Հիվանդությունների 66%-ից կարելի է խուսափել՝ ճիշտ սննդամթերք ընտրելով. երկարակեցության գաղտնիքը հայտնի գենետիկից

Բուլղարացի գենետիկ Հրիստո Մերմերսկին վստահեցնում է, որ սխալ մթերք օգտագործելով մարդիկ իրենք են մոտեցնում իրենց վախճանը:

Առհասարակ՝ շատ գիտնականներ վստահ են, որ ծերությունը հիվանդություն է, որը մարդիկ ձեռք են բերում սխալ սննդամթերք օգտագործելու պատճառով: Ծերացման գործընթացն արգելկելու համար բավական է ընդամենը կարգավորել սննդակարգը, խուսափել ավելորդություններից և ամեն ինչ չափավոր օգտագործել: Ծերացման գործընթացը դանդաղեցնող սննդամթերքից պրոֆեսոր Մերմերսկին առանձնացրել է բանջարեղենը, մրգերը, յոգուրտը, կաթն ու գինի:

Նրա հավաստմամաբ՝ լավագույն մթերքը բուլղարական բակտերիալ ցուպիկի օգնությամբ պատրաստված բնական յոգուրտն է, որը շատ դյուրամարս սնունդ է: Այն կանխում է ստամոքսի և հաստ աղիքի քաղցկեղը, ինչպես նաև օստեոպորոզի զարգացումը:

Օրգանիզմը մաքրելու և ավելորդ քաշից ազատվելու համար կա մի շատ համեղ աղանդերի բաղադրատոմս: Հարկավոր է 500 գրամ բնական յոգուրտին ավելացնել 1 ճ.գ. մեղր, 1 ճ.գ. խնձորի քացախ, 1 թ.գ. դարչին և 40 կաթիլ ակնամոմի 30%-անոց թուրմ:

Այս աղանդերին կարելի է ավելացնել նաև մի բուռ կապույտ հապալաս, մրտենական հապալաս, հունական ընկույզ կամ ¼ բանան: Աղանդերը կարելի է ուտել նախաճաշին կամ ընթրիքին: 20 օր շարունակ օրվա ընթացքում 2 ժամը մեկ այս աղանդերից 2 գդալ ուտելու դեպքում կարելի է ոչ միայն ազատվել ավելորդ քաշից, այլև բարելավել վարսերի և առհասարակ ամբողջ օրգանիզմի վիճակը:

Գեղեցկության պահպանմանը նպաստող լավագույն վիտամինները կարելի է ստանալ գազարով ու սխտորով աղցանից: Առհասարակ՝ սխտորն անչափ կարևոր մթերք է, որի օգտակար հատկությունների մասին են վկայում բազմաթիվ ուսումնասիրությունների ու գիտափորձերի արդյունքները: Այն նույնիսկ ոչնչացնում է ախտածին մանրէներն ու բակտերիաները:

Նմանատիպ հատկություններով է օժտված նաև ակնամոմը: Այն ոչնչացնում է գրիպի վիրուսը, պայքարում է գաստրիտի, կոլիտի ու դիսբակտերիոզի դեմ և օժտված է հիանալի համաքաղցկեղային հատկություններով: Ընդ որում՝ առողջական վիճակը բարելավելու համար բավական է ընդամենը օրական երկու անգամ խմել 20-30 կաթիլ ակնամոմով ջուր (50 մլ):

Բացի այդ, առողջ ու գեղեցիկ մազեր, եղունգներ ու մաշկ ունենալու համար կարելի է ապակյա տարրայի մեջ խառնել հավասար քանակությամբ մեղր, հունական ընկույզ, ծիրանաչիր, չամիչ ու կիտրոն և ստացված խառնուրն ընդունել օրական 3 գդալ:

