Որ դեպքերում շոգեբաղնիք այցելելուց հետո գլխացավ առաջանում և ինչ անել ինքնազգացողության վատացման դեպքում

Շոգեբաղնիք այցելելը ոչ միայն հիգիենիկ, այլև առողջարար պրոցեդուրա է, որն օգնում է դուրս բերել վնասակար նյութերն օրգանիզմից: Սակայն կան մարդիկ, որոնց շոգեբաղնիք այցելելը հակացուցված է, քանի որ այդ պրոցեդուրան ուղեկցվում ինքնազգացողության վատացմամբ ու գլխացավերով:

Ձեր ուշադրությանն ենք ներկայացնում այն հիմնական գործոնները, որոնք կարող են այս դեպքում դառնալ սաստիկ գլխացավի կամ միգրենի նոպաների պատճառ:

Օրգանիզմի գերտաքացման ախտանշանները

Օրգանիզմի գերտաքացումը սովորաբար ուղեկցվում է հետևյալ ախտանշաններով.

·        գլխացավեր ու գլխապտույտ,

·        թուլություն, իսկ երբեմն նաև գիտակցության կորուստ,

·        սրտխառնոց ու փսխում,

·        ջղաձգումներ,

·        սրտի աշխատանքի խանգարումներ,

·        հևոց:

Շոգեբաղնիք այցելելուց հետո առաջացող գլխացավի պատճառները

Շոգեբաղնիք այցելելուց հետո գլխացավը կարող է առաջանալ տարբեր պատճառներով: Ցավը կարող է պայմանավորված լինել ինչպես օրգանիզմի գերտաքացմամբ, այնպես էլ թունավորումով, ալերգիաներով, սրտանոթային հիվանդություններով և այլն:

Գլխացավերի հիմնական պատճառներն են.

·        վատ օդափոխությունն ու թթվածնի պակասը,

·        գերտաքացումը,

·        թունավորումը ածխածնի մոնօքսիդով,

·        ալերգիկ ռեակցիան,

·        զարկերակային ճնշման բարձրացումը կամ իջեցումը,

·        վնասակար նյութերը,

·        օստեոխոնդրոզը,

·        հորմոնալ հիվանդությունները (շաքարային դիաբետ, հիպերթիրեոզ),

·        ջրազրկումը,

·        չափից շատ ուտելը,

·        ալկոհոլայի հարբածությունը,

·        քնի պակասը:

Թթվածնի պակաս

Սա կարող է առաջանալ օրգանիզմի գերտաքացման, ինչպես նաև թթվածնային քաղցի հետևանքով: Բացի այդ, վատ օդափոխության պատճառով օդում կլինի նաև ածխածնի մոնօքսիդ, որը թունավոր է ամբողջ օրգանիզմի և նյարդային համակարգի համար: Անորակ փայտանյութի օգտագործումն էլ ավելի կարող է վատացնել իրավիճակը:

Օրգանիզմի գերտաքացում

Շոգեբաղնիքում երկար ժամանակ անցկացնելու դեպքում օրգանիզմը կարող է տուժել գերտաքացումից: Բացի այդ, ջերմակարգավորման խանգարմանն է նպաստում նաև հիպերթիրեոզը: Գերվահանագեղձության դեպքում նվազում է օրգանիզմի դիմացկունությունը բարձր ջերմաստիճանի և թարմ օդի պակասի հանդեպ: Իրավիճակն էլ ավելի է բարդանում այդ ընթացքում սեռական ակտիվության ու ոգելից խմիչքների օգտագործման դեպքում:

Ալերգիաներ

Գլխացավի ու միգրենի նոպաների պատճառ կարող են դառնալ նաև շոգեբաղնիքում օգտագործվող նյութերը (փայտանյութեր, հոտավետ յուղեր և այլն), որոնք ալերգիկ ռեակցիաներ են առաջացնում:

Ճնշման տատանումներ ու սրտի աշխատանքի հետ կապված խնդիրներ

Շոգեբաղնիքում մարդու ստանոթային համակարգը շատ ավելի ծանրաբեռնած է լինում, ուստի ճնշման տատանումների դեպքում խորհուրդ է տրվում հրաժարվել նման պրոցեդուրաներից: Բարձր ջերմաստիճանի հետևանքով անոթները լայնանում են և առաջանում է հաճախասրտություն (տախիկարդիա): Ընդ որում՝ այս դեպքում զարկերակային ճնշումը կարող է ինչպես նվազել, այնպես էլ բարձրանալ:

Հիպոտոնիայից տառապողների զարկերակային ճնշումը շոգեբաղնիքում որպես կանոն նվազում է, ինչի հետևանքով կարող է առաջանալ ուժգին գլխացավ, թուլություն և նույնիսկ գիտակցության կորուստ: Արյան գերճնշման կամ անոթային վեգետատիվ դիստոնիայի դեպքում զարկերակային ճնշումը բարձրանում է և կարող է առաջանալ հիպերտոնիկ կրիզ:

