10 ախտանշան, որոնք վկայում են գլյուտենի հանդեպ օրգանիզմի անհանդուրժողականության մասին

Մարդը պետք է անպայման ստուգի սնձանի (գլյուտեն) հանդեպ օրգանիզմի զգայունությունը, որը նաև անվանվում է գլյուտենի հանդեպ անհանդուրժողականություն, քանի որ միայն այդ կերպ կարելի է հասկանալ, թե ինչ փոփոխություններ է հարկավոր անել սննդակարգում:

Գոյություն ունի գլյուտենի հետ կապված ավելի քան 55 հիվանդություն:  Սնձանը սպիտակուց է, որը պարունակվում է ցորենի, աշորայի և գարու բաղադրության մեջ:

Կան մի շարք ախտանշաններ, որոնք կարող են հուշել սնձանի հանդեպ անհանդուրժողականության մասին: Ձեր ուշադրությանն ենք ներկայացնում այդ ախտանշաններից մի քանիսը: Եթե գլյուտեն պարունակող որևէ մթերք օգտագործելուց հետո մարդը նկատում է նշված ախտանշաններից գոնե 4-ը, ապա հարկավոր է փոխել սննդակարգը:

1.      Մարսողության հետ կապված խնդիրներ

Գլյուտենի հանդեպ օրգանիզմի անհանդուրժողականության ամենատարածված ախտանշանը մարսողության հետ կապված խնդիրներն են, ինչպիսին են գազերը, փորափքանքը, փորկապությունն ու փորլուծությունը, որոնք հաճախ առաջանում են գլյուտեն պարունակող սննդամթերք օգտագործելուց հետո:

2.      Տրամադրության հետ կապված խնդիրներ

Տրամադրության հետ կապված խնդիրները նույնպես կարող են վկայել սնձանի հանդեպ անհանդուրժողականության մասին: Այդ խնդիրները կապված են անհանգստության, դեպրեսիաների, ուշադրության պակասի և հիպերակտիվության համախտանիշի ու տրամադրության տատանումների հետ: Սակայն այս խնդիրների մի մասից կարելի է հեշտությամբ ազատվել՝ պարզապես սննդակարգից գլյուտեն պարունակող սննդամթերքը բացառելով:

3.      Մաշկային ցան

Մաշկային հիվանդությունները կարող են ուղղակիորեն կապված լինել գլյուտենի օգտագործման հետ: Կարող է առաջանալ քոր եկող ցան, որը սովորաբար ի հայտ է գալիս ձեռքերի, դեմքի, իրանի, նստատեղի, արմունկների և գլխամաշկի հատվածում:

4.      Միգրեն

Փորլուծության ժամանակ առաջացող գլխացավերը կամ միգրենը կարող են տարբեր լինել,սակայն եթե ցավն ի հայտ է գալիս գլյուտեն պարունակող սննդամթերք օգտագործելուց 1-2 ժամ անց, ապա խնդիրը սնձանի հանդեպ զգայունության մեջ է:

5.      Հոգնածության զգացում

Մշտական հոգնածության զգացումը, որն ուղեկցվում է աղեստամոքսային համակարգի խնդիրներով (հատկապես՝ փորլուծությամբ), վկայում է գլյուտենի հանդեպ զգայունության մասին: Սա պայմանավորված է լինում նրանով, որ օրգանիզմը չի կարողանում կլանել սննդարար նյութերն ու վիտամիններն ընդունած սննդից:

6.      Հոդացավեր

Գլյուտեն պարունակող սննդամթերքն օրգանզիմում բորբոքումներ է առաջացնում, որոնք էլ դառնում են հոդացավերի առաջացման պատճառ: Հաճախ այդ հոդացավերը սխալմամբ ախտորոշվում են որպես ռևմատոիդ արթրիտ, մինչդեռ դրանք սնձանի հանդեպ օրգանիզմի անհանդուրժողականության տարածված ախտանշաններից են:

7.      Կաթնաշաքարի (лактоза) հանդեպ օրգանիզմի անհանդուրժողականություն

Եթե ի հայտ են գալիս խնդիրներ՝կապված  կաթնաշաքար պարունակող սննդամթերքի յուրացման հետ, ապա կարող են առաջանալ նաև խնդիրներ՝ կապված գլուտենի յուրացման հետ, ուստի կաթնաշաքարի հանդեպ անհանդուրժողականության դեպքում խորհուրդ է տրվում հրաժարվել նաև գլյուտեն պարունակող սննդամթերքից:

8.      Խնդիրներ՝ կապված վիտամինների յուրացման հետ

Սա գլյուտենի հանդեպ անհանդուրժողականության տարածված ախտանշաններից մեկն է: Եթե օրգանիզմը չի կարողանում կլանել ընդունած սննդի մեջ պարունակվող օգտակար վիտամիններն ու հանքանյութերը, ապա դա կարող է վկայել սնձանի հանդեպ զգայունության մասին: Բացի այդ, սնձանի հանդեպ օրգանիզմի անհանդուրժողականության մասին վկայող տարածված ախտանշաններից կարող է լինել նաև օրգանիզմում երկաթի ցածր մակարդակը:

9.      Հորմոնալ դիսբալանս

Հորմոնալ դիսբալանսի հետևանքով առաջացած խնդիրները, ինչպիսին են անպտղությունը, ձվարանների պոլիկիստոզային համախտանիշը և անկանոն դաշտանը, նույնպես կապված են սնձանի հանդեպ անհանդուրժողականության հետ: Բանն այն է, որ գլյուտենն առաջացնում է բորբոքում, որն ազդում է մակերիկամների վրա, ինչն էլ խանգարում է ամբողջ օրգանիզմի և ներզատական համակարգի բալանսը:

10.  Նյարդաբանական ախտանշաններ

Նյարդաբանական համախտանիշների շարքին են դասվում գլխապտույտը, հավասարակշռության պահպանման հետ կապված խնդիրները, թմրածությունն ու ծակծկոցը, որոնք վկայում են նյարդային համակարգում գլյուտենի օգտագործմամբ պայմանավորված բորբոքումների մասին:

Նյութի աղբյուրը՝ positivemed.com