Կոճապղպեղով կոմպրես՝ ծնկահոդի ցավը մեղմելու համար

Կաճապղպեղը բնական արդյունավետ միջոց է, որի հակաբորբոքային հատկությունների մասին մարդիկ գիտեն շատ վաղուց: Այն օգտագործվում էր դեռ Հին Չինաստանում՝ որպես արդյունավետ ցավազրկող միջոց:

Կոճապղպեղն օգնում է մեղմել արթրիտի ախտանշանները, ազատում է մկանային ցավերից, գլխացավերից ու հոդացավերից: Բացի այդ, այն նպաստում է արյան շրջանառութան բարելավմանը:

Ինչպես բուժել ծնկահոդի ցավը կոճապղպեղի օգնությամբ

Կոճապղպեղի օգնությամբ առողջական վիճակը բարելավելու միջոցները տարբեր են: Ոմանք այն փոշու տեսքով ավելացնում են ուտեստներին ու ըմպելիքներին, ոմանք խմում են թարմ կոճապղպեղի հյութը, ոմանք էլ դրանով կոմպրեսներ են պատրաստում:

Կոճապղպեղով կոմպրեսը հիանալի միջոց է մկանային ցավերից ազատվելու, ինչպես նաև երակների վարիկոզային լայնացման, ձգվածքների և նույնիսկ ռևմատիզմի ախտանշանները մեղմելու համար: Կոճապղպեղը, լինելով ակտիվ բաղադրիչ, առաջացնում է այրոցի զգացողություն և բարձրացնում է հյուսվածքների ջերմաստիճանը, սակայն անհանգստանալու կարիք չկա, քանի որ հենց այս կերպ է այն ազդում:

Կոմպրեսի բաղադրիչները ներթափանցում են մաշկի խորը շերտերի մեջ և ազդում ցավի սկզբնապատճառի վրա: Ընդ որում՝ նման արդյունավետ ու անվնաս ցավազրկողի բոլոր բաղադրիչները տարածված են ու հասանելի:

Բաղադրությունը.

·        70 գրամ կոճապղպեղի արմատ,

·        2 ճ.գ. ծովի աղ,

·        4 պճեղ սխտոր:

Օգտագործման եղանակը.

1.      Առաջին հերթին՝ հարկավոր է կեղևազրկել կոճապղպեղը և լավ մանրացնել այն:

2.      Մաքրել սխտորները, այնուհետև սանդի մեջ խառնել կոճապղպեղը, սխտորն ու աղը և լավ տրորել, մինչև դառնա համասեռ զանգված:

3.      Ստացված զանգվածը քսել մաշկին այն հատվածում, որտեղ անհանգստացնում են ցավոտ զգացողությունները, այնուհետև փաթաթել այդ հատվածը սննդի համար նախատեսված պոլիէթիլենային թաղանթով:

4.      Կոմպրեսը պետք է դնել այնպես, որ այն լինի ամուր, բայց ոչ չափազանց ձիգ:

5.      Անհրաժեշտության դեպքում կարելի է ֆիքսել կոմպրեսը նաև կպչուն ժապավենով:

6.      Հնարավորության դեպքում կարելի է օգտագործել նաև բանդաժ, որը կպաշտպանի կոմպրեսը շարժվելիս:

7.      Այս կոմպրեսը խորհուրդ է տրվում թողնել առնվազն 6 ժամ:

Հարկ է հիշել, որ կաճապղպեղով կոմպրեսը խորհուրդ չի տրվում օգտագործել բաց վերքերի դեպքում, քանի որ այն օգնում է միայն հոդերի ու մկանների ներքին ցավերի ժամանակ:

Կոճապղպեղը յուրահատուկ բնական բուժիչ միջոց է: Այն պարունակում է ավելի քան 12 բաղադրիչ, որոնք օգնում են բուժել օրգանիզմում տեղի ունեցող բորբոքային գործընթացները:

Բացի այդ, կոճապղպեղը նաև թուլացնում է ցավի նյարդային ընկալիչների զգայունությունը՝ ազդելով նույնքան ուժեղ, որքան ասպիրինն ու իբուպրոֆենը: Ընդ որում՝ այն չի առաջացնում կողմնակի բարդություններ, ուստի՝ հրաշալի միջոց է երկարատև կիրառության համար:

Նյութի աղբյուրը՝ takprosto.cc