Որ դեպքերում են նորածիններն արյունոտ կաթ փսխում և ինչ է հարկավոր անել այդ ժամանակ

Նորածինները սնվելուց հետո հաճախ են մի փոքր կաթ փսխում: Սա բնական ֆիզիոլոգիական երևույթ է, եթե փսխած կաթը քիչ քանակությամբ է, իսկ երեխայի ինքնզգացողությունը չի վատացել: Այս կերպ երեխան ազատվում է սննդի հետ «կուլ տված» օդից, ինչպես նաև ավելորդ սննդից, որը չափազանց շատ է նրա փոքրիկ ստամոքսի համար:

Սակայն երբեմն փսխումը կարող է լինել հիվանդության ախտանշան, իսկ եթե փոքրիկն արյունոտ կաթ է փսխում, ապա ծնողն էլ ավելի է անհանգստանում:

Որն է արյունոտ կաթ փսխելու պատճառը

Առավել հաճախ արյունոտ կաթ փսխելը պայմանավորված է լինում մոր պտուկների վնասվածքով, ինչի հետևանքով երեխան կաթի հետ նաև արյուն է կուլ տալիս: Այս խնդիրը կարող է հաճախակի բնույթ կրել, եթե կնոջ մաշկը շատ նուրբ է և երեխային կրծքով կերակրելիս պտուկները վնասվում են:

Արյունոտ կաթ փսխելը կարող է պայմանավորված լինել նաև երեխայի աղեստամոքսային տրակտի անոթների վնասվածքներով: Սա շատ լուրջ խնդիր է, որը պետք է ախտորոշվի հատուկ բուժզննման ժամանակ:

Երեխան կարող է արյուն փսխել նաև կյանքի առաջին օրը, եթե ծննդաբերության ժամանակ նա ամնիոյին հեղուկ (շուրջպտղային ջրեր) է կուլ տվել:

Ինչ է հարկավոր անել

Եթե երեխան սնվելուց հետո արյունոտ կաթ է փսխում, ապա հարկավոր է հետևել նրա պահվածքին: Հարկավոր է հիշել, որ սնվելուց հետո քիչ քանակությամբ կաթ փսխելը բնական երևույթ, սակայն նորմալ չէ, եթե երեխան ամբողջ սնունդն է փսխում: Անհրաժեշտ է համոզվել, որ երեխան չի փսխում ամբողջ սնունդը, քանի որ.

·        Սովորաբար երբ երեխան սնվելուց հետո քիչ քանակությամբ կաթ է փսխում, նա դրա համար գրեթե ոչ մի ջանք չի գործադրում, մինչդեռ ամբողջ սնունդը փսխելու դեպքում այդ գործընթացն ուղեկցվում է որովայնի ուժեղ լարվածությամբ:

·        Սնվելուց հետո երեխան փսխում է նոր կուլ տված և դեռ չմարսված կաթը: Ընդ որում՝ շատ քիչ քանակությամբ: Սակայն ամբողջ սնունդը փսխելիս դուրս է գալիս նաև մասամբ մարսված սնունդը, որը պարունակում է լորձ, լեղի և այլ նյութեր:

·        Քիչ քանակությամբ կաթը երեխան փսխում է սնվելուց գրեթե անմիջապես հետե, սակայն սրտխառնոցի ու փսխումի նոպաները կարող են ի հայտ գալ ցանկացած պահին:

·        Եթե երեխան փսխում է ուտելուց հետո և շատ քիչ քնակությամբ, ապա նրա ինքնազգացողությունը չի վատանում, սակայն սրտխառնոցի ու փսխումի նոպաները, որոնք վկայում են որևէ հիվանդության առկայության մասին, կարող են դառնալ անհանգստության ու քնկոտության պատճառ: Բացի այդ, հաճախ նման ախտանշանների դեպքում բարձրանում է նաև փոքրիկի մարմնի ջերմությունը:

Երեխայի փսխած կաթի մեջ արյուն նկատելու դեպքում հարկավոր է աշխատել գտնել խնդրի պատճառը՝ առողջական լուրջ խնդիրները բացառելու համար:

Նաև հարկավոր է ուսումնասիրել պտուկները, քանի որ եթե դրանք պատված են ճաքերով կամ կան այլ վնասվածքներ, ապա պատճառն այդ է: Եթե պտուկները ոչ մի վնասվածք չունեն, իսկ երեխան շարունակ արյունոտ կաթ է փսխում, ապա հարկավոր է դիմել մասնագետի օգնությանը:

Երբ է հարկավոր դիմել բժշկին

Ծնողը պետք է դիմի մանկաբույժի օգնությանը, եթե.

·        եթե արյունոտ կաթ փսխելուց հետո երեխան դարձել է դյուրագրգիռ ու լաց է լինում,

·        եթե այս խնդիրն ի հայտ է գալիս ժամանակ առ ժամանակ, իսկ երեխան լավ չի աճում,

·        եթե երեխան չափազանց շատ (2 թեյի գդալից ավել) արյունոտ կաթ է փսխում, ինչն արդեն բնական ֆիզիոլոգիական երևույթ չէ:

Հարկ է հիշել, որ այս ախտանշանները խոսում են լուրջ հիվանդության առկայության մասին, ուստի հարկավոր է չհապաղել և շտապ դիմել բժշկի օգնությանը:

Նյութի աղբյուրը՝ o-krohe.ru