Աղիների ցավեր, միգրեն, մաշկի ցան ու քոր և ևս 4 տարածված ախտանշան, որոնք կարող են պայմանավորված լինել այս հիվանդությամբ

Ցելիակիան աուտոիմունային հիվանդություն է, որն առաջանում է գլյուտենի անընդունալիության հետևանքով: Այս սպիտակուցը պարունակվում է բազմաթիվ հացահատիկների բաղադրության մեջ (ցորեն, գարի, վարսակ, տարեկան): Գլուտենը պարունակվում է մակարոնեղենի և հացաբուլկեղենի գրեթե բոլոր տեսակների մեջ:

Ցելիակիայի հետևանքով բորբոքվում են աղիները, խանգարվում է դրանց ներծծման գործառույթը, ինչի պատճառով առաջանում են առողջական այլ խնդիրներ: Այս հիվանդությունը հաճախ նույնացնում են սննդային ալերգիայի հետ, սակայն, չնայած, որ գլյուտենը ալերգեն է և կարող է ալերգիա առաջացնել, այս հիվանդությունների մեխանիզմները տարբեր են լինում:

Ցելիակիայի ախտանշանները

Գլուտենի անընդունելիությունը հաճախ մնում է չախտորոշված և հիվանդն ազատվում է միայն դրա ախտանշաններից, մինչդեռ հիվանդությունը շարունակում է քայքայել օրգանիզմը: Ձեր ուշադրությանն ենք ներկայացնում ցելիակիայի հիմնական ախտանշանները:

1.    Աղիների ցավեր

Մարսողական գործընթացների խանգարումը գլյուտենի անընդունելիության ամենաակնհայտ ախտանշանն է: Գլյուտեն պարունակող սննդամթերք ընդունելուց հետո հիվանդի մոտ առաջանում է փորափքանք, փորլուծություն կամ փորկապություն:

2.    Գլխապտույտ

Ցելիակիայի դեպքում բարակ աղիքը չի կարողանում ամբողջությամբ ներծծել արժեքավոր միկրոտարրերն ու վիտամինները և հիվանդի մոտ հաճախ նկատվում է թուլություն, գլխապտույտ ու ապակողմնորոշվածություն:

3.    Տրամադրության տատանումներ

Հիվանդները հաճախ առանց պատճառի դառնում են նյարդային, անհանգիստ ու ճնշված, ինչը զարմանալի չէ, քանի որ աղիների հետ կապված մշտական խնդիրները ոչ մեկին չեն ուրախացնի:

4.    Միգրեն

Սա շատ տարածված ախտանշան է: Սովորաբար միգրենի նոպաներն ի հայտ են գալիս ուտելուց 30-60 րոպե անց:

5.    Մաշկի ցան ու քոր

Եթե աղիները չեն կարողանում նորմալ ընդունել գլյուտենը, դա անմիջապես ի հայտ է գալիս մաշկային ցանի տեսքով: Իմունային համակարգն արձագանքում է մարսողական համակարգի դիսֆունկցիային՝ արտադրելով հակամարմիններ, որոնք կարող են առաջացնել մաշկի չորություն ու քոր:

6.    Քրոնիկ հոգնածություն

8-9 ժամ քնելն ու այնուամենայնիվ հոգնածության զգացումով արթնանալը բավական լուրջ նշան է: Սա նշանակում է, որ օրգանիզմը բոլոր ուժերը վատնում է իր համար վնասակար սպիտակուցը վերամշակելու և դուրս բերելու վրա:

7.    Կաթնաշաքարի (լակտոզա) նկատմամբ անհանդուրժողականություն

Կաթնաշաքարի նկատմամբ անհանդուրժողականության ախտանշանները նման են ցելիակիայի ախտանշաններին: Եթե հիվանդի մոտ հայտնաբերվել է կաթնաշաքարի նկատմամբ անհանդուրժողականություն, ապա հարկավոր է բուժզննում անցնել և հանձնել գլյուտենի անընդունելիությունը ստուգելու համար անհրաժեշտ անալիզները, քանի որ այս երկու խանգարումները հաճախ համատեղվում են:

Ցելիակիայի բուժման միակ մեթոդը գլյուտենից զուրկ խիստ դիետան է, որի դեպքում չի կարելի օգտագործել ցորեն, տարեկան, վարսակ կամ գարի: Բացի այդ, հարկավոր է կարգավորել սննդակարգը, որպեսզի օրգանիզմը ստանա անհրաժեշտ բոլոր վիտամիններն ու հանքանյութերը: Խորացված ու բարդություններով դեպքերի համար հարկավոր է նաև դեղորայքային բուժում:

Նյութի աղբյուրը՝ takprosto.cc