Սմարթֆոնները խիստ վնասակար են աչքերի առողջության համար. գիտնականներ

Կորեացի գիտնականները եկել են այն եզրահանգման, որ սմարթֆոնի էկրանի առջև 3 և ավել ժամ անցկացնող երեխաների մոտ ավելի հաճախ է նկատվում չոր աչքի համախտանիշ, քան նրանց այն հասակակիցների շրջանում, որոնք ժամանակակից գաջեթներ ավելի քիչ են օգտագործում:

Չոր աչքի համախտանիշի ախտանշանները բուժելու համար երեխաները ստիպված են եղել մեկ ամսով հրաժարվել սմարթֆոնների գործածությունից:

Չոր աչքի համախտանիշն առաջանում է այն ժամանակ, երբ աչքն ի վիճակի չի լինում բավարար քանակությամբ արտասուք արտադրել, ինչի հետևանքով այն կարմրում է, դառնում դյուրագրգիռ և թվում է, թե աչքի մեջ փոշի է լցվել:

Որպես կանոն այս համախտանիշն ախտորոշվում է տարեցների մոտ, սակայն վերջին ժամանակներում հիվանդությունը սկսել է «երիտասարդանալ»: Այն նույնիսկ սկսել է նկատվել երեխաների մոտ և գիտնականները վստահ են, որ պատճառը սմարթֆոնների գործածությունն է:

Գիտնականներն իրենց այս ենթադրությունը հաստատելու համար անց են կացրել մի հետազոտություն, որին մասնակցել է 7-12 տարեկան 916 երեխա: Երեխաների տեսողությունի ստուգելու ընթացքում պարզվել է, որ գիտափորձին մասնակցող երեխաների 6,6%-ի մոտ արդեն կա չոր աչքի համախտանիշ: Ընդ որում՝ նրանք գրեթե բոլորն էլ օրական 3,2 ժամ սմարթֆոն էին օգտագործում:

Պարզվել է նաև, որ մնացած երեխաների գրեթե կեսն ընդհանրապես գաջեթներ չի օգտագործում, իսկ մյուս կեսը հեռախոսի էկրանի առջև գտնվում է օրական մոտ 37 րոպե:

Կորեացի գիտնականներին հաջողվել է գտնել էլ ավելի համոզիչ փաստարկ, որն ապացուցում է չոր աչքի համախտանիշի և սմարթֆոն օգտագործելու միջև եղած կապի առկայությունը:

Նրանք այդ համախտանիշով տառապող երեխաներին խնդրել են մեկ ամսով հրաժարվել գաջեթների գործածությունից, ինչի արդյունքում հիվանդության ախտանշաններն ամբողջությամբ վերացել են:

Այն ծնողներին, որոնք ցանկանում են զերծ պահել երեխաներին սմարթֆոնների վնասակար ազդեցությունից, սակայն չեն կարող ամբողջությամբ հրաժարվել գաջեթներից, The Independent պարբերականի փորձագետները խորհուրդ են տալիս քնելուց առաջ մեկ ժամվա ընթացքում թույլ չտալ, որ երեխան բջջային հեռախոս օգտագործի: Բացի այդ, հարկավոր է հետևել նաև, որ օրվա ընթացքում երեխան 2 ժամից ավել անընդմեջ սմարթֆոն չօգտագործի:

Նյութի աղբյուրը՝ gogetnews.info