
Նշենք, որ գրիպի հիվանդացությունը 5-20% է. այսինքն, յուրաքանչյուր տարի աշխարհի բնակչության 5-20%-ը առնվազն մեկ անգամ գրիպով է հիվանդանում: 250 000-500 000 մարդ տարեկան մահանում է գրիպից. ավելին՝ ըստ 2011 թվականի տվյալների, գրիպից տարեկան մոտ 28 000-111 500 մինչեւ հինգ տարեկան երեխա է մահանում:

Ի՞նչ է իրականում իրենից ներկայացնում գրիպը և ինչո՞վ է այն մրսածությունից տարբերվում: 
Գրիպի առաջացման հիմնական պատճառը գրիպի վիրուսն է, որը ներթափանցում է մարդու օրգանիզմ, բազմանում այնտեղ և առաջացնում հիվանդության ախտանշաններ ու այլ խնդիրներ: Կախված գրիպի տեսակից՝ վիրուսը կարող է մարդուց մարդ, կամ՝ կենդանիներից մարդուն փոխանցվել:

Գրիպի երեք ենթատեսակ կա՝ A, B եւ C: A եւ B տեսակներն ունեն համաճարակաբանական նշանակություն, ընդ որում A տեսակը ամենավտանգավորն է՝ հենց այն բազմաթիվ ենթատեսակներ ունի:

Ի տարբերություն գրիպի, մրսածությունը հիմնականում առաջանում է ուղղակի մրսելուց կամ՝ որոշ այլ վիրուսների, բայց ոչ գրիպի վիրուսի պատճառով:

Ախտանշաններ

Մրսածությունը սովորաբար թեթև վիճակն է, որի ժամանակ լինում են հազ, փռշտոց, քթահոսություն, երբեմն էլ՝ ջերմություն: Այս ախտանշանները կարող են մեկից երեք օր շարունակվել, իսկ չորրորդ օրը հիվանդն իրեն արդեն լավ է զգում: Անկողնային ռեժիմ մրսածության ժամանակ չի պահանջվում:

Գրիպի ախտանշանները կարող են շատ նման լինել մրսածության ախտանշաններին՝ կոկորդի ցավ, ուժեղ գլխացավ, հազ, բարձր ջերմություն (39-40 աստիճան): Կարող են լինել նաև այլ ախտանշաններ. քթից արյունահոսությունը, մարմնի ջարդվածության զգացողությունը: Ի դեպ, մրսածության ժամանակ սովորաբար քթահոսություն է լինում, իսկ գրիպի ժամանակ՝ ոչ:

Ի տարբերություն մրսածության, գրիպի ժամանակ անկողնային ռեժիմ է անհրաժեշտ, իսկ այն «ոտքի վրա» անցկացնելը երբեմն ցանկության դեպքում էլ անհնար է լինում:

Գրիպի գաղտնի շրջանը 1-3 օր է, բայց կարող են և հաշված ժամեր լինել, որից հետո հիվանդության ախտանշաններն արդեն կսկսեն ի հայտ գալ: Ախտանշանների ի հայտ գալուց մեկ օր առաջ գրիպն արդեն վարակիչ է, և շարունակում է այդպիսին մնալ ևս 3-5 օր: