Որոնք են ակնամոմի ոգեթուրմի բուժիչ հատկություններն ու օգտագործման եղանակները

Մեղուների մարսողական ֆերմենտների և բույսերի խեժային նյութերի խառնուրդից առաջանում է մի յուրահատուկ կպչուն նյութ, որը կոչվում է ակնամոմ: Մեղուներին այս նյութը հարկավոր է փեթակները պաշտպանելու և վարակազերծելու համար, իսկ մարդկանց՝ բուժման:

Չնայած, որ ակնամոմը մարդկությանը ծանոթ է արդեն բազում հազարամյակներ, ժամանակակից բժշկությունը շարունակում է բացահայտել դրա նորանոր օգտակար հատկությունները: Այս մթերքը կարելի է օգտագործել տարբեր միջոցներով: Այն կարելի է պարզապես ծամել, ավելացնել կաթին (օգնում է բուժել հազը) կամ պատրաստել ակնամոմի ոգեթուրմ:

Ակնամոմի ոգեթուրմի բուժիչ հատկությունները

Անկամոմի ոգեթուրմը ներքին օգտագործման դեպքում նպաստում է իմունային համակարգի ամրապնդմանը, բուժում է բորբոքային գործընթացները և ազդում է որպես հակաօքսիդանտ: Որպես արտաքին օգտագործման միջոց այն էլ ավելի արդյունավետ է և օգտագործվում է վերքերը վարակազերծելու և ամոքելու, մաշկը վերականգնելու, ցավազրկելու և սնկերը վերացնելու համար:

Բժիշկներն այս դեղամիջոցը նշանակում են ամենատարբեր հիվանդությունների և խնդիրների դեպքում (ֆարինգիտ, սինուսիտ, օտիտ, բրոնխիտ, թոքաբորբ, վիրուսային վարակներ, ատամնաբուժական ախտաբանություններ, գինեկոլոգիական խնդիրներ, աղեստամոքսային համակարգի խնդիրներ և այլն):

Ամենից հաճախ օգտագործվում է ակնամոմի 10 տոկոսանոց ոգեթուրմը: Այն կարելի է գնել դեղատներից կամ պատրաստել ինքնուրույն:

Ակնամոմի ոգեթուրմի օգտագործման եղանակը

1.      Ֆարինգիտի և տոնզիլիտի դեպքում հարկավոր է կոկորդը ողողել ակնամոմի ոգեթուրմի և ֆիզլուծույթի խառնուրդով (1:10 հարաբերակցությամբ):

2.      Նույն կերպ կարելի է ողողել բերանի խոռոչը ատամների հիվանդությունների դեպքում:

3.      Այս նույն լուծույթը հարկավոր է կաթեցնել քթին և ողողել դրանով քթի խոռոչը սինուսիտի և հայմորիտի դեպքում:

4.      Օտիտի ժամանակ կարելի է ակնամոմի ոգեթուրմով թրջված բամբակ դնել ականջի մեջ: Եթե հիվանդը երեխա է, ապա ոգեթուրմին հարկավոր է եռացրած գոլ ջուր խառնել (1:1 հարաբերակցությամբ): Մեծահասակների դեպքում կարելի է նաև ականջների մեջ 2-ական կաթիլ ոգեթուրմ (5%-անոց) կաթեցնել, մինչև խնդիրը լուծվի:

5.      Շնչառական ուղիների հիվանդությունների դեպքում կարելի է նաև ակնամոմի և ֆիզլուծույթի խառնուրդով (1 կաթիլ թուրմը խառնել 5 մլ լուծույթին) ինհալացիաներ անել: Ստացված խառնուրդը հարկավոր է լցնել ներշնչակի մեջ:

6.      Որպես ընդհանուր կազդուրիչ միջոց հարկավոր է 15-20 կաթիլ թուրմը լուծել մեկ գդալ կաթի կամ ջրի մեջ և խմել ուտելուց 30 րոպե առաջ:

7.      Ստամոքսի խնդիրների դեպքում անհրաժեշտ է 15-20 կաթիլ թուրմն ավելացնել գոլ ջրին և խմել ուտելուց 30 րոպե առաջ:

8.      Մաշկային խնդիրների, վերքերի, հերպեսի, ոտքերի և եղունգների, թեփի դեպքում հարկավոր է ակնամոմի ոգեթուրմով շփումներ, վիրակապեր կամ թրջոցներ դնել:

Սակայն հարկ է հիշել, որ, չնայած իր օգտակար հատկություններին, հիվանդության հստակ ախտորոշման ու ճիշտ բուժման համար հարկավոր է դիմել բժշկին:

Բացի այդ, այս ակնամոմի ոգեթուրմը հակացուցված է մեղրից կամ ակնամոմից ալերգիա ունեցողներին: Ներքին օգտագործման դեպքում այն հակացուցված է հղիներին, վարորդներին ու երեխաներին: Մինչև 3 տարեկան երեխաներին առհասարակ խորհուրդ չի տրվում ակնամոմ կամ ակնամոմ պարունակող դեղամիջոցներ տալ:

Նյութի աղբյուրը՝ takprosto.cc