Որոնք են քաղցկեղի վաղ փուլերի հիմնական ախտանշանները

Քաղցկեղը շատ տարածված հիվանդություն է, որն ամեն տարի հազարավոր կյանքեր է խլում: Սա պայմանավորված է նրանով, որ շատերը ժամանակին բուժզննում չեն անցնում և հիվանդությունը չափազանց ուշ է հայտնաբերվում: Բժիշկների հավաստմամբ՝ քաղցկեղը վաղ փուլերում հայտնաբերելու դեպքում բուժման հավանականությունն 95% է:

Ժամանակին քաղցկեղն ախտորոշելու համար հարկավոր է ավելի ուշադիր լինել սեփական օրգանիզմի հանդեպ: Գոյություն ունեն ախտանշաններ, որոնք կարող են վկայել քաղցկեղի մասին: Այս ախտանշանների առկայության դեպքում հարկավոր է շտապ բուժզննում անցնել և անհրաժեշտության դեպքում սկսել բուժման կուրսը:

Ձեր ուշադրությանն ենք ներկայացնում քաղցկեղի վաղ փուլերի հիմնական ախտանշանները.

Փորափքանք (կանանց մոտ)

Ձվարանների քաղցկեղի դեպքում կանանց հաճախ անհանգստացնում է փորափքանքը, ուստի հաճախակի առաջացող փորափքանքի դեպքում խորհուրդ է տրվում գինեկոլոգիական բուժզննում անցնել:

Անկանոն արյունահոսություններ (կանանց մոտ)

Դաշտանով չպայմանավորված կամ դաշտանադադարից հետո նկատվող արյունահոսությունը (նույնիսկ մեկ կաթիլ արյունը) կարող է պայմանավորված լինել ինչպես օնկոլոգիական հիվանդությամբ, այնպես էլ մեկ այլ վտանգավոր հիվանդությամբ՝ էնդոմետրիոզով:

Ցավ որովայնի և փոքր կոնքի հատվածում

Փոքր կոնքի հատվածում առաջացող ցավերը վկայում են ձվարանների հետ կապված խնդիրների մասին, ուստի անհրաժեշտ է անմիջապես խորհրդակցել բժշկի հետ:

Մեջքի մշտական ցավեր (տղամարդկանց մոտ)

Զարմանալի է, սակայն տղամարդկանց մոտ շագանակագեղձի քաղցկեղն ու հաստ աղիքի քաղցկեղը գրեթե միշտ ուղեկցվում են մեջքի կայուն ցավերով: Իհարկե այս ցավերը կարող են պայմանավորված լինել շատ այլ խնդիրներով, սակայն բուժզննումն, ամեն դեպքում, պարտադիր է:

Փոփոխություններ տղամարդկանց ամորձիներում

Ամորձիների քաղցկեղից խուսափելու լավագույն միջոցը պարբերաբար բուժզննում անցնելն է: Հարկավոր է շատ ուշադիր լինել և խորհրդակցել մասնագետի հետ ամորձիների գույնի, ձևի կամ տեղի ցանկացած փոփոխության դեպքում:

Ցավ աճուկի և ազդրերի հատվածում (տղամարդկանց մոտ)

Տղամարդկանց մոտ աճուկի կամ ազդրերի հատվածի քրոնիկ ցավն ու այտուցվածությունը կարող է վկայել շագանակագեղձի կամ ամորձիների քաղցկեղի մասին:

Շարունակական հազ

Ավանդական մեթոդներով չբուժվող երկարատև հազի դեպքում հարկավոր է անմիջապես բուժզննում անցնել: Սա շատ վտանգավոր ախտանշան է, քանի որ նույնիսկ, եթե այն պայմանավորված չէ օնկոլոգիական հիվանդությամբ, կարող է լինել տուբերկուլյոզի ախտանշան:

Քաշի կտրուկ կորուստ

Քաշի անհասկանալի կորստի դեպքում հարկավոր է ստուգել վահանաձև գեղձը քանի որ դա կարող է պայմանավորված լինել հորմոնալ դիսբալանսով: Սակայն այս ախտանշանը կարող է վկայել նաև որոշ օրգանների, մասնավորապես՝ թոքերի, ենթաստամոքսային գեղձի, ստամոքսի, կերակրափողի քաղցկեղի մասին:

Փոփոխություններ կրծքի հատվածում (և՛ կանանց, և՛ տղամարդկանց մոտ)

Քչերը գիտեն, որ կրծքի քաղցկեղը կարող է առաջանալ ոչ միայն կանանց, այլև տղամարդկանց մոտ (1%), ուստի ուռուցքաբանները նշում են, որ կրծքի հատվածում ցանկացած փոփոխության դեպքում հարկավոր է խորհրդակցել բժշկի հետ:

Փոփոխություններ ավշային հանգույցներում

Ավշային համակարգն օրգանիզմի հայելին է: Նույնիսկ հասարակ մրսածությունը կարող է հանգեցնել ավշային հանգույցների մեծացման: Սակայն եթե ուռածությունը չի անհետանում մեկ ամսվա ընթացքում, ապա հարկավոր է անմիջապես արյան անալիզ հանձնել:

Մաշկային փոփոխություններ

Քաղցկեղի ամենավտանգավոր տեսակներից մեկը մաշկի քաղցկեղն է: Բանն այն է, որ մեծ մասամբ մարդիկ բժշկի են դիմում, երբ արդեն չափազանց ուշ է լինում: Սա է պատճառը, որ հարկավոր է շատ ուշադիր լինել և պարբերաբար ստուգել մաշկի և հատկապես խալերի վիճակը: Ցանկացած փոփոխության դեպքում հարկավոր է խորհրդակցել բժշկի հետ:

Փոփոխություններ բերանի խոռոչում

Ցանկացած խոց, բերանի խոռոչի լորձաթաղանթի կամ լեզվի վրա առաջացած սպիտակ կետ կամ որևէ այլ փոփոխություն կարող է վկայել նախաքաղցկեղային վիճակի մասին:

Անբացատրելի քրոնիկ հոգնածություն

Այս դեպքում խոսքն առանց որևէ պատճառի հոգնածության զգացողության ու ինքնազգացողության վատացման մասին է: Հարկ է հիշել, որ քրոնիկ հոգնածությունը կարող է լինեն լեյկիմիայի առաջին ախտանշաններից մեկը, ուստի անհրաժեշտ է շատ ուշադիր լինել:

Նյութի աղբյուրը՝ takprosto.cc