Երկու սրտերի կապը. հղիության առանձնահատկություններն ու պտղի զարգացման ընթացքը

Գիտական տեսանկյունից՝ նոր կյանքի սկիզբը համարվում է երկու փոքրիկ բջիջների միացումը: Այնուհետև հղիության ողջ ընթացքում տեղի են ունենում տարբեր փոփոխություններ, որոնք այդ բջիջները վերածում են մարդու: Այդ հնարավորինս կարճ ժամանակահատվածում նոր օրգանիզմը առավելագույնս զարգանում է: Փոքրիկին պահելու համար յուրօրինակ ինկուբատոր է համարվում նրա մայրն ու մոր օրգանիզմը:

Ներքին զարգացման ընթացքը համարվում է ամենապատասխանատու և անկանխատեսելի փուլը, քանի որ այդ ընթացքում երեխան ամբողջությամբ կազմավորվում է: Նույնիսկ մեկ բջջի վնասումը կարող է անուղղելի հետևանքներ ունենալ պտղի համար: Սա է պատճառը, որ անհրաժեշտ է պարբերաբար ստուգվել բժշկի մոտ և լինել շատ ուշադիր: Հարկ է հիշել, որ երեխայի ու մոր առողջությունը կախված է հղիության ընթացքից, ուստի հարկավոր է հոգ տանել երեխայի մասին դեռևս հղիության վաղ փուլերից:

Հղիության ընթացքը բաժանվում է երեք եռամսյակի, որոնցից յուրաքանչյուրի ընթացքում կանայք իրենց տարբեր կերպ են զգում՝ հուզվում են, անհանգստանում, զարմանում, ուրախանում և այլն: Սակայն կարող է նաև առաջանալ հղիության ընդհատման վտանգ՝ մոր վիճակի կամ արտաքին գործոնների հետևանքով: Այդ իսկ պատճառով՝ հղիության առաջին 12 շաբաթը հատկապես կարևոր են: Հաճախ հղի կանայք շատ դժվարությամբ են դիմանում սրտխառնոցին, փսխումին ու գլխապտույտներին և գտնվում են մշտական սթրեսային վիճակում: Այս ընթացքում կարող է փոխվել ճաշակը, իսկ նախասիրությունները սննդի մեջ դառնում են շատ տարբեր: Բացի այդ, այս ժամանակահատվածում են սկսում կազմավորվել պտղի օրգանները: Անհրաժեշտ է սննդակարգի մեջ ներառել վիտամիններով հարուստ սնունդ կամ ընդունել վիտամինային կոմպլեքսներ ու հանքանյութեր:

Հաջորդ եռամսյակի երկրոդ կեսից արդեն սկսում է նկատվել մոր փորիկը: Շատ կանանց մոտ ի հայտ է գալիս պորտից ձգվող շագանակագույն գիծ: Երեխան սկսում է մեծանալ և շարժվել, իսկ մայրը սկսում է նկատել դա, սակայն ոչ միշտ է կարողանում հստակ զգալ առաջին շարժումները:

Վերջին եռամսյակում շատ կանայք զգում են ուժի և էներգիայի մակարդակի բարձրացում, քանի որ բոլոր տհաճ զգացողություներն անցնում են և օրգանիզմն արդեն այդքան մեծ սթրեսի չի ենթարկվում: Ի հայտ են գալիս ծննդաբերության առաջին նշանները՝ այսպես կոչված կեղծ ցավերը: Ծննդաբերության ժամանակ մեծ նշանակություն է ունենում նաև մանկաբարձ-գինեկոլոգի փորձն ու ապագա մայրիկի էմոցիոնալ վիճակը: Այս բոլոր գործոնները հնարավորություն են տալիս լույս աշխարհ բերել առողջ փոքրիկ: Մնում է միայն ընդունել շնորհավորանքները:

Նյութի հեղինակը՝ Էդուարդ Շինկին

Նյութի աղբյուրը՝ trental.ru