Ռուսաստանում «խոզի գրիպի» համաճարակ է սպասվում. համաճարակաբաններ

Սովորաբար գրիպի ու սուր շնչառական վարակների համաճարակները սկսվում են նոյեմբեր կամ դեկտեմբեր ամիսներին և առաջին հերթին վարակվում են նախադպրոցական տարիքի երեխաները: Սակայն համաճարակը կարող է սկսվել նաև այլ ժամանակահատվածում:

Գիտնականները կարծում են, որ այս տարի Ռուսաստանում կտարածվի H1N1 վիրուսը, որը հայտնի է նաև «խոզի գրիպ» կամ «Միչիգան» տիպ անվանմամբ: Համաճարակաբանների կանխատեսումներով՝ համաճարակը սպասվում է նոյեմբերի վերջին կամ դեկտեմբերի սկզբին: 2009 թվականին մարդկությունն արդեն բախվել է այս վիրուսին, որն այդ ժամանակ բազմաթիվ մարդկանց կյանքեր խլեց: Բանն այն է, որ այս շտամը շատ կայուն է պրոֆիլակտիկ ու թերապևտիկ միջոցների նկատմամբ և շատ արագ տարածվում է:

Սակայն միևնույն ժամանակ մասնագետները վստահեցնում են, որ խուճապի մատնվելու կարիք չկա, քանի որ հնարավոր չէ հստակ կանխատեսումներ տալ: Բացի այդ, ցանկացած շտամի դեպքում կօգնի պատվաստանյութը:

Ռուսաստանի համաճարակաբանական վերահսկողության բաժնի պետ Միխայիլ Բերնշտեյնի խոսքով՝ իրենք կարծում են, որ մարդիկ կբախվեն ինչպես «A», այնպես էլ «B» խմբի վիրուսներին: Վիրուսի տեսակները կարող են շատ լինել: Բացի այդ, մարդիկ արդեն բախվել են վիրուսի այս տեսակին: Ինչպես նշում է մասնագետը՝ ամեն տարի պատվասվելու պատճառն այն, է, որ գրիպը փոփոխական վիրուս է, ուստի պատվաստանյութի բաղադրությունն էլ ամեն տարի փոխվում է: Բացի այդ, պատվաստանյութը պաշտպանում է միայն որոշ ժամանակահատված:

«Միչիգանն» ավելի ագրեսիվ է, քան գրիպի այլ տեսակները: Այն հաճախ է առաջացնում բարդություններ, որոնցից մեկը կարող է լինել թոքաբորբը: Եթե սովորական մրսածության դեպքում, այն սկսվում է հիվանդության 4-5-րդ օրերին, ապա գիրիպի դեպքում առաջին երեք օրվա ընթացքում: Բացի այդ, այն ուղեկցվում է սուր շնչական դիսթրես համախտանիշով, ինչը խիստ վտանգավոր է և կարող է մահացու լինել:

Ռիսկային խմբում են գտնվում  փոքր երեխաները, հղի կանայք, 60 տարեկանից բարձր մարդիկ, ինչպես նաև թոքերի և սրտանոթային համակարգի հիվանդություններից, շաքարային դիաբետից, ճարպակալումից տառապողները:

Սովորաբար պատվաստումն արվում է նախապես, քանի որ իմունիտետի ձևավորման համար առնվազն 10-14 օր է հարկավոր: Պատվաստանյութն անվնաս է և պարունակում է գրիպի վիրուսի արդիական շտամները:

Այնուամենայնիվ՝ շատերը մինչ օրս թերահավատորեն են վերաբերվում պատվաստմանը: Հաճախ մարդիկ նշում են, որ հիվանդացել են անմիջապես պատվաստանյութի ներարկումից հետո, սակայն հարկ է հիշել, որ պատվաստանյութը երբեք չի կարող դառնալ վարակման պատճառ, քանի որ այն չի պարունակում կենդանի վիրուսներ, այլ միայն դրանց սպիտակուցային մասնիկները, ուստի նման դեպքերում դա ոչ թե գրիպ է լինում, այլ սուր շնչառական վարակ:

Նյութի աղբյուրը՝ chr.aif.ru