Տարրեր, որոնց պակասը կարող է դառնալ միգրենի առաջացման պատճառ

Գլխացավերը կարող են լինել տարբեր հիվանդությունների ախտանշան, սակայն կա գլխացավի մի տեսակ՝ միգրենը, որը պարզապես անտանելի է: Միգրենը ծանոթ է մոլորակի յուրաքանչյուր 6-րդ բնակչին: Միգրենի ժամանակ, որպես կանոն, ցավը կենտրոնանում է գլխուղեղի միայն մի կիսագնդում: Այս հիվանդությունն ավելի հաճախ հանդիպում է էմոցիոնալ և հաճախ սթրեսի ենթարկվող մարդկանց մոտ:

Գլխացավի պատճառները

Միգրենի հանդեպ հակվածությունը կարող է պայմանավորված լինել ժառանգականությամբ, սեռով (ավելի հաճախ հանդիպում է կանանց շրջանում), սխալ կենսակերպով, ինչպես նաև հոգեհուզական ֆոնով: Նաև շատ մեծ նշանակություն ունի հիվանդի տարիքը: Սովորաբար այս հիվանդությունն ի հայտ է գալիս երիտասարդների մոտ, իսկ հետագայում պարզապես անհետանում է:

Սննդակարգն անչափ մեծ դեր է խաղում միգրենի նոպաների ի հայտ գալու հարցում: Ապացուցված է, որ օրգանիզմում մի շարք տարրերի պակասը կարող է դառնալ 4 անգամ ավելի հաճախ գլխացավերի առաջացման պառճառ: Ձեր ուշադրությանն ենք ներկայացնում 4 խմբի տարրեր, որոնց պակասն օրգանիզմումն կարող է նպաստել միգրենի առաջացմանը:

Ֆոլաթթու և վիտամին B12

Այս տարրերի պակասի հետևանքով մարդիկ դառնում են չափազանց դյուրագրգիռ ու ցրված: Բացի այդ, նման մարդկիկ հաճախ են սթրեսների ենթարկվում: Հետաքրքիր է, որ մարդիկ գլխացավերը մեղմելու համար հաճախ ընդունում են ասպիրին պարունակող դեղամիջոցներ, մինչդեռ ասպիրինն էլ ավելի է նվազեցնում օրգանիզմում ֆոլաթթվի և վիտամին B12-ի մակարդակը:

Ֆոլաթթվով ամենահարուստ մթերքը սպանախն է: Բացի այդ, այս տարրը մեծ քանակությամբ պարունակվում է նաև բրոկոլիի, ծնեբեկի, ավոկադոյի, ճակնդեղի, գազարի և դդմի բաղադրության մեջ: Վիտամին B12-ի հարուստ աղբյուր է հավկիթը:

Պղինձ և երկաթ

Պղնձի և երկաթի պակասն ավելի հաճախ հանդիպում է կանանց մոտ և կարող է հանգեցնել անեմիայի (սակավարյունություն) ու միգրենի առաջացման, ինչպես նաև արյան ճնշման իջեցման ու տրամադրության անկման: Պղնձով հարուստ են լոբին, ընկուզեղենը, այծի պանիրը, ավոկադոն: Երկաթի պաշարը կարելի է հարստացնել՝ պարբերաբար կանաչեղեն, հազարի թերթիկներ, արևածաղկի սերմեր, քունջութ, լյարդ և լամինարիա ուտելով:

Վիտամին В6

Այս վիտամինի պակասն անոթների հիվանդությունների առաջացման հիմնական պատճառներից մեկն է: Վիտամին B6-ով հարուստ սննդամթերք է լոբին, լյարդը, ինչպես նաև հատիկավորները, ուստի գլխուղեղի, սրտամկանի, անոթների և նյարդային համակարգի առողջությունը պահպանելու համար հարկավոր է սննդակարգը հարստացնել սննդամթերքի նշված տեսակներով:

Վիտամին D

Այս տարրը բնական ճանապարհով արտադրվում է մարդու օրգանիզմում արևի ճառագայթների ազդեցության ներքո, սակայն ձմռանն այն կարելի է ստանալ սննդի միջոցով: Վիտամին D-ով հարուստ են ձուն, լոբին, լյարդը, ծովամթերքն ու կաթնամթերքը:

Հարկ է նաև հիշել, որ լիարժեք սնունդը, սպորտն ու մաքուր օդին հաճախ զբոսնելը կարող են օգնել զգալիորեն նվազեցնել միգրենների հաճախականությունն ու ուժգնությունը, իսկ սթրեսից ազատվելու և հանգստանալու համար շատ արդյունավետ միջոց է արոմաթերապիան:

Նյութի աղբյուրը՝ takprosto.cc