Արդյունավետ ժողովրդական միջոցներ՝ աչքերի շուրջն առաջացող կնճիռներից ազատվելու համար

Աչքերի շուրջը մաշկը շատ նուրբ է, ուստի ցանկացած անբարենպաստ պայման կարող է նպաստել կնճիռների առաջացմանը: Սակայն կան բնական միջոցներ, որոնք կօգնեն զգալիորեն հարթեցնել կնճիռները և կկանխեն նորերի առաջացումը: Ձեր ուշադրությանն ենք ներկայացնում դրանցից մի քանիսը:

1.      Աչքերի շուրջը գտնվող մաշկը խոնավեցնելու համար կարելի է մաշկին ձվի դեղնուց քսել, թողնել 15-20 րոպե, այնուհետև լվացվել գոլ ջրով: Եթե մաշկը պատված է կնճիռներով, ապա հարկավոր է ձվի դեղնուցին ավելացնել նույն քանակությամբ բուսական յուղ:

2.      Մաշկը հարթեցնող հիանալի միջոց է նաև հացի խմորով դիմակը: Հարկավոր է սպիտակ հացի փափուկ խմորը թրջել մի փոքր տաքացրած բուսայուղով կամ կարագով, ստացված խյուսը դնել ստերին կոպերին և 20-25 րոպե անց լվացվել գոլ ջրով:

3.      Առհասարակ կարագն ու բուսական յուղերը հիանալի միջոց են կնճիռներից ազատվելու համար: Օրինակ՝ կարագը կարելի է օգտագործել որպես գիշերային քսուք:

4.      Աչքերի շուրջն առաջացած կնճիռներից ազատվելու համար կարելի է պատրաստել շատ արդյունավետ սնուցող դիմակ: Հարկավոր է 1 ճաշի գդալ ձվի դեղնուցին ավելացնել կես թեյի գդալ հալած մեղր և 1 թեյի գդալ վարսակի ալյուր, լավ խառնել, քսել աչքերի տակ գտնվող մաշկին, իսկ 10 րոպե անց լվացվել գոլ ջրով: Եթե խառնուրդը շատ թանձր լինի, ապա կարելի է ավելացնել նաև դեղնուցի մյուս մասը կամ մի փոքր գոլ կաթ:

5.      Շատ արդյունավետ միջոց է նաև կաթնաշոռով դիմակը: Հարկավոր է կես ճաշի գդալ յուղոտ կաթնաշոռը, կես թեյի գդալ հալած մեղրը, 1 թեյի գդալ բուսայուղը, 1 թ.գ. յուղոտ սերուցքը և 1 ճ.գ. տաք կաթը լավ խառնել, ստացված զանգվածը 10-15 րոպե դնել կոպերին, այնուհետև լվացվել գոլ ջրով:

6.      Կոպերի մաշկը խոնավեցնելու և կնճիռներից ազատվելու համար հարկավոր է 1 ձվի դեղնուցին ավելացնել 1 թեյի գդալ մեղր (նախապես հալեցնել), 1 թ.գ. յուղոտ թթվասեր, 1 թ.գ. բուսայուղ և 2 թ.գ. գոլ կաթ, ստացված զանգվածը լավ խառնել, քսել մաշկին, իսկ 10-15 րոպե հետո սրբել դիմակը գոլ կաթով թրջված բամբակով:

7.      Շատ օգտակար է նաև բանանով դիմակը: Հարկավոր է 1 ճաշի գդալ հասած բանանը տրորել, ավելացնել նույնքան հալած կարագ, լավ խառնել և ստացված զանգվածը քսել ստորին կոպերին՝ մատների ծայրերով մի փոքր մերսելով մաշկը: Թողնել 20-25 րոպե, այնուհետև լվացվել գոլ ջրով:

8.      Կես թեյի գդալ մանրացրած վարսակի փաթիլներին ավելացնել քիչ քանակությամբ տաք կաթ կամ յուղոտ սերուցք և, երբ վարսակը մի փոքր ուռի, գոլ դիմակը քսել կոպերին, իսկ 20 րոպե անց լվանալ սենյակային ջերմաստիճանի ջրով: Այս դիմակը շատ հարմար է ծերացող մաշկի համար և արդյունավետ կերպով հարթեցնում է մաշկը:

9.      Կարելի է նաև պատրաստել վիտամինային դիմակ, որը հիանալի սնուցում է մաշկը: Հարկավոր է ծիրանը կեղևազրկել, լավ տրորել, այնուհետև ստացված խյուսի 1 ճ.գ.-ին ավելացնել 1 թ.գ. բուսայուղ կամ թթվասեր, լավ խառնել և քսել ստորին կոպերին: Թողնել 15-20 րոպե, այնուհետև լվանալ գոլ ջրով:

10.  Նաև կարելի է 1 թեյի գդալ կտավատի սերմերին ավելացնել կես բաժակ սառը ջուր, եռացնել և եփել մինչև դառնա թանձր զանգված: Այնուհետև ստացված զանգվածը քամել, քսել այն մաշկին և 25 րոպե անց լվացվել նախ գոլ, այնուհետև սառը ջրով:

Նյութի աղբյուրը՝ fithacker.ru