Որոնք են ականջների աղմուկի առաջացման պատճառներն ու ինչպես խուսափել այդ խնդրից

Ականջների աղմուկը կարող է առաջանալ ցանկացածի մոտ: Երբեմն դրա առաջացման համար բավական է լինում բարձր երաժշտություն լսել կամ տրասնպորտային որևէ միջոցից օգտվել, սակայն բարեբախտաբար նման դեպքերում այն երկար չի տևում:

Այնուամենայնիվ՝ լինում են դեպքեր, երբ այս տհաճ ախտանշանը չի անցնում բավական երկար ժամանակ: Aif.ru-ն ներկայացրել է ականջների աղմուկի առաջացման պատճառներն ու դրանից ազատվելու եղանակները:

Ականջներում աղմուկի առաջացման պատճառներն են.

·        արտաքին կամ ներքին ականջի հիվանդությունները (ականջաբորբ, ծծմբախցան և այլն),

·        նեյրոսենսոր ծանրալսությունը,

·        ներքին ականջի հիվանդությունները (լաբիրինթաբորբ, մենյարի համախտանիշ և այլն),

·        գլխուղեղի ուռուցքը,

·        գլխի և պարանոցի արյան շրջանառության խանգարումը,

·        խնդիրը կարող է պայմանավորված լինել նաև սրտանոթային հիվանդություններով, վահանաձև գեղձի հիվանդություններով, կանանց մոտ հորմոնալ փոփոխություններով, հղիությամբ, սակավարյունությամբ,

·        բացի այդ, այս ախտանշանը կարող է առաջանալ նաև որևէ դեղամիջոցի առաջացրած կողմնակի բարդության հետևանքով:

Եթե խնդրի առաջացման վերոնշյալ բոլոր պատճառները հերքվել են, ապա այն անվանվում է իդեոպաթիկ՝ առանց որևէ պատճառի առաջացած: Ականջների իդեոպաթիկ աղմուկը, որն ուղեկցում է նեյրոսենսոր ծանրալսությանը, գրեթե հնարավոր չէ ամբողջությամբ բուժել:

Նման խնդրի դեպքում հարկավոր է անպայման դիմել օտոլարինգոլոգին՝ արտաքին և միջին ականջի խնդիրները հերքելու համար: Եթե այդ խնդիրները հերքվեն, ապա հարկավոր է դիմել ընդհանուր պրոֆիլի բժշկին, որն էլ հետազոտություններից հետո կուղղորդի համապատասխան մասնագետի մետ:

Ինչպես խուսափել ականջների աղմուկից

·        Քրոնիկ ականջաբորբի դեպքում հարկավոր է ժամանակին լուծել խնդիրը, քանի որ ականջի ցանկացած բորբոքում կարող է դառնալ աղմուկի պատճառ:

·        Հարկավոր է խուսափել մեծ չափաբաժնով ասպիրին ընդունելուց, քանի որ այն տոքսիկ ազդեցություն է ունենում ներքին ականջի վրա և առաջացնում է աղմուկ:

·        Ականջներն աղմուկից պաշտպանելու համար անհրաժեշտ է հատուկ պատպանիչ ականջակալներ կամ ականջախցաններ կրել և խուսափել բարձր ձայներից: Հաճախ անվնաս թվացող ձայները կարող են դառնալ լուրջ խնդիրների պատճառ:

·        Ականջակալներով բարձր երաժշտություն լսելը նույնպես կարող է խիստ վնասակար լինել:

·        Ուսումնասիրությունները ցույց են տվել, սթրեսն ու խիստ դիետաները զգալիորեն վատացնում են հիվանդի վիճակը ականջների աղմուկի դեպքում:

·        Հարկավոր է հրաժարվել նաև ծխախոտից, քանի որ այն առաջացնում է ոչ միայն քաղցկեղ, այլ նաև ականջների աղմուկ:

·        Բացի այդ, հարկ է հիշել նաև, որ շատ մեծ նշանակություն ունի առողջ քունը: Մարդը պետք է քնի գոնե 6 ժամ, քանի որ առնվազն 6 ժամ ժամանակ է հարկավոր գլխուղեղին քնի բոլոր փուլերն անցնելու համար: Հակառակ դեպքում վատանում է մարդու հիշողությունն ու կենտրոնանալու կարողությունը և կարող է ականջներում աղմուկ առաջանալ: Այս վիճակը նման է ալկոհոլային հարբածությանը: