Ինչ է քրոնիկ փորլուծությունը և որոնք են դրա առաջացման պատճառներն ու հետևանքները

14:43 • 29.08.17

Փորլուծությունն ամենատարածված խնդիրներից է, որը դրսևորվում է աղիները հաճախակի մաքրելու ցանկությամբ, նոսր արտաթորանքով, որովայնի ցավերով ու Էնկոպրեզով (կղանքի անպահություն):

Սուր փորլուծությունը կարող է տևել մինչև երկու շաբաթ և պայմանավորված է լինում կեղտոտ կամ փչացած սննդի ու ջրի մեջ պարունակվող վիրուսներով ու բակտերիաներով:

Եթե սուր փորլուծությունը շարունակվում է նույնիսկ երկու շաբաթ անց, ապա այն վերածվել է քրոնիկականի: Քրոնիկ փորլուծությունից տառապում է երկրի հասուն բնակչության 7-14%-ը: Սա կարող է լինել այնպիսի լուրջ հիվանդությունների ախտանշան, ինչպիսին են պանկրեատիտը, քրոնիկ հապատիտները, լեղապարկի հիվանդությունները և այլն: Բացի այդ, քրոնիկ փորլուծությունը կարող է առաջանալ նաև երկար ժամանակ հակաբիոտիկներ ընդունելու դեպքում:

Փորլուծությունը կարող է վտանգավոր լինել, քանի որ առաջացնում է ջրազրկում, ինչի հետևանքով օրգանիզմը չի ստանում անհրաժեշտ միկրոտարրերը: Հաճախ այս հիվանդության պատճառով մարդիկ տառապում են վիտամինային կամ հանքանյութային անբավարարությունից, ինչը կարող է դառնալ անեմիայի (սակավարյունություն), մկանային ջղաձգումների, տոքսիկ շոկի և նույնիսկ կոմայի պատճառ:

Հասուն մարդկանց մոտ սուր փորլուծություն առաջանում է տարեկան միջինում 1 անգամ, իսկ երեխաների մոտ՝ 2: Սա կարող է շատ վտանգավոր լինել երեխաների համար: Տարեկան աշխարհում մինչև 5 տարեկան մոտ 1.5 մլն երեխա է մահանում փորլուծության հետևանքով:

Շատ հաճախ փորլուծությունը պայմանավորված է լինում նոր տարածաշրջան կամ երկիր կատարած ուղևորությամբ: Վիճակագրությունը ցույց է տվել, որ սովորաբար այս խնդրին բախվում են ճանապարհորդների 20-50%-ը:

Սովորաբար փորլուծությունը բուժվում է առանց որևէ միջամտության 2 օրվա ընթացքում: Նման խանգարման դեպքում քաղցած մնալն այդքան էլ ճիշտ չէ: Այս ընթացքում կարելի է ուտել խաշած բրինձ, բանան, խնձորի խյուս, սպիտակ հացից պատրաստված չորահացեր կամ անյուղ մսից պատրաստված կոտլետներ (խաշած կամ շոգեխաշած):

Նյութի աղբյուրը՝ aif.ru