11 ախտանշան, որոնք վկայում են հիպոթիրեոզի մասին

Մշտական թուլությունն ու վատ տրամադրությունը կարող են լինել վահանաձև գեղձի հետ կապված խնդիրների նշան, սակայն մարդիկ ոչ միշտ են դա ժամանակին նկատում ու պաշաճ ուշադրություն դարձնում:

Մարդկային օրգանիզմը շատ փխրուն համակարգ է և որևէ չնչին խանգարումն անգամ կարող է անկանխատեսելի հետևանքներ ունենալ: Օրգանիզմում տեղի ունեցող գործընթացները կարգավորող հիմնական գործոններից մեկը հորմոններն են, որոնք ազդում են որ միայն ֆիզիկական վիճակի, այլև տրամադրության վրա: Հաճախ վահանաձև գեղձի աշխատանքի խանգարումները լուրջ հետևանքներ են ունենում, ուստի դրանց ախտանշաններն իմանալը շատ կարևոր է:

Վահանաձև գեղձը գտնվում է մարդու պարանոցի առջևի հատվածում և արտադրում է օրգանիզմի աշխատանքի համար շատ կարևոր հորմոններ: Այդ հորմոններն ազդում են գլխուղեղի, սրտամկանի, լյարդի, մկանների և մյուս օրգանների աշխատանքի վրա:

Այն վիճակը, որի դեպքում վահանաձև գեղձը չի արտադրում անհրաժեշտ քանակությամբ հորմոններ, անվանվում է հիպոթիրեոզ: Այս հիվանդության առաջացման հիմնական պատճառներն են ռադիացիան ու աուտոիմունային հիվանդությունները: Բացի այդ, գեղձը կարող է բորբոքվել վարակների կամ յոդի պակասի հետևանքով: Մարդկային մարմինը չի կարող ինքնուրույն յոդ արտադրել, ուստի յոդով հարուստ սննդամթերք օգտագործելը շատ կարևոր է: Նման սննդամթերքի շարքին են դասվում ելակը, սպիտակ լոբին, յոգուրտը, կարտոֆիլը, լոռամիրգը և այլն:

Հիպոթիրեոզը չբուժելը կարող է հանգեցնել դեպրեսիայի, սրտային անբավարարության և անգամ կոմայի: Սակայն հիվանդությունը ժամանակին ախտորոշելու դեպքում դրանից կարելի է հեշտությամբ ազատվել դեղամիջոցների օգնությամբ: Ախտորոշման համար պարզապես հարկավոր է արյան անալիզ հանձնել:

Սակայն կան նաև հիպոթիրեոզի մասին վկայող ախտանշաններ, որոնք կօգնեն ավելի շուտ ախտորոշել հիվանդությունը: Պարզապես հարկավոր է մի փոքր ավելի ուշադիր լինել օրգանիզմի տված ազդանշանների հանդեպ:

Հիպոթիրեոզի ախտանշաններն են.

·        թուլությունը, քնկոտությունն ու հոգնածության զգացումը,

·        չոր ու կոշտ մազերը, չոր ու գունատ մաշկը,

·        այտուցները, որոնք հիմնականում ի հայտ են գալիս դեմքի հատվածում,

·        կոկորդի այտուցվածության հետևանքով խռպոտացած ձայնը,

·        ցրտի հանդեպ անհանդուրժողականությունը,

·        հաճախակի փորկապությունը,

·        հիշողության կորուստը,

·        կանանց մոտ դաշտանային ցիկլի խանգարումները,

·        դեպրեսիան (ընկճախտ),

·        մկանային ջղաձգումներն ու ցավերը,

·        ձեռքերի ու ոտքերի սառնությունը:

Հարկ է նշել, որ յուրաքանչյուր հիվանդի մոտ ախտանշանները կարող են տարբեր լինել: Ոմանց մոտ հիպոթիրեոզը դրսևորվում է նշված ախտանշաններից միայն որևէ մեկով, իսկ ոմանց մոտ՝ մի քանիսով, սակայն ցանկացած դեպքում հարկավոր է խորհրդակցել բժշկի հետ:

Նյութի աղբյուրը՝ marketium.ru