Որոնք են մարդու ռուդիմենտար օրգաններն ու դրանց նշանակությունը

Մարդկային օրգանիզմում կան այնպիսի օրգաններ, որոնք էվոլյուցիոն զարգացման արդյունքում կորցրել են իրենց անհրաժեշտությունը: Դրանք ռուդիմենտար օրգաններն են (մնացուկային օրգաններ) և չնայած, որ դրանց մեծ մասն այլևս կարևոր նշանակություն չունեն և պետք չեն, միևնույն է շարունակում են կատարել մարդու համար շատ օգտակար գործառույթներ:

Ձեր ուշադրությանն ենք ներկայացնում մարդու ռուդիմենտար օրգանները և դրանց նշանակությունը:

Պոչուկ

Սա իրական պոչ է, որը ժամանակին համարվում էր հավասարակշռությունը պահպանելու և սոցիալական ազդանշաններ հաղորդելու օրգան: Այնուամենայնիվ՝ այս ռուդիմենտար օրգանը շատ մեծ նշանակություն ունի նաև ներկայում, քանի որ դրա առաջնային հատվածները հարկավոր են փոքր կոնքի մկաններն ու ջղերն կապելու համար:

Պոչուկը կապում է նաև նստատեղի այն մկանները, որոնք պատասխանատու են ազդրերի շարժումների համար: Բացի այդ, այն օգնում է հավասարաչափ բաշխել ծանրաբեռնվածությունը կոնքի վրա: Հաճախ այս հատվածում պահպանվում է պոչուկային ելուստը, սակայն, բարեբախտաբար, այն կարելի է հեռացնել շատ պարզ ու անվտանգ վիրահատության միջոցով:

Իմաստության ատամներ

Վիճակագրական տվյալներով՝ ներկայում շատ երեխաներ արդեն իսկ ծնվում են առանց ութերորդ ատամի: Ժամանակին, երբ մարդը կոշտ սնունդ էր օգտագործում, նրա ծնոտն ավելի մեծ էր, իսկ իմաստության ատամները անհրաժեշտ էին, քանի որ օգնում էին ավելի լավ ծամել սնունդը: Ներկայում սնունդը ջերմային մշակում է անցնում, ինչի շնորհիվ ծնոտը փոքրացել է և իմաստության ատամների համար այլևս բավականաչափ տեղ չկա:

Ներկայում դրանք կարող են սխալ աճել և խանգարել մյուս ատամներին: Բացի այդ, այս ատամները մյուսներից շուտ են ախտահարվում, և շատ հաճախ մարդիկ առաջինը հենց դրանցից են ազատվում: Սակայն առողջ իմաստության ատամներ ունենալու դեպքում մասնագետները խորհուրդ չեն տալիս դրանք հեռացնել, քանի որ հետագայում այս ատամները կարող են շատ օգտակար լինել (օրինակ՝ հիանալի հիմք կծառայեն պրոթեզավորման համար):

Որդանման ելուն

Այս փոքրիկ օրգանը կարող է շատ մեծ խնդիրներ առաջացնել: Որովայնախոռոչային վիրահատությունների 80%-ն իրականացվում է որդանման ելունի հետ կապված խնդիրների հետևանքով: Միջնադարում որդանման ելունի բորբոքումը նույնիսկ համարվում էր մահացու անբուժելի հիվանդություն:

Ժամանակին այս օրգանն օգնում էր յուրացնել կոշտ սնունդը և նպաստում էր օրգանիզմի անխափան աշխատանքի պահպանմանը: Ներկայում այն ոչ մի լուրջ մարսողական ֆունկցիա չի կատարում, սակայն օգնում է պահպանել հորմոնալ, արտազատական ու պաշտպանական ֆունկցիաները:

Ականջի մկաններ

Նախկինում այս մկաններն օգնում էին մարդկանց շարժել ականջները և ավելի լավ ընկալել ձայները: Սա հնարավորություն էր տալիս պաշտպանվել գիշատիչներից և չվտանգել կյանքը, ինչպես նաև գտնել միմյանց և սնունդ հայթայթել, սակայն ներկայում դրանց անհրաժեշտությունն այլև չկա:

Որովայնի բրգաձև մկան

Որովայնի բրգաձև մկանն այժմ կարևոր է միայն պարկավոր կենդանիների համար: Մարդկանցից շատերը նույնիսկ չունեն նման մկան, իսկ այն ունենցողներին բրգաձև մկանն օգնում է ձգել որովայնի սպիտակ գիծը:

Նյութի աղբյուրը՝ takprosto.cc