Եղնջացանի տեսակներն ու ախտանշանները, ինչպես նաև արդյունավետ ժողովրդական բաղադրատոմսեր դրանից ազատվելու համար

Եղնջացանը հիվանդություն է, որը կարելի է բուժել տնային պայմաններում, սակայն բուժման ընթացքում հարկավոր է պարբերաբար խորհրդակցել բժշկի հետ, քանի որ միայն նա գիտի թե ինչ է հարկավոր անել և ինչպես կարելի է ազատվել նման ախտաբանությունից:

Եղնջացանը մաշկային հիվանդություն է, որն առաջանում է ալերգիկ ռեակցիայի հետևանքով: Հիվանդության ախտանշանները բազմազան են: Հիվանդության մասին վկայող առաջին ախտանշաններից մեկը մաշկի վրա առաջացած բաց կարմիր գոյացություններն են:

Պատճառները

Հիվանդությունն ի հայտ է գալիս, որպես ալերգիկ ռեակցիայի հետևանք և դրսևորվում է շարակցական հյուսվածքների սուր այտուցվածությամբ: Նաև հարկ է նշել, որ Կվինկեի այտուցը հաճախ է ուղեկցվում ցանի այս տեսակով:

Եղնջացանը կարող է պայմանավորված լինել մի շարք գործոններով, որոնց շարքին են դասվում.

·         Ժառանգական հակվածությունը. այս դեպքում ամենից շատ վտանգված են այն մարդիկ, որոնց հարազատները տառապում են ալերգիաներից:

·         Աղեստամոքսային համակարգի օրգանների աշխատանքի խանգարումը. այս դեպքում օրգանիզմը չի կարողանում ազատվել կուտակված տոքսիկ նյութերից և առաջանում է եղնջացան: Բացի այդ, նման խնդրի առաջացման պատճառ կարող է դառնալ նաև փորկապությունը:

·         Հորմոնալ խանգարումը. նման խանգարումները նույնպես կարող են դառնալ ալերգիկ ռեակցիայի առաջացման պատճառ:

·         Վարակումները. իմունային համակարգը տարբեր կերպ է արձագանքում ախտածին միկրոֆլորայի ազդեցությանը և կարող է ի հայտ գալ նաև եղնջացան:

·         Մակաբուծային վարակ. մակաբույծները մարդու օրգանիզմում արտազատում են հատուկ ֆերմենտներ, որոնք խանգարում են ստամոքսի, աղիների և մյուս օրգանների աշխատանքը: Այս ամենի հետևանքով կարող է առաջանալ ոչ միայն եղնջացան, այլև մի շարք այլ լուրջ խնդիրներ:

·         Դեղամիջոցների երկարատև ընդունումը. հիմնականում սա կապված է լինում հակաբիոտիկ դեղամիջոցների ընդունման հետ, սակայն սուր ալերգիկ ռեակցիա կարող է առաջանալ նաև այլ դեղամիջոցների հետևանքով:

Դասակարգումը

Այս հիվանդությունն ունի տարբեր դասակարգումներ, սակայն հիմնականում դիտարկվում են եղնջացանի հետևյալ տեսակները.

Սուր

Հիվանդության ախտանշանները կտրուկ են ի հայտ գալիս: Այն բնորոշվում է տարբեր չափերի ու ձևերի լավ եզրագծված տարրերով: Ժամանկին չբուժելու դեպքում մաշկային գոյացությունները կարող են միաձուլվել, ինչի հետևանքով մեծանում է ախտահարման տարածքը: Բացի այդ, սուր եղնջացանը բնորոշվում է.

