Ինչ է կոկորդաբորբը (լարինգիտ) և որոնք են դրա տեսակները, ախտանշաններն ու բուժման եղանակները

Կոկորդաբորբը կամ լարինգիտը կոկորդի լորձաթաղանթի և ձայնալարերի բորբոքումն է, որը հիմնականում պայմանավորված է լինում բակտերիալ կամ վիրուսային վարակներով, որոնք էլ առաջացնում են մրսածություն ու կոկորդի ցավ:

Հիվանդության զարգացմանն են նպաստում մրսածությունը, ալերգիաները, աղտոտված օդը, ծխախոտի ու ալկոհոլի չարաշահումը, ինչպես նաև ձայնալարերի ֆիզիկական գերծանրաբեռնվածությունը: Չափազանց սառը կամ տաք սնունդը նույնպես կարող է նպաստել լարինգիտի զարգացմանը: Այս դեպքում ձայնալարերն այտուցվում են և կարող են պատվել բորբոքային գոյացություններով:

Լարինգիտի հիմնական ախտանշաններն են  ձայնի կորուստը կամ խռպոտությունը, կոկորդի քորը, չոր հազը: Որոշ դեպքերում հիվանդը ցավի պատճառով դժվարանում է սնունդը կուլ տալ, իսկ ձայնալարերի այտուցվածության հետևանքով նեղանում է կոկորդի լուսանցքը և կարող է վատանալ շնչառությունը:

Կախված բորբոքային գործընթացից՝ տարբերվում է լարինգիտի երկու տեսակ՝ սուր ու քրոնիկ:

Սուր կոկորդաբորբը, որպես կանոն, ավելի թեթև է ընթանում և հիվանդն ապաքինվում է մոտ մեկ շաբաթում: Սակայն ձայնալարերի ծանրաբեռնվածության, ծխածոտի ու ալկոհոլի չարաշահման, երկար ժամանակ չոր կամ փոշոտ օդով տարածքում գտնվելու հետևանքով սուր կոկորդաբորբը կարող է հեշտությամբ վերածվել քրոնիկականի:

Քրոնիկ կոկորդաբորբից տառապող մարդկանց ձայնը սովորաբար թավ է լինում և կոպիտ, ինչը պայմանավորված ձայնալարերի բորբոքված լորձաթաղանթի հաստացմամբ, ինչպես նաև դրանց վրա կուտակված ու չորացած լորձի շերտով:

Կոկորդաբորբը ենթադրում է համալիր բուժում: Այս դեպքում կիրառվում են ողողումներ ու ինհալացիաներ: Օրինակ շատ արդյունավետ են մենթոլով կամ էվկալիպտով ինհալացիաները: Ողողումների համար սովորաբար օգտագործվում է սոդայի կամ բորաթթվի լուծույթը (1 թ.գ. մի բաժակ գոլ ջրին):

Հիվանդության առաջին օրերին շատ օգտակար կարող են լինել ոտքերի վաննաները (42-45ºC, 20-30 րոպե), որոնցից հետո հարկավոր է տաք գուլպա հանգել և որոշ ժամանակ տնից դուրս չգալ:

Հարկավոր է նաև հետևել օրվա ընթացքում ընդունած հեղուկի քանակին: Օրական անհրաժեշտ է խմել 1.5-2 լիտր ջուր: Նախընտրելի է, որ ջուրը լինի տաք և խմվի փոքր կումերով ամբողջ օրվա ընթացքում:

Բուժման ժամանակ հարկավոր է հնարավորինս նվազեցնել ձայնալարերի վրա գործադրվող ծանրաբեռնվածությունը և խոսել շշուկով: Անհրաժեշտ է աշխատել շնչել քթով, այլ ոչ թե բերանով, քանի որ քթով շնչելիս օդը տաքանում է և խոնավեցնում լորձաթաղանթը՝ կանխելով չորացումը:

Նաև հարկավոր է խուսափել այն տարածություններից, որտեղ օդում կան թունավոր քիմական նյութերի գոլորշիներ, քանի որ դրանք խիստ բացասաբար են ազդում կոկորդի լորձաթաղանթի վրա:

Կոկորդաբորբի դեպքում սննդակարգից անհրաժեշտ է բացառել կոկորդի բորբոքված լորձաթաղանթն էլ ավելի գրգռող մթերքը: Նման սննդամթերքի շարքին են դասվում աղի, կծու, թթու ուտեստները, ինչպես նաև տարատեսակ համեմունքները:

Եթե նման խնդիրները կրում են պարբերական բնույթ, ապա մարդը պետք է հրաժարվի սառը ըմպելիքներից կամ պաղպաղակից: Նաև խորհուրդ չի տրվում ձայնալարերի ծանրաբեռնվածությունից հետո սառեցնել կոկորդը: Այս դեպքում հարկավոր է դուրս գալուց առաջ 15-20 րոպե անցկացնել տաք տարածությունում՝ առանց ձայնալարերը ծանրաբեռնելու, ինչը թույլ կտա, որ դրանք «հովանան»:

Լարինգիտի կանխարգելման համար առաջին հերթին հարկավոր է կոփել օրգանիզմը: Դիմադրողականության բարձրացմանն է նպաստում նույնիսկ ծխախոտից ու ալկոհոլից հրաժարվելը, ինչպես նաև վերին շնչառական ուղիների լորձաթաղանթը կուտակված վնասակար նյութերից պարբերաբար մաքրելը:

Հարկ է հիշել, որ հիվանդությունը չանտեսելու և քրոնիկի չվերածելու դեպքում կարելի է բուժել ընդամենը մի քանի օրում: Սակայն եթե բուժումն անարդյունավետ է լինում, իսկ հիվանդի վիճակը չի բարելավվում կամ նույնիսկ ավելի է վատանում, ապա հարկավոր է շտապ դիմել մասնագետի օգնությանը: Բանն այն է, որ գոյություն ունի լարինգիտի մի քանի տեսակ և կախված հիվանդության տեսակից՝ փոխվում է նաև անհրաժեշտ բուժման տեսակը:

Նյութի աղբյուրը՝ svoezdorovye.ru