Կալիումի օգտակար հատկությունները և ինչ խնդիրներ կարող են առաջանալ օրգանիզմում այս տարրի դեֆիցիտի պատճառով

Կալիումը շատ կարևոր սննդարար նյութ է, որի պակասը կարող է առողջական լուրջ խնդիրներ առաջացնել: Այն մասնակցում է օրգանիզմում տեղի ունեցող բազմաթիվ գործընթացներին և որոշիչ նշանակություն ունի առողջական վիճակի բարելավման հարցում:

Այս նյութն օգնում է կախել ու բուժել գլխուղեղի կաթվածը, արյան գերճնշումը, երիկամների հիվանդությունները, անհանգստությունն ու սթրեսը, ինչպես նաև նպաստում է նյարդային համակարգի առողջության պահպանմանը, ջրային բալանսի կարգավորմանը, նյութափոխանակության գործընթացների ապահովմանն ու մկանային ուժի պահպանմանը: Օրական խորհուրդ է տրվում ընդունել 4 գրամ կալիում, մինչդեռ տղամարդիկ ստանում են 3 գրամ, իսկ կանայք՝ ընդամենը 2,5 գրամ:

Օրգանիզմում կալիումի ցածր մակարդակի հետևանքով կարող են առաջանալ այնպիսի առողջական խնդիրներ, ինչպիսին են արյան գերճնշումը, աղերի հանդեպ զգայունությունը, ոսկորների վիճակի վատացումը և այլն:

Բացի այդ, կալիումի դեֆիցիտի հետևանքով կարող է բարձրանալ սրտանոթային հիվանդությունների առաջացման հավանականությունը: Կալիումի քրոնիկ դեֆիցիտը կարող է առաջացնել առիթմիա, մկանային սպազմներ, խնդիրներ՝ կապված ստամոքսի հետ, հոգնածության զգացում, թուլություն և գլյուկոզայի նկատմամբ անհանդուրժողականություն:

Կալիումի օգտակար հատկությունները

Օգնում է կանխել գլխուղեղի կաթվածը

Կալիումն օգնում է պահպանել գլխուղեղի առողջ գործառնությունը, իսկ օրգանիզմում դրա բարձր մակարդակը նպաստում է գլխուղեղի բջիջները թթվածնով հագեցնելուն, մարդու մտավոր կարողությունների բարելավմանն ու նեյրոնային ակտիվության խթանմանը: Հաշվի առնելով, որ կալիումն ազդում է որպես անոթները լայնացնող միջոց՝ այն թուլացնում է արյունատար անոթները, ինչի շնորհիվ արյունը հեշտությամբ է հոսում և նվազում է կուտակումների ու գլխուղեղի կաթվածի առաջացման հավանականությունը:

Կարգավորում է զարկերակային ճնշումը

Անոթները լայնացնելու հատկության շնորհիվ՝ կալիումը նվազեցնում է արյունատար անոթների լարվածությունը, որն էլ արյան գերճնշման հիմնական պատճառներից է: Այն նաև վերահսկում է նատրիումի մակարդակը, որն էլ կարգավորում է զարկերակային ճնշումն ու նվազեցնում սրտային հիվանդույթունների առաջացման հավանականությունը:

Բարելավում է գլխուղեղի աշխատանքը

Կալիումն օգնում է պահպանել գլխուղեղի էլեկտրահաղորդականությունը, ինչն էլ նպաստում է ամբողջ մարմնով էլեկտրական հոսանքի տարածմանը: Այս նյութը նաև բարելավում է գլխուղեղի այնպիսի գործառույթները, ինչպիսին են հիշողությունն ու մտավոր կարողությունները, մինչդեռ կալիումի պակասը կարող է դառնալ առողջական լուրջ խնդիրների առաջացման պատճառ (օրինակ՝ էպիլեպսիայի):

Ազատում է անհանգստությունից ու սթրեսից

Կալիումը հայտնի է որպես հզոր հակասթրեսային միջոց, որը նպաստում է մտավոր կարողությունների զարգացմանը: Այն շատ օգտակար է նրանց համար, ովքեր տառապում են տարատեսակ հոգեկան խանգարումներից: Բացի այդ, մեծ քանակությամբ կալիում օգտագործելը նպաստում է օրգանիզմում տարատեսակ հորմոնների մակարդակի կարգավորմանը (օրինակ՝ կորտիզոլի և ադրենալինի):

Սրտի և երիկամների հիվանդություններ

Այս կարևոր նյութը մեծ նշանակություն ունի սրտի և երիկամների անխափան աշխատանքի համար: Բացի այդ, այն օգնում է երիկամներին ազատվել տոքսիկ նյութերից:

Այնուամենայնիվ՝ կալիումն ընդունելուց առաջ հարկավոր է անպայման խորհրդակցել բժշկի հետ, քանի որ կալիումի պատճառով օրգանիզմը կարող է չափից դուրս շատ կալցիում կլանել, ինչն էլ կարող է դառնալ երիկամների հետ կապված խնդիրների առաջացման պատճառ:

Նպաստում է ոսկորների առողջացմանը

Կալիումը չեզոքացնում է օրգանիզմում եղած թթուները և պահպանում է կալցիումը, ինչի շնորհիվ նպաստում է ոսկորների ամրությանն ու առողջությանը:

Պահպանում է մկանների առողջությունը

Կալիումը շատ մեծ նշանակություն ունի մկանների պարբերաբար կծկման համար, ինչը նշանակում է, որ բավարար քանակությամբ կալիում ստանալու դեպքում մկանները պարբերաբար կկծկվեն ու կթուլանան: Բացի այդ, կալիումն օգնում է նաև խուսափել մկանային ջղաձգումներից:

Ջրային բալանս ու էլեկտրոլիտներ

Ջրային բալանսն առանցքային նշանակություն ունի առողջության պահպանման հարցում, ուստի մարզումներից հետո միշտ խորհուրդ է տրվում բանան ուտել: Քրտնարտադրության միջոցով կորցրած էլեկտրոլիտների քանակը կարելի է լրացնել՝ կալիումով հարուստ մթերք օգտագործելով: Կալիումն ամենակարևոր էլեկտրոլիտն է, որին հաջորդում են կալցիումը, ֆոսֆորը, մագնեզիումը, նատրիումը:

Նյութափոխանակություն

Գիտականորեն ապացուցված է, որ կալիումը շատ մեծ նշանակություն ունի այն սպիտակուցների սինթեզի համար, որոնք ազդում են նյութափոխանակության, բջիջների աճի և հյուսվածքների ռեգեներացիայի վրա:

Կալիումով հարուստ սննդամթերքի շարքին են դասվում.

·        լոբազգիները,

·        մուգ կանաչ տերևավոր բանջարեղենը,

·        ջեռոցում եփված կարտոֆիլը,

·        ծիրանաչիրը,

·        յոգուրտը,

·        ավոկադոն,

·        ձուկը,

·        սնկերը,

·        բանանը:

Նյութի աղբյուրը՝ besthealthyguide.com