·         մարմնի ջերմաստիճանի բարձրացմամբ,

·         դողով,

·         ինքնազգացողության ընդհանուր վատացմամբ,

·         աղեստամոքսային համակարգի օրգանների աշխատանքի խանգարմամբ:

Եթե ցանը կոկորդի կամ լորձաթաղանթի հատվածում է, հիվանդը կարող է սկսել դժվարությամբ կուլ տալ սնունդն ու հեղուկը: Կարմրությունը հիմնականում նկատվում է վերջույթների, նստատեղի և իրանի մաշկի հատվածում:

Սուր ձևը դրսևորվում է իր կարճատևությամբ: Սովորաբար ցանն անհետանում է հայտնվելուց մի քանի ժամ հետո, սակայն հազվադեպ այն կարող է պահպանվել 2-4 օր:

Քրոնիկ

Եղնջացանի այս տեսակը զարգանում է երկար ժամանակահատվածում՝ օրգանիզմի վրա այնպիսի նյութերի ազդեցության հետևանքով, որոնց հանդեպ հիվանդի մոտ նկատվում է գերզգայունություն: Հիմնականում քրոնիկ եղնջացանն առաջանում է երկարատև վարակիչ հիվանդությունների, լյարդի կամ երիկամների գործառույթների խանգարման և այլ խնդիրների հետևանքով:

Այս տեսակը բնորոշվում է նրանով, որ ախտանշաններն ի հայտ են գալիս պարբերաբար՝ ռեցիդիվների ժամանակ: Բացի այդ, ցանը նույնպես այդքան առատ չի լինում: Այս դեպքում նկատվում են հետևյալ ախտանշանները.

·         ընդհանուր թուլություն,

·         բարձր ջերմություն,

·         ցավոտ զգացողություններ հոդերի հատվածում,

·         գլխացավ,

·         սրտխառնոցի և փսխումի նոպաներ (լորձաթաղանթների ախտահարման դեպքում),

·         անտանելի մաշկային քոր, որի հետևանքով առաջանում են նյարդային խանգարումներ ու անքնություն:

Պզուկային

Եղնջացանի այս տեսակի ախտանշանները բնորոշվում են մաշկի վրա փոքրիկ բշտիկների առաջացմամբ: Նման գոյացություններին ուղեկցում է կայուն այտուցը, հիպերպիգմենտացիան և մաշկի վերին շերտերի հաստացումն ու կոշտացումը: Հիմնականում բշտիկներն առաջանում են վերջույթների ծալվող հատվածներում, ունենում են կարմրադարչնագույն երանգ և սովորաբար ի հայտ են գալիս կանանց մոտ:

Եղնջացանի բուժումը տնային պայմաններում

Եղնջացանը սովորաբար լինում է մեկ այլ հիվանդության հետևանք, ուստի մինչ այն բուժելը հարկավոր է խորհրդակցել բժշկի հետ և պարզել դրա առաջացման պատճառը: Միայն հատուկենտ դեպքերում է եղնջացանը դրսևորվում որպես առանձին հիվանդություն:

Հիվանդության բուժման համար հարկավոր է նախ բուժզննում անցնել, այնուհետև ազատվել ալերգենի ազդեցությունից: Հաճախ եղնջացանի ժամանակ հիվանդին նշանակվում են հակահիստամինային դեղամիջոցներ: Բացի այդ, խորհուրդ է տրվում նաև շատ հեղուկ օգտագործել, քանի որ մեծ քանակությամբ հեղուկն արագացնում է օրգանիզմից տոքսինների դուրսբերման գործընթացը:

Սակայն եղնջացանի բուժումը կախված է դրա առաջացման պատճառից: Եթե եղնջացանն առաջացել է հելմինտների հետևանքով, ապա նշանակվում են հակահելմինտային դեղամիջոցներ: Նաև խորհուրդ է տրվում ընդունել վիտամիններ և այլ օգնող դեղամիջոցներ: Սակայն հարկ է հիշել, որ ցանկացած դեղամիջոցի չափաբաժինն ու թերապիայի տևողությունը պետք է նշանակի միայն համապատասխան մասնագետը:

Գոյություն ունեն նաև բազմաթիվ ժողովրդական մեթոդներ, որոնք օգնում են ազատվել եղնջացանից: Դրանց շաքին են դասվում հետևյալները.

