10 անչափ օգտակար մթերք՝ աչքերի առողջությունը պահպանելու համար

Առողջապահության համաշխարհային կազմակորպության (ԱՀԿ) տվյալներով՝ ամբող աշխարհում 285 մլն մարդ ունի տեսողության խանգարում, որոնցից 40 միլիոնը կույր են, իսկ ևս 246 միլիոնի տեսողությունը թույլ է: Ընդ որում՝ բժիշկների խոսքով՝ խնդիրների 80%-ի դեպքում հիվանդությունը կարելի է կանխարգելել կամ բուժել, մինչդեռ շատերն աչքաթող են անում:

Գիտնականները վստահ են, որ տեսողությունը բարելավելու և խնդիրները կանխելու համար դեղամիջոցների ընդունումը կամ հեռուստացույցից, համակարգչից ու գրքերից հրաժարվելը պարտադիր չէ: Պարզապես հարկավոր է կարգավորել սննդակարգն ու ընտրել ճիշտ մթերք:

Ձեր ուշադրությանն ենք ներկայացնում տեսողության համար ամենաօգտակար սննդամթերքը, որը կօգնի խուսափել բազմաթիվ խնդիրներից.

Կարմիր քաղցր պղպեղ (հում)

Պղպեղի այս տեսակը պարունակում է հսկայական քանակությամբ վիտամին C, ինչպես նաև աչքերի և անոթների համար շատ օգտակար A և E վիտամիններ: Գիտնականները ենթադրում են, որ պարբերաբար կարմիր պղպեղ օգտագործելու դեպքում կատարակտի առաջացման վտանգը զգալիորեն նվազում է: Սակայն հարկ է հիշել, որ ջերմային մշակման ենթարկվելու դեպքում վիտամին C-ն քայքայվում է, ուստի այն հարկավոր է օգտագործել հում վիճակում:

Արևածաղկի սերմեր և ընկուզեղեն

Մի բուռ արևածաղկի սերմերի կամ նուշի մեջ պարունակվում է վիտամին E-ի օրական չափաբաժնի կեսը, որը մյուս սննդարար նյութերի հետ համադրելու դեպքում կարող է դանդաղեցնել մակուլոդիստրոֆիայի զարգացումը: Բացի այդ, այս վիտամինը կանխում է նաև կատարակտը: Վիտամին E-ով հարուստ են նաև պնդուկը, գետնանուշն ու գետնանուշի յուղը:

Մուգ կանաչ տերևավոր բանջարեղեն

Կալե կաղամբը, սպանախը և մուգ կանաչ տերևավոր բանջարեղենի մյուս տեսակները C և E վիտամինների հարուստ աղբյուրը են: Դրանք պարունակում են նաև լյուտեին և զեակսանտին, որոնք վիտամին A-ի բուսական ձևն են և նվազեցնում են աչքերի հիվանդությունների առաջացման հավանականությունը:

Սաղմոն

Աչքերի առողջ ցանցաթաղանթ ունենալու համար անհրաժեշտ են օմեգա-3 ճարպաթթուներ, որոնք պարունակվում են ձկների ճարպոտ տեսակներում (սաղմոն, թունա, իշխան): Օմեգա-3 ճարպաթթուները պաշտպանում են աչքերը մակուլոդիստրոֆիայից ու գլաուկոմայից, իսկ դրանց պակասն առաջացնում «չոր աչքի» համախտանիշ:

Քաղցր կարտոֆիլ

Նարնջագույն մրգերն ու բանջարեղենը (քաղցր կարտոֆիլ, գազար, մանգո, ծիրան և այլն) պարունակում են մեծ քանակությամբ բետա-կարոտին, որը նույնպես վիտամին A-ի տեսակներից մեկն է: Շնորհիվ այս նյութի՝ աչքերն ընտելանում են մթությանը: Բացի այդ, մեկ քաղցր կարտոֆիլը պարունակում է վիտամին C-ի օրական չափաբաժնի կեսն ու մի փոքր վիտամին E:

Անյուղ միս և թռչնամիս

Ցինկը վիտամին A-ն լյարդից հասցնում է աչքի ցանցաթաղանթին, որտեղ էլ այն օգտագործվում է պաշտպանիչ պիգմենտի՝ մելանինի արտադրման համար: Ամենից շատ ցինկ պարունակող մթերքը ոստրեներն են, սակայն այն մեծ քանակությամբ պարունակվում է նաև տավարի մսի, խոզի մսի և թռչնամսի մեջ:

Լոբազգիներ

Սննդային մանրաթթելերով հարուստ ու ցածր կալորիականությամբ բուսական սննդի սիրահարներին խորհուրդ է տրվում սննդակարգում ներառել բակլազգիներ (լոբի, ոլոռ, սիսեռ, ոսպ):

Հավկիթ

Հավկիթը աչքերի համար անչափ օգտակար մթերք է: Դրանում պարունակվող ցինկն օգնում է օրգանիզմին յուրացնել դեղնուցում պարունակվող լյուտեինն ու զեակսանտինը: Այդ նյութերի դեղնանարնջագույն պիգմենտը պաշտպանում է աչքերը վնասակար ճառագայթումից:

Դդում

Մարդկային օրգանիզմը չի կարող արտադրել լյուտեին ու զեակսանտին, սակայն այդ օգտակար նյութերը մեծ քանակությամբ պարունակվում են դդմի տարբեր տեսակների մեջ: Բացի այդ, դդումը հարուստ է նաև A և C վիտամիններով, ցինկով և օմեգա-3 ճարպաթթուներով:

Բրոկոլի և բրյուսելյան կաղամբ

Բանջարեղենի այս տեսակները պարունակում են մի շարք սննդարար նյութեր` վիտամին A (լյուտեինի, զեակսանտինի և բետա-կարոտինի տեսքով), վիտամին C և վիտամին E, որոնք հիանալի հակաօքսիդանտներ են և պաշտպանում են աչքերը (հատկապես՝ ցանցաթաղանթը) ազատ ռադիկալների վնասակար ազդեցությունից:

Նյութի աղբյուրը՝ gogetnews.info