Ինչ է կրծքի ֆիբրոցիստիտը և որոնք են դրա բուժման ու կանխարգելման եղանակները

Կանանց առնվազն ½ մասը երբևէ նկատել է կրծքում փոքրիկ գոյացություններ, որոնք ի հայտ են գալիս ու անհետանում՝ համապատասխան դաշտանային ցիկլին: Բանն այն է, որ դաշտանից անմիջապես առաջ և դրա ընթացքում կնոջ օրգանիզմում փոխվում է հորմոնների մակարդակը, ինչը հանգեցնում է կրծքագեղձերում հեղուկի կուտակման: Այդ ժամանակահատվածում բուժզննում անցնելիս մեկ կամ երկու կրծքագեղձում կարող են հայտնաբերվել ցավոտ զգացողություններ առաջացնող գոյացություններ, որոնք դաշտանի սկսվելուց 1-2 օր անց փոքրանում են կամ առհասարակ անհետանում:

Ոմանց մոտ այս խնդիրը կարող է ի հայտ գալ առաջին իսկ դաշտանից, սակայն միջինում այն զարգանում է 20-30 տարեկանում: Ընդ որում՝ այս վիճակը երբեմն շարունակվում է մինչև դաշտանադադարը և տարիների ընթացքում դրսևորվում տարբեր կերպ (թույլ ուռածություն, սուր ցավ կամ ակնհայտ գոյացություններ):

Հարկ է հիշել, որ գոյացությունների 80-90%-ը չարորակ ուռուցքներ չեն և համոզվելու համար առաջին բանը, որ պետք է կինն անի բուժզննում անցնելն է:

Գոյություն ունի մի քանի միջոց, որոնք կօգնեն տարբերել բարորակ գոյացությունը քաղցկեղի չարորակ ուռուցքից:

Առաջին հերթին հարկավոր է շատ ուշադիր լինել: Եթե նախորդ դաշտանի ժամանակ նույնպես նման խնդիր է առաջացել, ինչի պատճառով բուժզննում եք անցել, ապա հարկավոր է ստուգել, թե արդյոք ներկայիս դաշտանի ժամանակ դրա գտնվելու վայրն ու չափերը նույնն են, թե ոչ, քանի որ նման փոփոխությունները բարորակ լինելու ախտանշան են: Առհասարակ խորհուրդ է տրվում հետևել գոյացությունների զարգացմանը 1-2 դաշտանային ցիկլի ընթացքում, սակայն պետք չէ այն ամեն օր շոշափել, այլապես տարբերությունն ակնհայտ չի լինի: Ցանկալի է գոյացությունը ստուգել դաշտանից 3-4 օր առաջ և դրա ընթացքում:

Ֆիբրոցիստիտի բուժման ժամանակ խորհուրդ է տրվում փոխել սննդակարգը, քանի որ շատերին այս փոփոխությունն օգնում է ազատվել գոյացություններից: Գոյացությունների քանակությունն ու չափերը նվազեցնելու համար խորհուրդ է տրվում.

·        Խուսափել ճարպոտ ու տապակած սննդամթերքից և նվազեցնել օգտագործվող աղի քանակը:

·        Խուսափել կոֆեին պարունակող մթերքից (սուրճ, թեյ, կոլաներ, շոկոլադ և այլն): Նաև չի կարելի ասպիրին ընդունել:

·        Հրաժարվել ծխախոտից:

·        Ամեն օր ընդունել վիտամին E և B խմբի վիտամիններ:

Ոմանց մոտ սննդակարգում փոփոխություններ անելուց հետո գոյացություններն անհետանում են դաշտանային մեկ ցիկլի ընթացքում, իսկ ոմանցից էլ պահանջվում է մինչև կես տարի ժամանակ՝ դրական արդյունքի հասնելու համար: Սակայն եթե դաշտանային երկու ցիկլի ընթացքում ոչ մի փոփոխություն չի նկատվում, ապա հարկավոր է խորհրդակցել մասնագետի հետ: Ընդ որում՝ անկախ գոյացության դիրքից ու չափից անհրաժեշտ է դիմել ուռուցքաբանին, այլ ոչ թե գինեկոլոգին:

Հարկ է հիշել, որ բուժզննում պետք չէ անցկացնել դաշտանից առաջ կամ ձվազատման ժամանակ, քանի որ այդ ժամանակահատվածում կրծքի չափերը մեծանում են և բժիշկը կարող է չնկատել կասկածելի գոյացությունները:

Մասնագետը պետք է շոշափի կուրծքը, երբ հիվանդը նստած է, պառկած, վեր բարձրացրած և իջեցրած ձեռքերով, քանի որ երբեմն ուռուցքը կարելի է հայտնաբերել միայն այս դիրքերից որևէ մեկի դեպքում:

Բժիշկը կարող է տեսողականով որոշել ուռուցքի տեսակը, սակայն վերջնական պատասխանը կտա միայն հյուսվածքի բիոպսիան: Հարկ է հիշել, որ քաղցկեղի ուռուցքները սովորաբար ցրված են լինում: Բացի այդ, դրանք ավելի կոշտ են լինում և ոչ այնքան շարժուն, որքան բարորակ ուռուցքները:

Կրծքագեղձի քաղցկեղից պաշտպանվելու համար երբեմն ռիսկային խմբում գտնվող կանայք պրոֆիլակտիկ մաստէկտոմիա են իրականացնում, որի դեպքում հեռացվում է կրծքի հյուսվածքների 80-95%-ը (մաշկը, պտուկն ու ենթամաշկային ճարպը պահպանվում են), իսկ փոխարենը տեղադրվում է իմպլանտ: Սակայն նույնիսկ այս դեպքում քաղցկեղի առաջացման հավանականությունն ամբողջությամբ չի անհետանում, քանի որ այն կարող է զարգանալ կրծքի պահպանված հյուսվածքներում

Այնուամենայնիվ՝ բժիշկները խորհուրդ չեն տալիս դիմել այս մեթոդի օգնությանը, եթե ռիսկի միակ գործոնը կրծքի ֆիբրոցիստիտն է:

Նյութի աղբյուրը՝ diseases.monomed.ru