·         Սառեցում. հարկավոր է սառույցով շփել ախտահարված հատվածները, ինչի շնորհիվ արյունատար անոթները նեղանում են և արդյունքում նվազում է այտուցվածությունը և անհետանում է քորը:

·         Կամֆորայի յուղով լոսյոններ. այս լոսյոնները մեղմում են քորն ու այրոցի զգացումը: Կարելի է նաև օրական երեք անգամ կերակրի սոդա կամ մագնեզիում ընդունել:

·         Կոնտրաստային ցնցուղ. այս պրոցեդուրան թույլատրվում է անցկացնել օրական առավելագույնը երեք անգամ: Այն թույլ է տալիս ազատվել մաշկի թեփոտվածությունից ու քորից:

·         Հրաժարվել մարզումներից. բուժման ընթացքում հարկավոր է հրաժարվել ֆիզիկական ծանրաբեռնվածությունից, քանի որ դրանք խթանում են քրտնարտադրությունը, որն էլ ևս մի գրգռիչ գործոն է:

Ժողովրդական բաղադրատոմսեր

Եղնջացանից ազատվելու համար գոյություն ունեն մի շարք շատ արդյունավետ բաղադրատոմսեր, որոնց հիմնական բաղադրիչները դեղաբույսերն են: Ձեր ուշադրությանն ենք ներկայացնում դրանցից մի քանիսը:

Անանուխ

4 թեյի գդալ անանուխին ավելացնել 250 մլ եռման ջուր, մեկ ժամ թրմել, այնուհետև ստացված թուրմն ընդունել օրական երեք անգամ՝ առավելագույնը 50-ական մլ:

Եղինջ

Ոգեթուրմի պատրաստման համար հարկավոր է երկու ճաշի գդալ չորացրած եղինջ և կես լիտր օղի: Խառնուրդն անհրաժեշտ է թրմել 7 օր որևէ մութ վայրում: Պատրաստի ոգեթուրմը հարկավոր է խմել ուտելուց առաջ՝ մեկ թեյի գդալ:

Ճակնդեղ

Բույսը բարակ շերտերով կտրատել, լցնել երկու լիտր տարողությամբ տարրայի մեջ, այնուհետև ավելացնել գոլ ջուր և թրմել մեկ շաբաթ: Թուրմը կարելի է ինչպես խմել (օրական մեկ անգամ՝ մեկ թեյի գդալ), այնպես էլ օգտագործել ախտահարված մաշկը շփելու համար:

Խմոր

Հարկավոր է պատրաստել ոչ շատ պինդ խմոր, ավելացնել 100 գրամ օշինդր և ստացված խառնուրդը թողնել մոտ 40 րոպե: Այնուհետև խմորն անհրաժեշտ է դնել ախտահարված հատվածներին: Խմորի մնացորդները կարելի է լվանալ գոլ ջրով:

Նեխուր

Նեխուրն օգտագործվում է որպես միզամուղ միջոց: Այս բույսն օժտված է նաև հակաբորբոքային հատկություններով: Բուժիչ միջոցի պատրաստման համար հարկավոր է պարզապես տրորել նեխուրը և քամել հյութը մառլյայի միջոցով: Ստացված հյութն անհրաժեշտ է խմել ուտելուց առաջ՝ մեկական ճաշի գդալ: Այս միջոցը կարելի է օգտագործել օրական առավելագույնը երեք անգամ:

Հում կարտոֆիլ

Հում կարտոֆիլը նույնպես շատ օգտակար է եղնջացանի դեպքում: Հարկավոր է այն բարակ շերտերի բաժանել, դնել դրանք ախտահարված մաշկին և թողնել կես ժամ:

Մարեմխոտ (майоран)

Այս բույսը նույնպես օժտված է հակաբորբոքային հատկություններով: Հարկավոր է մարեմխոտի թուրմն ավելացնել լոգանքի ջրին, իսկ թուրմը պատրաստելու համար անհրաժեշտ է 500 գրամ մարեմխոտը թրմել 5 լիտր եռման ջրում:

Նաև հարկ է հիշել, որ այս հիվանդության բուժման հարցում շատ մեծ նշանակություն է ունենում հատուկ սննդակարգը: Եղնջացանի ժամանակ հարկավոր է հրաժարվել սննդամթերքի այն տեսակներից, որոնք կարող են դառնալ ալերգիկ ռեակցիայի պատճառ: Նման սննդամթերքի շարքին են դասվում ցիտրուսային մրգերը, հավկիթը, երշիկեղենը, ճարպոտ սնունդը և այլն:

Նյութի աղբյուրը՝ kozhica.ru