Օստեոխոնդրոզ

Գլխացավի պատճառ կարող է դառնալ նաև օստեոխոնդրոզը, որի ախտանշանները դրսևորվում են անհարմար դիրքի դեպքում: Այս դեպքում անոթները սեղմվում են, ինչի հետևանքով գլխուղեղի հյուսվածքներում արյունը լճանում է և առաջանում է թթվածնաքաղց:

Շաքարային դիաբետ

Այս հիվանդության ժամանակ օրգանիզմն ունի մեծ քանակությամբ ջրի կարիք, քանի որ այն դուրս է գալիս օրգանիզմից մեզի հետ: Շոգեբաղնիքում ակտիվանում է քրտնարտադրությունը, ինչը հանգեցնում է ջրազրկման և կարող է նպաստել գլյուկոզայի մակարդակի կտրուկ բարձրացման: Այս ամենի հետևանքով էլ առաջանում է սաստիկ գլխացավ:

Օրգանիզմի ջրազրկում

Ոգելից խմիչքների, միզամուղ ազդեցությամբ օժտված ըմպելիքների և օգտագործվող հեղուկի պակասի հետևանքով առաջանում է ջրազրկում, իսկ առատ քրտնարտադրությունն էլ ավելի է վատացնում մարդու վիճակը:

Սննդի չարաշահում

Շոգեբաղնիքում չափից շատ ուտելու դեպքում հիպոտոնիայից տառապողների մոտ նվազում է զարկերակային ճնշումը: Մեծ քանակությամբ սնունդը բացասաբար է ազդում սրտամկանի աշխատանքի վրա, ուստի շոգեբաղնիք այցելելու դեպքում խորհուրդ չի տրվում շատ ուտել:

Ինչ անել ինքնազգացողության վատացման դեպքում

Եթե մարդը շոգեբաղնիքում կորցրել է գիտակցությունը կամ նրա ինքնազգացողությունը վատացել է, ապա հարկավոր է տեղափոխել նրան այնպիսի վայր, որտեղ կլինի մաքուր, թարմ օդ, իսկ քունքերին ու ծոծրակին սառը կոմպրեսներ դնել: Ջրազրկումից ազատվելու համար նաև խորհուրդ է տրվում հիվանդին ջուր կամ տոմատի հյութ տալ:

Շոգեբաղնիքից հետո առաջացած գլխացավից ազատվելու համար կարելի է որևէ ցավազրկող դեղամիջոց ընդունել:

Եթե հիվանդն անգիտակից վիճակում է, ապա կօգնի անուշադրի սպիրտը կամ ականջների մերսումը: Եթե այս պրոցեդուրաները չեն օգնում և հիվանդը շարունակում է մնալ անգիտակից վիճակում, ապա հարկավոր է դիմել բժշկին:

Նախազգուշական միջոցներ

Շոգեբաղնիք այցելելուց առաջ խորհուրդ է տրվում հետևել հետևյալ ցուցումներին.

·        չչարաշահել ալկոհոլային ըմպելիքները (ցանկալի է առհասարակ հրաժարվել),

·        չափիս շատ չուտել,

·        խուսափել գերտաքացումից,

·        ամեն անգամ շոգեբաղնիքից դուրս գալիս խմել ոչ ալկոհոլային ըմպելիքներ, մրգային ու բանջարեղենային հյութեր,

·        պարբերաբար դուրս գալ մաքուր օդին և մարմինը ցողել ոչ շատ սառը ջրով (չափազանց սառը ջուրը վնասակար է սրտանոթային հիվանդությունների դեպքում),

·        շոգեբաղնիք այցելելուց առաջ ընդունել դյուրամարս սնունդ կամ որևէ հյութ:

Շոգեբաղնիք այցելելը հակացուցված է հետևյալ դեպքերում.

·        3-4-րդ կարգի արյան գերճնշում,

·        1-ին և 2-րդ տիպի շաքարային դիաբետ,

·        Սրտանոթային համակարգի հիվանդույթուններ,

·        Լյարդի ու երիկամների ծանր հիվանդություններ:

Արյան գերճնշման դեպքում հարկավոր է մինչ շոգեբաղնիք այցելելը նախապես ճափել զարկերակային ճնշումը: Եթե այն նորմայից բարձր է, ապա պրոցեդուրան ցանկալի է հետաձգել կամ հատկացնել դրան ընդամենը 10 րոպե, հակառակ դեպքում կարող է առաջանալ գլխուղեղի արյունազեղում:

Շոգեբաղնիք այցելելը կարող է վտանգավոր լինել նաև զարկերակային ճնշումը նվազեցնող դեղամիջոցների ընդունման դեպքում, քանի որ բարձր է գիտակցության կորստի վտանգը:

Այս պրոցեդուրան կարող է խիստ վտանգավոր լինել նաև շաքարային դիաբետից տառապողների համար, ուստի հարկավոր է հրաժարվել դրանից կամ հատկացնել դրան միայն 5-10 րոպե՝ նախապես խորհրդակցելով բժշկի հետ:

Նյութի աղբյուրը՝ golmozg.ru