Սակայն հարկ է հիշել նաև, որ սննդամթերքը ներկայում հարուստ է լինում նաև բազմաթիվ թունավոր նյութերով: Ամբողջ աշխարհում ստեղծվել է ավելի քան 200 քիմիական նյութ, որոնք մթերքին հաճելի բույր ու տեսք են հաղորդում: Ընդ որում՝ այդ նյութերի մեծ չափաբաժինը կարող է հանգեցնել նույնիսկ մահվան:

Սա է պատճառը, որ որևէ բան գնելիս հարկավոր է շատ ուշադիր կարդալ դրա փաթեթավորման վրա ամենամանր տառատեսակով գրված տեքստը, քանի որ հենց այդտեղ են նշված լինում մթերքում պարունակվող վնասակար նյութերը:

Օրինակ՝ նատրիումի նիտրատն ու նիտրիտն ամենատարածված սինթետիկ նյութերն են, որոնք օգտագործվում են մսի թարմությունը պահպանելու և պահածոներում բոտուլիզմի առաջացումը կանխելու համար: Սակայն այս նյութերը կործանարար ազդեցություն են ունենում մարդու առողջության ու երիտասարդության վրա:

Չիպսերի և աղցանների թարմությունը երկար պահպանելու համար խիստ վտանգավոր նյութեր են ավելացվում նաև դրանց պատրաստման համար կիրառվող յուղերին: Այդ նյութերն ավելացվում են նաև տորթերին, մաստակին ու մակարոնեղենին: Սա այն մթերքն է, որ սիրում է երեխաների մեծ մասը, սակայն դրանք առաջացնում են տարատեսակ ալերգիաներ և նույնիսկ քաղցկեղ:

Երեխաների համար պակաս վտանգավոր չեն նաև պատրաստի հյութերը, որոնց թարմությունը պահպանելու համար օգտագործվում են մարդկային օրգանիզմի համար թունավոր յուղեր:

Շատ մեծ նշանակություն ունի նաև շաքարավազի և աղի գործածությունը: Դեռ 20-րդ դարի սկզբին մարդիկ 5 անգամ ավելի քիչ շաքարավազ էին օգտագործում, քան ներկայում: Շաքարավազը մարդկության «սպիտակ անեծքն» է: Այն կործանարար ազդեցություն է ունենում սրտի, թոքերի, երիկամների և ստամոքսի վրա: Ընդ որում՝շաքարավազը հսկայական քանակությամբ պարունակվում է շատերի կողմից սիրված գազավորված ըմպելիքների և լիմոնադների մեջ:

Ոչ պակաս վտանգավոր է նաև աղը: Օրինակ՝ զարկերակային բարձր ճնշումից տառապողները նույնիսկ գլխի չեն ընկնում, որ իրենց հիվանդության հիմնական պատճառը օգտագործվող աղի մեծ քանակությունն է: Հատկապես վտանգավոր է դատարկ ստամոքսին չիպս, պոպկորն կամ աղի ընկույզներ ուտելը:

Երկարակեցության գաղտնիքներ.

·        Մարդը չպետք է օգտագործի ավելի շատ կալորիա, քան կարող է վատնել:

·         Ամեն օր հարկավոր է մեկ հատ խնձոր ուտել:

·        Պետք է խմել սառեցրած ու հալեցրած ջուր, ինչպես նաև խոտաբույսերի թուրմեր:

·        Հարկավոր է ավելի ակտիվ աշխատել:

·        Ամեն օր անհրաժեշտ է ցնցուղ ընդունել:

·        Ննջասենյակում օդի ջերմաստիճանը պետք է ցածր լինի:

·        Հանգստյան օրերին անհրաժեշտ է 10-15 կմ զբոսնել (քայլել կամ հեծանիվ վարել):

·        Մարդը պետք է շրջապատված լինի ընկերներով, ուրախանա, ժպտա և չհրաժարվի սեքսից:

·        Բացի այդ, մարդը ոչ մի դեպքում չպետք է մտածի կամ խոսի իր ծերանալու մասին:

Նյութի աղբյուրը՝ mistresshealth.ru