Բուժական մարմնամարզություն միջողային ճողվածքի դեպքում. 12 վարժություն մեջքի ցավը մեղմելու համար

Միջողային ճողվածքի (грыжа) դեպքում բուժական մարմնամարզությունը պարտադիր է լինում, քանի որ այն օգնում է բարելավել հիվանդի ինքնազգացողությունը: Ձեր ուշադրությանն ենք ներկայացնում 12 արդյունավետ վարժությունից բաղկացած մի համալիր, որոնք թույլ կտան մեղմել ցավը:

Վարժությունները հարկավոր է կատարել պառկած դիրքով և չծանրաբեռնել հիվանդ հատվածը: Ցանկալի է մարմնամարզությունը կատարել ամեն օր նույն ժամին: Մարզումները տևում են 25-30 րոպե, սակայն յուրաքանչյուր վարժությունից հետո հարկավոր է մի փոքր հանգստանալ:

1.      Պառկել մեջքի վրա, ծալած արմունկները դնել կրծքավանդակի մոտ և մի փոքր ճկել մեջքը (այնպես, որ ստացվի կիսակամուրջ): Որոշ ժամանակ մնալ այս դիրքով, այնուհետև վերադառնալ սկզբնական դիրք և թուլացնել մարմինը: Վարժությունը ցանկալի է կրկնել 7-8 անգամ:

2.      Պառկել մեջքի վրա, ծնկները ծալել, իսկ ձեռքերը պարզել մարմնի երկայնքով: Կոնքը դանդաղ բարձրացնել՝ ձգելով նստատեղի մկանները: Որոշ ժամանակ մնալ այս դիրքով՝ լարելով մեջքի ու գոտկատեղի մկանները, այնուհետև իջեցնել կոնքը: Վարժությունը ցանկալի է կրկնել 6-7 անգամ:

3.      Պառկել մեջքի վրա, ոտքերն ու ձեռքերն ուղղել, այնուհետև լարելով մեջքի մկանները և հենվելով ափերի ու ուսերի վրա՝ մի փոքր (մի քանի սանտիմետր) բարձրացնել մարմինը: Կրկնել վարժությունը 3-4 անգամ:

4.      Պառկել մեջքի վրա, ձեռքերը դնել գլխի ետևում, մի ծունկը ծալել, ձգել կրծքին մոտ, այնուհետև ուղղել ու իջեցնել: Կրկնել վարժությունը յուրաքանչյուր ոտքի համար 6-7 անգամ:

5.      Պառկել մեջքի վրա, ձախ ձեռքն ու ձախ ոտքը միաժամանակ վեր բարձրացնել, 8 վայրկայն պահել և իջեցնել: Կրկնել նույնը նաև աջ ձեռքով ու ոտքով: Կրկնել վարժությունը 6-7 անգամ:

6.      Պառկել մեջքի վրա, ձեռքերն ու ոտքերն ուղղել, այնուհետև բարձրացնել վեր՝ մեկն ուղիղ պահած, իսկ մյուսը՝ ծալած: Ոտքերը պահել այս դիրքով 10-20 վայրկյան, այնուհետև դանդաղ իջեցնել և կրկնել վարժությունը՝ այս անգամ ծալելով մյուս ոտքը, իսկ մյուսն ուղղելով: Կրկնել վարժությունը 7-8 անգամ:

7.      Պառկել որովայնի վրա, արմունկները ծալել, իսկ ափերը սեղմել ականջներին: Մարմնի վերին հատվածը մի փոքր վեր բարձրացնել, որոշ ժամանակ մնալ այս դիրքով, այնուհետև վերադառնալ սկզբնական դիրք: Կրկնել վարժությունը 5-6 անգամ:

8.      Պառկել որովայնի վրա, արմունկները ծալել և ափերով հենվել հատակին (կրծքավանդակի մոտ): Մարմնի վերին հատվածը մի փոքր վեր բարձրացնել և ճկել մեջքը, այնուհետև իջեցնել: Կրկնել վարժությունը 7-8 անգամ:

9.      Պառկել որովայնի վրա, ձեռքերը կողք տանել և թուլանացնել մարմինը, այնուհետև ոտքերը ծալել և որոշ ժամանակ թափահարել օդում:

10.  Հենվել ծնկների ու արմունկների վրա, ափերը դնել ուսերի լայնությամբ և պահել դեպի ներս ուղղված: Ձգել կոնքը դեպի ետ՝ մոտենալով հատակին, այնուհետև սահել դեպի առաջ՝ կրծքով գրեթե գետնին դիպչելով: Ուղղվել և կրկնել վարժությունը 8-10 անգամ:

11.  Հենվել ծնկների ու արմունկների վրա, մեջքն ուղիղ պահել և արմունկներով մի փոքր «քայլել» առաջ ու ետ:

12.  Հենվել ծնկների ու արմունկների վրա, այնուհետև ծնկներով շարժվել դեպի աջ և դեպի ձախ: Կրկնել վարժությունը 4-6 անգամ:

Նյութի աղբյուրը՝ aif.ru