Պետք է արդյոք պարզել երեխայի սեռը մինչ նրա լույս աշխարհ գալը

Շատ երիտասարդ զույգեր ուզում են հնարավորինս շուտ պարզել իրենց ապագա փոքրիկի սեռը, մյուսներն էլ նաընտրում են անտեղյակ լինել մինչ երեխայի լույս աշխարհ գալը: Առհասարակ երեխայի սեռը նախապես իմանալը էականորեն ոչինչ չի փոխում, սակայն որոշ դեպքերում դա օգնում է ապագա մայրիկներին ու հայրիկներին ավելի ճիշտ նախապատրաստվել:

Սակայն որոշ զույգերի համար շատ դժվար է լինում հաշտվելը այն մտքի հետ, որ երեխան այն սեռի չէ, ինչ իրենք էին երազում: Օրինակ՝ համարվում է, որ տղամարդկանց մեծ մասը երազում է տղա երեխայի մասին, քանի որ որդին ժառանգ է, տոհմի շարունակողն ու հոր հպարտությունը: Որոշ տղամարդկանց համար դստեր ծնունդն իսկապես մեծ ցնցում է լինում, ուստի ժամանակին երեխայի սեռը պարզելը հնարավորություն է տալիս տղամարդկանց հաշտվել դուստր ունենալու մտքի հետ, նախապատրաստվել և բազմաթիվ դրական կողմեր գտնել:

Ի դեպ՝ գիտնականները վաղուց ու բազմիցս ապացուցել են, որ երեխայի սեռը կենսաբանորեն կախված է միայն տղամարդուց:

Ապագա երեխայի սեռը պարզելու ցանակությունը մարդկանց մեջ միշտ է եղել: Մինչ ուլտրաձայնային հետազոտության հայտնաբերումը ծնողները փորձում էին կանխագուշակել երեխայի սեռը հատուկ նշանների օգնությամբ: Օրինակ՝ մարդիկ ենթադրում էին, որ եթե կինը հղիության ընթացքում էլ ավելի է գեղեցկանում, ապա նա սպասում է տղա երեխայի, քանի որ աղջիկ երեխայի դեպքում նա իր գեղեցկությունը տալիս է դստերը: Ոմանք էլ կողմնորոշվում են իրենց նախասիրություններով: Օրինակ՝ տղա երեխայի դեպքում հղիներն ավելի շատ նախապատվությունը տալիս են մսային ուտեստներին, միչդեռ աղջկա դեպքում շատ միրգ ու բանջարեղեն են օգտագործում:

Մարդկանց կարծիքով՝ ապագա երեխայի սեռի մասին հուշում են նաև տոքսիկոզի առանձնահատկություններն ու փորի ձևը:

Շատերը նաև դիմում են տարբեր աղյուսակների ու սխեմաների օգնությանը: Հատկապես տարածված են չինական ու ճապոնական աղյուսակները և չնայած, որ բժիշկները խորհուրդ չեն տալիս հավատալ դրանց արժանահավատությանը, շատերն իրենց նախապատվությունը տալիս են հենց այս մեթոդներին:

 Ի դեպ՝ ուլտրաձայնային հետազոտությունը նույնպես ոչ միշտ է տալիս ճիշտ պատասխան, քանի որ հետազոտության ժամանակ երեխան կարող է շրջվել՝ փորձելով թաքնվել:

Ինչու են ծնողները փորձում նախապես ճշտել երեխայի սեռը

1.      Նախապես երեխայի սեռն իմանալով կարելի է խոսել դեռ չծնված երեխայի հետ և նրան անունով դիմել:

2.      Բացի այդ, կարելի է նախապես ձևավորել երեխայի սենյակը և գնել համապատասխան գույների պարագաներ:

3.      Առաջին երեխային ավելի հեշտ կլինի նախապատրաստել ընտանիքում սպասվող համալրմանը, եթե նախապես պարզ լինի՝ նա քույր է ունենալու, թե եղբայր:

Ինչ են մտածում ծնողները, որոնք չեն ցանկանում պարզել երեխայի սեռը

1.      Անվան փոխարեն կարելի է օգտագործել փաղաքշական բառեր: Որոշ մասնագետների հավաստմամբ՝ դրանք նպաստում են մոր ու երեխայի մտերմացմանը:

2.      Երեխայի ծնունդն անակնկալ կլինի ամբողջ ընտանիքի համար: Երբ երեխայի սեռը հայտնի չի լինում, նրա ծնունդն իսկապես սպասված է լինում:

3.      Պետք չէ սահմանափակվել վարդագույն ու կապույտ գույներով: Կարելի է սենյակը ձևավորել կանաչ, նարնջագույն կամ որևէ այլ գեղեցիկ գույնով:

4.      Մանուշակագույն հագուստը շատ ոճային ու գեղեցիկ է և համապատասխանում է և՛ տղային, և՛ աղջկան:

5.      Բացի այդ, երեխայի հետ զրուցելիս մեծ է նրա սեռին ոչ բնորոշ բնավորության գծեր ձևավորելու հավանակությունը, քանի որ հետազոտությունները ցույց են տվել, որ երեխան սկսում է ընկալել տեղեկատվությունը դեռ մոր արգանդում:

Այսպիսով՝ մայրիկը, որն իր կարծիքով աղջիկ երեխայի է սպասում, կարող է շատ նուրբ խոսել երեխայի հետ և իր ապագա որդուն այդպիսով դարձնել շատ նուրբ, պասիվ ու թուլակամ: Եվ հակառակ՝ աղջիկը կարող է շատ կոպիտ բնավորության տեր դառնալ, եթե ծնողները հղիության ընթացքում նրա հետ խոսեն՝ ինչպես ապագա ֆուտբոլիստի կամ զինվորականի հետ:

Նյութի աղբյուրը՝ podelkidetkam.ru