Ինչպես խուսափել երակների վարիկոզ լայնացումից

Հաճախ մարդկանց հետաքրքրում է, թե ինչ է հարկավոր անել՝ հետագայում երակների վարիկոզ լայնացումից խուսափելու համար: Բժիշկները Նշում են, որ հիվանդները շատ հաճախ մասնագետի օգնությանն են դիմում, երբ հիվանդությունն արդեն չափազանց խորացած է լինում: Սակայն նրանցից շատերը պարզապես չգիտեն, թե որ ախտանշանների դեպքում է պետք անհանգստանալ, և հաճախ ուշադրություն չեն դարձնում թվացյալ անկարևոր խնդիրներին:

Հարկ է հիշել, որ ոտքերի այտուցվածության, ծանրության զգոցողության, այրոցի, ցավի ու սրունքի մկանների ձղաձգումների դեպքում անհրաժեշտ է դիմել թերապևտին, իսկ եթե կան ակնհայտ մեծացած երակներ՝ երակաբանին:

Օրվա ընթացքում ժամանակի մեծ մասը նստած անցկացնող մարդկանց մոտ երեկոյան կարող են առաջանալ այտույցներ, որոնք ոչ մի դեպքում չի կարելի անտեսել և վերագրել մտացածին պատճառներին, քանի որ շատ հնարավոր է, որ դրանք լինեն երակների վարիկոզ լայնացման պատճառ:

Ստորին վերջույթների արյան հոսքը հիմնականում իրականացվում է մկանաերակային պոմպի շնորհիվ: Դրանք սրունքի մկաններն ու դրանցում գտնվող խորը երակներն են: Եթե մարդու հագին ճիշտ կոշիկ է, ապա ոտնաթաթի շարժման շնորհիվ մկանները կծկվում են, սակայն եթե կինն ամբողջ օրը բարձրակրունկ կոշիկներով է, այդ շարժումները բացակայում են և փաստացի մկանները պարզապես լարված են: Սա «անոթային ֆունկցիոնալ անբավարարության» մեխանիզմներից մեկն է, որը հանգեցնում է նախ արյան լճացման, իսկ այնուհետև՝ կոճերի կապտախտության: Որպեսզի մկանն աշխատի, կոշիկի կրունկը պետք է լինի 4 սմ-ից ոչ ավել, սակայն հարկավոր է նաև հրաժարվել առանց կրունկի կոշիկներից:

Եթե հիվանդի մոտ հայտնաբերվել է երակների վարիկոզ լայնացում, ապա օգնության կհասնեն բուժման բազմաթիվ միջոցները: Հնարավոր է նաև, որ նշանակվի սեղմող ներքնազգեստ, որը զգալիորեն կպաշտպանի հիվանդության խորացումից: Այս ներքնազգեստը շատ հարմարավետ է ու որակյալ: Բժիշկները խորհուրդ են տալիս կանխարգելիչ նպատակներով կրել նման ներքնազգեստ երկարատև ճանապարհորդությունների ժամանակ: Այն նաև խորհուրդ է տրվում այն մարդկանց, որոնք ստիպված են երկար ժամանակ անցկացնել կանգնած:

Արյան շրջանառությունը բարելավելու համար խորհուրդ է տրվում մարզվել: Կարելի է նաև աշխատավայրում յուրաքանչյուր 2-3 ժամը մեկ մի քանի հարկ ոտքով իջնել և բարձրանալ: Եթե սպորտով զբաղվելու ժամանակ չկա, ապա անհրաժեշտ է ամեն օր առնվազն 4 կմ քայլել կամ գոնե 15-20 րոպե ցատկոտել:

Բացի այդ, շատ մեծ նշանակություն ունի նաև մարդու քաշը և որքան այն մեծ է, այնքան ավելի դժվար է երակների համար կատարել իրենց գործառույթները: Սա է պատճառը, որ հարկավոր է նաև կարգավորել սննդակարգը, ինչն, ի դեպ, օգտակար կլինի նաև մյուս բոլոր օրգանների համար:

Հարկ է նաև հիշել, որ երակների վարիկոզ լայնացման ամենաչնչին ախտանշանի առկայության դեպքում էլ անհրաժեշտ է խորհրդակցել երակաբանի հետ: Բացի այդ, հարկավոր է նաև տարվա ընթացքում երկու անգամ պրոֆիլակտիկ բուժզննում անցնել և հետևել մասնագետի բոլոր խորհուրդներին՝ հետագայում բարդություններից խուսափելու համար:

Նյութի աղբյուրը՝ aif.ru