Ինչպես պաշտպանել երեխային ոջիլներից

Երեխաները շատ ակտիվ են լինում և ծնողները ոչ միշտ են հասցնում հետևել, թե ում հետ և որտեղ են նրանք զբոսնում: Բացի այդ, երեխաները հաճախում են նաև մանկապարտեզներ ու դպրոցներ և երկու դեպքում էլ ոջիլների ձեռքբերման հավանականությունը մեծ է: Չնայած, որ ոջիլները լուրջ վնաս չեն հասցնում, այնուամենայնիվ դառնում են բավական տհաճ զգացողությունների պատճառ:

Երկար ժամանակ մարդիկ կարծում էին, որ ոջիլները սիրում են «բնակվել» կեղտոտ ու յուղոտ վարսերի մեջ, սակայն գիտնականները հերքել են այս պնդումը: Պարզվում է, որ ոջիլները չեն վախենում ջրից և կարող են հայտնվել նաև մաքրասեր երեխաների գլխին, ուստի սոցիալական դիրքն ու մաքրասիրությունը չեն ազդում այս միջատների առկայության վրա:

Վարակումը տեղի է ունենում վարակված երեխայի գլխին դիպչելու, նրա հետ խաղալու կամ առհասարակ վարակված երեխայի հետ շփվելու ժամանակ: Նույնիսկ չնչին հպումը բավական է, որ ոջիլները «բնակություն» հաստատեն նաև մյուս երեխայի մազերի մեջ: Սա է պատճառը, որ այս խնդիրը հիմնականում անհանգստացնում է երկար վարսերով աղջիկներին ու 3-14 տարեկան ակտիվ երեխաներին:

Ոջիլներն առողջության համար լուրջ վտանգ չեն ներկայացնում, սակայն կարող են գլխացավանք դառնալ ծնողների համար: Բացի այդ, նման խնդիրը կարող է նաև շատ լուրջ սթրես լինել երեխայի համար, ուստի հարկավոր է անել հնարավոր ամեն բան՝ երեխային ոջիլներից պաշտպանելու համար:

Առաջին հերթին հարկավոր է հետևել երեխայի սանրվածքին: Ինչպես արդեն նշվել է՝ ոջիլները շատ արագ են տարածվում երկար մազերի դեպքում և դրանցից ազատվելը բավական բարդ է լինում, ուստի երկար վարսերի ունեցող երեխաների ծնողները պետք է նրանց մազերը միշտ հյուսեն կամ ձիգ հավաքեն:

Բացի այդ, երեխայի գլուխը հարկավոր է շաբաթական մեկ անգամ ստուգել՝ օգտագործելով հատուկ սանր, որը կարելի է գնել ոջիլների դեմ դեղամիջոցի հետ: Հատուկ ուշադրություն է պետք դարձնել ծոծրակին, քանի որ հենց այդ հատվածում են ոջիլներն հիմնականում կուտակվում և բազմանում:

Եթե երեխային անհանգստացնում է գլխամաշկի քորը, ապա հարկավոր է ուշադիր ստուգել նրա վարսերը, քանի որ քորը ոչ միշտ է պայմանավորված լինում թեփով: Շատ հնարավոր է, որ տհաճ քորի պատճառը ոջիլներն են:

Հարկ է հիշել, որ նույնիսկ շատ ուշադիր լինելու և պարբերաբար երեխայի վարսերը ստուգելու դեպքում էլ երբեմն հնարավոր չի լինում խուսափել ոջիլներից, սակայն նման պրոֆիլակտիկ միջոցները կօգնեն ժամանակին հայտնաբերեն խնդիրն ու հեշտությամբ ազատվել դրանից:

Նյութի աղբյուրը՝ climara.ru

Նյութի հեղինակը՝ Եվգենիյ Ումանսկիյ