Ինչ է հարկավոր սրտին նորմալ աշխատանքի համար

Մարդկանց մահվան հիմնական պատճառը սրտանոթային հիվանդություններն են, այլ ոչ թե քաղցկեղը, գրիպը և սարսափելի աֆրիկյան վիրուսները, որոնցից բոլորը վախենում են: Ամռանը կաթվածի հավանականությունն էլ ավելի է բարձրանում, ուստի սրտանոթային խնդիրների կանխարգելումն անչափ կարևոր է դառնում:

Ձեզ ենք ներկայացնում խորհուրդներ, որոնք կօգնեն խուսափել առողջական նման խնդիրներից:

Ինչ է հարկավոր սրտին նորմալ աշխատանքի համար

7-ժամյա առողջ քուն

Գիտնականներն ապացուցել են, որ սրտանոթային հիվանդությունների կանխարգելման համար մարդը պետք է լավ քնի՝ օրական առնվազն 7 ժամ: Լիարժեք քունը 65%-ով նվազեցնում է գլխուղեղի ու սրտամկանի կաթվածի, սրտի իշեմիկ հիվանդության և աորտայի հիվանդությունների առաջացման հավանականությունը, մինչդեռ 6 ժամից պակաս քնելը կարող է լուրջ խնդիրների պատճառ դառնալ: Նման դեպքերում սրտի իշեմիկ հիվանդության հավանականությունը բարձրանում է 48%-ով: Բացի այդ, քնի պակասը հանգեցնում է արյան գերճնշման, ավելորդ քաշի և մի շարք այլ խնդիրների առաջացման, որոնք էլ նպաստում են սրտանոթային հիվանդությունների ի հայտ գալուն:

Օրական 75 գրամ անյուղ միս ուտել

Միսը կարելի է փոխարինել 100 գրամ ձկով, 1 բաժակ կաթնաթթվային ըմպելիքով կամ 100-150 գրամ կաթնաշոռով: Գիտնականները պարզել են, որ սպիտակուցներով հարուստ սննդամթերք օգտագործող մարդիկ ունեն ավելի առողջ սրտանոթային համակարգ, ինչը զարմանալի չէ: Մասնագետների հավաստմամբ՝ կենդանական սպիտակուցներն օգնում են ամրապնդել զարկերակների պատերը, իսկ բուսական ծագման սպիտակուցները պաշտպանում են զարկերակային ճնշման տատանումներից: Բացի այդ, սպիտակուցներով հարուստ սննդամթերքը պարունակում է շատ կարևոր ամինաթթուներ որոնք նվազեցնում են արյան գերճնշման ու կաթվածի հավանականությունը: Շատ օգտակար է նաև հավկիթը:

Շաբաթական 150 րոպե սպորտով զբաղվել

Ուսումնասիրությունները ցույց են տվել, որ ֆիզիկական ակտիվությունը մարդու կյանքը երկարացնող գործոններից մեկն է: Օրական 20-30 րոպե ֆիզիկական վարժություններ կատարելու դեպքում զգալիորեն կբարելավվի ինքնազգացողությունը: Հատկապես օգտակար են լողն ու զբոսանքները, որոնք օգնում են ամրապնդել սրտամկանը, հանգստացնել նյարդային համակարգն ու ազատվել ավելորդ քաշից:

Օրական 30 գրամ ընկուզեղեն ուտել

Ընկույզները սրտամկանի համար ամենաօգտակար սննդամթերքի տեսակներից են: Հատկապես օգտակար են նուշը, պնդուկն ու հնդկական ընկույզը, որոնք պարունակում են արժեքավոր ճարպեր, վիտամին E, սպիտակուցներ ու մանրաթելեր: Սակայն դրանք հարկավոր է ուտել քիչ քանակությամբ, առանց աղի և շոկոլադի, քանի որ դրանց կալորիականությունը շատ բարձր է:

Օրական 200 գրամ վարսակի շիլա ուտել

Սննդաբանների ու սրտաբանների կարծիքով լավագույն նախաճաշը վարսակի շիլան է: Ուսումնասիրությունները ցույց են տվել, որ ամեն օր նախաճաշին վարսակի շիլա ուտող մարդկանց մոտ սրտանոթային հիվանդությունների առաջացման հավանականությունը 15%-ով ցածր է լինում:

Օրական 1.5-2 լիտր ջուր խմել

Արյան գերճնշումից ու սրտի հիվանդություններից տառապողների համար ջուրն անհրաժեշտություն է, քանի որ օգնում է ջրիկացնել արյունը: Օրգանիզմում հեղուկի ոչ բավարար քանակությունը վատացնում է սրտի ու անոթների աշխատանքը և կարող է դառնալ զարկերակային ճնշման վատացման պատճառ: Բացի այդ, թանձ արյունը նաև նպաստում է թրոմբների առաջացմանը: Սակայն հարկ է հիշել, որ անհրաժեշտ է խմել հասարակ ջուր, այլ ոչ թե քաղցր թեյ կամ գազավորված ըմպելիքներ: Բացի այդ, հարկավոր է սահմանափակել նաև աղի գործածությունը, որը նպաստում է օրգանիզմում հեղուկի կուտակմանը՝ բարձրացնելով արյան ճնշումը:

Նյութի աղբյուրը՝ aif.ru