Ինչ չի կարելի անել ուտելուց անմիջապես հետո. 5 սովորություն, որոնք վնասակար են առողջության համար

Համեղ ճաշից կամ ընթրիքից հետո մարդիկ հաճախ ուզում են հարմարավետ որևէ տեղ պառկել, հեռուստացույց դիտել կամ մի փոքր ննջել, սակայն մասնագետները նշում են, որ նման սովորությունը կարող է խիստ վնասակար լինել առողջության համար:

Lady-journal.info կայքը ներկայացրել է, թե ինչ չի կարելի անել ուտելուց անմիջապես հետո և որ սովորություններն են դառնում առողջական լուրջ խնդիրների պատճառ:

Ծխախոտ ծխել

Ծխող մարդիկ հաճախ են ուտելուց հետո ծխախոտ ծխում: Առհասարակ ծխախոտի չարաշահումը շատ վատ սովորություն է, որից հարկավոր է հնարավորինս շուտ ազատվել, սակայն նույնիսկ այդ սովորուությունից չհրաժարվելու դեպքում հարկավոր է հիշել, որ ուտելուց անմիջապես հետո ծխելը խիստ վնասակար է առողջության համար: Ծխախոտում պարունակվում է նիկոտին, որն առաջացնում է թթվածնային անբավարարություն, իսկ թթվածինն անհրաժեշտ է օրգանիզմին ճիշտ մարսողության համար: Սա նշանակում է, որ ուտելուց անմիջապես ծխախոտ օգտագործելով մարդը խանգարում է այդ գործընթացը: Ուստի հարկ է հիշել, որ ուտելուց հետո ծխախոտ կարելի է ծխել միայն առնվազն երկու ժամ անց:

Քնել

Քնելուց առաջ երբեք չի կարելի սնունդ ընդունել: Եթե ուտելուց անմիջապես հետո մարդը պառկի քնելու, նրա քունը շատ անհանգիստ կլինի: Նման դեպքերում ստամոքսը ստիպված է լինում աշխատել քնի ժամանակ, ինչն էլ կառաջացնում է տհաճ զգացոցղություններ ու փորափքանք: Որոշ ուսումնասիրություններ նույնիսկ ցույց են տվել, որ քնելուց առաջ սնունդ ընդունելը բարձրացնում է գլխուղեղի կաթվածի առաջացման հավանականությունը: Հարկ է հիշել, որ ընթրիքը պետք է լինի քնելուց առնվազն 2-3 ժամ առաջ, իսկ սաստիկ քաղցի դեպքում կարելի է մի բաժակ կեֆիր կամ որևէ այլ կաթնամթերք խմել:

Մրգեր ուտել

Ճաշից հետո միրգ ուտելը կարող է դառնալ ստամոքսի այրոցի առաջացման պատճառ: Բացի այդ, մրգերը ցանկալի է ուտել մինչ ճաշելը կամ ընթրելը: Որպեսզի մրգերն ավելի լավ մարսվեն ու յուրացվեն, ստամոքսը պետք է օգտագործի բոլոր ֆերմենտները: Սա է պատճառը, որ դատարկ ստամոքսին միրգ ուտելու դեպքում մարդը դրանից շատ ավելի մեծ օգուտ է ստանում, քան ճաշից հետո ուտելու դեպքում:

Ցնցուղ ընդունել

Բոլորն էլ դեռ մանկուց գիտեն, որ ուտելուց հետո չի կարելի լոգանք կամ ցնցուղ ընդունել: Բանն այն է, որ տաք ջուրն արագացնում է արյան հոսքը դեպի վերջույթները, ինչի հետևանքով ստամոքսը չի ստանում մարսողության համար անհրաժեշտ բավարար քանակությամբ արյունը: Այս ամենի հետևանքով խանգարվում է մարսողության գործընթացն ու առաջանում են ստամոքսի ցավեր:

Թեյ խմել

Շատ երկրներում ճաշից կամ ընթրիքից հետո ընդունված է թեյ խմել: Ընդ որում՝ թեյախմության ժամանակ անպայման մատուցվում է նաև որևէ քաղցրավենիք: Սակայն հարկ է հիշել, որ թեյը պարունակում է մեծ քանակությամբ դաբաղանյութեր, որոնք խանգարում են օրգանիզմում սպիտակուցների ու երկաթի յուրացմանը, իսկ որկաթի պակասի հետևանքով կարող է առաջանալ անեմիա, ինչպես նաև գլխապտույտ, թուլություն ու մշտական հոգնածության զգացում: