Ալկոհոլային որ ըմպելիքներն են օգտակար այս կամ այն հիվանդությունների դեպքում

Հաճախ որևէ քրոնիկ հիվանդության դեպքում մարդուն զգուշացնում են, որ ալկոհոլից հարկավոր է կտրականապես հրաժարվել, բայց ոչ բոլորն են հետևում այս խորհրդին: Սակայն հարկ է հիշել, որ ցանկացած դեպքում էլ կարելի է անել որոշ բացառություններ, քանի որ ալկոհոլը կարող է նաև օգտակար լինել:

Այս դեպքում առաջին հերթին անհրաժեշտ է որոշել չափաբաժինը, ինչն անչափ կարևոր է: Ինչպես հայտնել է գաստրոէնտերոլոգ Սվետլանա Կոսուրան՝ կա որոշաի չափաբաժին, որի սահմաններում ալկոհոլ օգտագործելու դեպքում այն քայքայվում է դեռ ստամոքսու՝ մինչ լյարդին, գլխուղեղին ու սրտին հասնելը: Այդպիսի անվտանգ չափաբաժին կարող է համարվել թունդ ոգելից խմիչքների (օղի, վիսկի, կոնյակ) 60 գրամը, գինու կամ շամպայնի 180-200 մլ-ը և բաց գույնի գարեջրի կես լիտրը: Սակայն անհրաժեշտ է չմոռանալ նաև, որ ալկոհոլային ըմպելիքը միայն սպիրտը չէ, այլ նաև ֆերմենտները, պեկտինները, ածխաջրերը և այլն, ուստի պետք է հստակ իմանալ, թե ինչ է կարելի խմել՝ օրգանիզմին չվնասելու համար:

Սրտի հիվանդություններով տառապողների համար օգտակար է չոր գինին (ցանկալի է կարմիր): Հայտնի է, որ խաղողի մուգ տեսակների մեջ պարունակվող ֆերմենտները տոնուս են հաղորդում անոթներին: Կարելի է նաև խմել մի բաժակ շամպայն, սակայն հարկավոր է նախապես բաց թողնել դրա պղպջակները: Առհասարակ սրտի հիվանդությունների դեպքում գազավորված ըմպելիքները օգտակար չեն:

Արյան գերճնշման դեպքում օգտակար կարող է լինել մի փոքր կոնյակը: Այն ազատում է անոթների սպազմից և բարելավում արյան հոսքը:

Իսկ հիպոտոնիայի դեպքում կոնյակը հակառակ ազդեցությունն է ունենում և ճնշումը կարող է էլ ավելի իջնել: Այս դեպքում ավելի օգտակար կլինի ռոմը (սակայն կոկտեյլի տեսքով) կամ 1-2 բաժակ գինին:

Շաքարային դիաբետով տառապողներին խորհուրդ է տրվում խմել միայն օղի, քանի որ միայն դա է համեմատաբար անվնաս: Քաղցր ըմպելիքները հարկավոր է բացառել, իսկ շամպայններից խմել միայն չորը: Գարեջրից նույնպես հարկավոր է հրաժարվել, քանի որ այն պարունակում է ածխաջրեր և առհասարակ վատ է ազդում ենթաստամոքսային գեղձի վրա:

Գաստրիտի ու խոցային հիվանդության ժամանակ շամպայնից հարկավոր է հրաժարվել, քանի որ ընդամենը 1-2 կումը բավական կլինի այրոցի առաջացման համար:

Նրանք, ովքեր տառապում են ալերգիաներից, պետք է խուսափեն անծանոթ կոկտեյլներից: Հարկավոր է հիշել, որ մաքուր ալկոհոլը ալերգիա չի առաջացնում, սակայն դրանք առաջանում են խառնուրդների դեպքում, իսկ ալկոհոլը էլ ավելի է վատացնում հիվանդի վիճակը:

Ամեն դեպքում՝ կան մարդիկ, որոնց ալկոհոլը կտրականապես արգելված է: Այդ մարդկանց շարքին են դասվում.

·        Բոլոր նրանք, ովքեր ընդունում են ալկոհոլի հետ անհամատեղելի դեղամիջոցներ, ուստի հարկավոր է նախապես խորհրդակցել բժշկի հետ՝ հետագայում բարդություններից խուսափելու համար:

·        Շաքարային դիաբետով տառապող այն հիվանդները, որոնց արյան մեջ շաքարի մակարդակը 10 մմոլ/լ-ից բարձր է, քանի որ այս դեպքում բարձր է օրգանիզմի անկանխատեսելի արձագանքի և նույնիսկ գիտակցության կորստի հավանականությունը:

·        Արտահայտված առիթմիաներով տառապողները:

·        Ինչպես նաև նրանք, ում մոտ բարձր է արյունահոսության վտանգը (ստամոքսի սուր խոցային հիվանդություն, միոմա և այլն):

Շամպայնն ամրապնդում է իմունային համակարգը

Չնայած, որ սրտաբաններն ու գաստրոէնտերոլոգները խորհուրդ չեն տալիս շամպայն օգտագործել, այնուամենայնիվ՝ այն ունի նաև բազմաթիվ օգտակար հատկություններ: Ածխաթթուն ու սպիտակ խաղողի ֆերմենտները բարելավում են թոքերի վենտիլյացիան (օդափոխում): Բացի այդ, այն պարունակում է մեծ քանակությամբ մագնեզիում, որն ազատում է հոգնածությունից և սելեն, որն էլ ամրապնդում է իմունային համակարգը:

Կա նաև մի հրաշալի հին ֆրանսիական մեթոդ, որն օգնում է բուժել նոր սկսվող մրսածությունը: Հարկավոր է պարզապես մի փոքր տաքացնել 100 գրամ շամպայնը, ավելացնել մի քիչ խնձորի հյութ ու մեղր և խմել ստացված խառնուրդը քնելուց առաջ:

Նյութի աղբյուրը՝ kp.ru