Բազմաֆունկցիոնալ բուժիչ խոտաբույս. խատուտիկի ամենաօգտակար հատկություններն ու 6 բուժիչ բաղադրատոմս

Խատուտիկը հաճախ համարվում է մոլախոտ, սակայն այս բույսն անչափ օգտակար է և օգնում է առողջական մի շարք խնդիրների դեպքում: Շատ երկրներում նույնիսկ գոյություն ունեն խատուտիկի պլանտացիաներ, որոնցից ստացված բերքը հետագայում օգտագործվում է բուժիչ ու կոսմետոլոգիական նպատակներով:

Takprosto.cc-ն ներկայացրել է խատուտիկի բոլոր օգտակար հատկությունները և դրանից ստացվող բուժիչ պատրաստուկները:

Խատուտիկի օգտակար հատկությունները

·         Բուժում է հոդերն ու ամոքում վերքերը:

·         Օգտակար է մարսողության համար (կարգավորում է ախորժակն ու բարելավում նյութափոխանակությունը):

·         Օգտակար է նյարդային համակարգի համար (տոնուս է հաղորդում և խթանում է նյարդային համակարգի աշխատանքը): Ուժերի պակասի, քրոնիկ հոգնածության կամ նյարդային գերլարվածության դեպքում հիանալի միջոց է խատուտիկը:

·         Մաքրում է օրգանիզմը թույներից ու տոքսիններից, ինչպես նաև ազատում է դեղորայքի օգտագործման հետևանքներից:

·         Խատուտիկն օժտված է լեղամուղ, հակահելմինտային և թույլ լուծողական հատկություններով:

·         Այս բույսը նաև հարուստ է վիտամիններով ու հանքանյութերով (պղինձ, երկաթ, կալիում,մագնեզիում, նատրիում,մանգան, A, C, ինչպես նաև B խմբի վիտամիններ):

·         Խատուտիկը հարթեցնում է մաշկը, բարելավում է դեմքի գույնն ու ազատում պեպեններից:

Խատուտիկով պատրաստված բուժիչ միջոցներ

Սակավարյունության դեպքում

3 ճ.գ. խատուտիկի ծաղիկները, 3 ճ.գ. մեղվախոտը, 2 ճ.գ. եղինջը և 1 ճ.գ. օշինդրը խառնել, ավելացնել 1 լիտր եռման ջուր, թրմել և ընդունել ստացված թուրմն օրական 6 անգամ՝ 50 գրամ:

Փորկապության ու փորափքանքի դեպքում

1 թ.գ. խատուտիկի ծաղիկներին ավելացնել մի բաժակ ջուր և եռացնել թույլ կրակի վրա մոտ 15 րոպե, այնուհետև թրմել կես ժամ: Ընդունել օրական 3-4 անգամ՝ 1 ճ.գ.:

Հորմոնալ խանգարման դեպքում

3 լիտրանոց տարրայի մեջ լցնել խատուտիկի ծաղիկներ, ավելացնել 1 կգ շաքարավազ, խառնել, 3 շաբաթ թրմել պատուհանագոգին և քամել: Ստացված էլիքսիրը հարկավոր է շաքարավազի փոխարեն ավելացնել թեյին (1-2 ճ.գ.):

Մաշկային հիվանդությունների դեպքում

1 ճ.գ. խատուտիկի մանրացրած արմատներին ավելացնել մի բաժակ տաք ջուր, 15 րոպե եռացնել թույլ կրակի վրա, սառեցնել ու քամել: Թուրմը հարկավոր է ընդունել գոլ վիճակում օրական 3 անգամ (ուտելուց առաջ)1/3 բաժակ:

Դիմակ վարսերի համար

1 ճ.գ. մանրացրած թարմ խատուտիկի տերևները թրմել 200 մլ եռման ջրում և ստացված թուրմը քսել գլխամաշկին ու մազերին: Գլուխը փաթաթել սրբիչով, թողնել 30 րոպե և լվանալ գլուխը: Այս դիմակն օգնում է ամրացնել վարսերը՝ դարձնելով դրանք ավելի առողջ:

Խատուտիկի մուրաբա

500 հատ խատուտիկի բողբոջները լավ լվանալ և մեկ օր թրջել սառը ջրում (դառնությունից ազատվելու համար ցանկալի է մի քանի անգամ փոխել ջուրը): Մեկ օր անց այդ ջուրը քամել, բողբոջներին ավելացնել 1 լիտր սառը ջուր և 10 րոպե եռացնել: Եփել թույլ կրակի վրա մոտ մեկ ժամ, այնուհետև սառեցնել և լցնել տարրաների մեջ:

Այս մուրաբան ազդում է որպես ջերմիջեցնող միջոց: Իմունային համակարգի ամրապնդման համար կարելի է այն քսել հացին և մատուցել որպես աղանդեր հատապտուղների կամ նրբաբլիթի հետ: Իր համով այն նման է մեղրին: