Որոնք են օրգանիզմում վիտամին B12-ի դեֆիցիտի հիմնական ախտանշանները

12:39 • 11.08.17

Վիտամին В12-ի դեֆիցիտը կամ hypocobalaminemia-ն դրսևորվում է արյան մեջ այս վիտամինի ցածր մակարդակով: Այս վիտամինի դեֆիցիտը կարող է դառնալ արյան լուրջ հիվանդությունների և նյարդաբանական խնդիրների առաջացման պատճառ:

Վիտամին B12-ի դեֆիցիտի ախտանշանները կապված են հոգեհուզական առողջության հետ: Այս խնդիրը հիմնականում պայմանավորված է լինում սննդակարգում վիտամին B12-ով հարուստ սննդամթերքի պակասով, ինչպես նաև որոշ դեղամիջոցներով, սննդի պակասով, ստամոքսի քրոնիկ բորբոքմամբ, աղիեների մակաբույծներով և այլ պատճառներով:

Այս վիտամինը շատ կարևոր է գլխուղեղի նորմալ աշխատանքի, ԴՆԹ-ի սինթեզի, նյարդային ու արյան բջիջների և իմունային համակարգի աշխատանքի համար:

Այն պարունակվում է կենդանական ծագման սննդամթերքում՝ ինչպիսին են միսը, կաթնամթերքը, հավկիթը, կակղամորթները, խեցեմորթները և այլն:

Ձեր ուշադրությանն ենք ներկայացնում 5 ախտանշան, որոնք վկայում են օրգանիզմում վիտամին B12-ի դեֆիցիտի մասին:

Անբացատրելի հոգնածություն

Անբացատրելի հոգնածության զգացումն ու էներգիայի պակասը նույնիսկ լավ հանգստանալու ու քնելու դեպքում կարող է վկայել այս վիտամինի պակասի մասին: Բանն այն է, որ վիտամին B12-ի գործառույթներից մեկն արյան կարմիր բջիջների արտադրությունն է, որի պակասն էլ նման հետևանքներ է ունենում: Այս դեպքում օրգանները չեն ստանում անհրաժեշտ քանակությամբ թթվածին, ինչն էլ հանգեցնում է հոգնածության ու էներգիայի պակասի:

Գլխապտույտ

Վիտամին B12-ի պակասը կարող է առաջացնել գլխապտույտ, ինչպես նաև տեսողության մթագնում ու թուլություն՝ նստած դիրքից կտրուկ կանգնելու կամ շատ արագ վեր բարձրանալու կամ իջնելու դեպքում:

Մոռացկոտություն

Շատերը հաճախ մտածում են, թե սա ծերացման նշան է, սակայն իրականում քրոնիկ մոռացկոտությունն այս վիտամինի դեֆիցիտի հիմնական ախտանշաններից մեկն է: Հիշողությունը բարելավելու համար բավական է հարստացնել սննդակարգն այս վիտամինով հարուստ մթերքով:

Ծակծկոց վերջույթներում

Վիտամին B12-ի դեֆիցիտը հաճախ դառնում է ամբողջ մարմնում ծակծկոցի առաջացման պաճառ, քանի որ այն ազդում է արյան կարմիր բջիջների արտադրման վրա՝ դրանով իսկ կարգավորելով թթվածնի մակարդակը: Զգայունության կորուստը կամ էլեկտրական հարվածի ալիքների զգացողությունը կարող են պայմանավորված լինել նյարդերի վնասվածքներով:

Մկանային թուլություն

Եթե մկաններն արյան կարմիր բջիջներից չեն ստանում բավարար քանակությամբ թթվածին, դրանք թուլանում են ու կորցնում ամրությունը:

Նման խնդիրների ի հայտ գալու դեպքում հարկավոր է սննդակարգում ներառել սննդամթերք, որը կպարունակի մեծ քանակությամ վիտամին B12: Սա կօգնի ազատվել վիտամին B12-ի դեֆիցիտի ախտանշաններից, վերականգնել այս կարևոր տարրի մակարդակն օրգանիզմում և խուսափել հետագայում խնդրի կրկնությունից:

Նյութի աղբյուրը՝ healthyfoodhouse.com