3 խորհուրդ՝ տեղեկատվությունն արագ ու երկար ժամանակով մտապահելու համար

Կան տարբեր հնարքներ, որոնք կօգնեն արագ կամ գրեթե վայրկենաբար մտապահել ցանկացած տեղեկատվություն: Ընդ որում՝ որպեսզի տեղեկատվությունը պահպանվի հիշողության մեջ, հարկավոր է այն անընդհատ կրկնել:

Գոյություն ունեն բազմաթիվ ուսումնասիրություններ, հիպոթեզեր ու եզրակացություններ այն մասին, թե որքան և ինչ հաճախականությամբ է հարկավոր կրկնել նյութն այն սովորելուց հետո, որպեսզի տեղեկատվությունը մտապահվի:

Ձեր ուշադրությանն ենք ներկայացնում դրանցից երեքը, որոնք կօգնեն ցանկացած տեղեկատվություն արագ ու երկար ժամանակով մտապահել:

1.    Ցանկացած տեղեկատվություն մտապահելուց հետո 96 ժամի ընթացքում հարկավոր է ինտնեսիվորեն կրկնել այն

Սա նշանակում է, որ սովորած նյութը պետք չէ մի կողմ դնել ևս 3-4 օր: Եթե երեկոյան մարդը սովորել է որևէ նյութ, ապա հաջորդ օրից սկսած պետք է ինտենսիվորեն կրկնի այն, որպեսզի ստացված տեղեկատվությունը երկար ժամանակով մտապահվի:

Ինտենսիվորեն կրկնելը նշանակում է, որ հարկավոր է օրական 3-4 անգամ կրկնել սովորած նյութը և այդ կրկնությունների միջև հնարավորինս կարճ ընդմիջումներ անել:

2.    Հարկավոր է ակտիվորեն կրկնել՝ առանց նյութից օգտվելու

Սովորած նյութը հարկավոր է կրկնել հիշելով: Փորձեք վերհիշել վիզուալ պատկերները և մյուս մնեմոնիկ հուշող բառեր, որոնք օգտագործվել են նյութը մտապահելիս:

Անհրաժեշտ է վերարտադրել պատկերներն ու բարձրաձայն կրկնել տեղեկատվությունը, իսկ այնուհետև համեմատել նյութի հետ: Եթե չի ստացվում վերարտադրել պատկերները, ապա պետք չէ տանջվել: Այդ դեպքում հարկավոր է նոր պատկեր մտապահել, բայց այս անգամ արդեն շատ ավելի վառ:

3.    Ամեն անգամ հարկավոր է նախորդից ավելի արագ կրկնել

Ամեն անգամ նյութը կրկնելիս անհրաժեշտ է ուշադրություն դարձնել, թե ինչ արագությամբ ու թեթևությամբ է դա ստացվում:

Օրինակ՝ եթե առաջին օրն առավոտյան նյութը հիշողությամբ վերարտադրելու համար պահանջվել է տաս րոպե, իսկ կեսօրին մի փոքր ավել, ապա հարկավոր է ուղղել այդ սխալը: Միակ միջոցն ավելի հաճախ կրկնելն ու մտապահելուն ավելի շատ ժամանակ հատկացնելն է:

Հարկ է նշել, որ այս կերպ կրկնելու դեպքում նյութը սովորելուց հետո 4-րդ օրն արդեն վիզուալ պատկերները, որոնք մարդն ինքն է ստեղծում տեղեկատվությունը մտապահելիս, պարզապես կանհետանան և դրանց անհրաժեշտությունն արդեն չի լինի:

Հարկ է նշել, որ մարդկանց հաճախ վախեցնում է այն փաստը, որ նյութը պետք է կրկնել 3-4 օր, քանի որ նրանք առաջին հերթին հիշում են դպրոցական տարիները: Սակայն այս դեպքում ամեն ինչ մի փոքր այլ է: 3-րդ կանոնի համաձայն ամեն անգամ նյութը կրկնելիս ավելի ու ավելի քիչ ժամանակ կպահանջվի, ուստի շատ շուտով տեղեկատվությունն արդեն ինքնաբերաբար կվերարտադրվի: Այս կերպ հնարավոր կլինի ցանկացած տեղեկատվություն մտապահել ամբողջ կյանքի ընթացքում:

Նյութի աղբյուրը՝ econet.ru