5 պարզ քայլ՝ դեմենցիայի (թուլամտություն) առաջացման հավանականությունը նվազեցնելու համար

15:14 • 18.11.17

Բնակչության թվի աճի հետ մեկտեղ աճում է նաև դեմենցիայից (թուլամտություն) տառապող մարդկանց թիվը: Այս հիվանդության ախտանշանների շարքին են դասվում հիշողության, կողմնորոշման ու խոսքի հետ կապված խնդիրները, ինչպես նաև հիվանդի անհատականության փոփոխությունը: Սակայն այս խնդրից կարելի է խուսափել կան գոնե նվազեցնել դրա առաջացման հավանականությունը՝ ժամանակին ճիշտ քայլեր ձեռնարկելով ու կենսակերպում փոփոխություններ անելով:

Ձեր ուշադրությանն ենք ներկայացնում 5 պարզ ու արդյունավետ միջոց, որոնք կօգնեն զգալիորեն նվազեցնել դեմենցիայի առաջացման հավանականությունը:

1. Շփվել մարդկանց հետ

Մարդկային գլխուղեղն ունի կոգնիտիվ խթանման կարիք, այլապես՝ մարդը չի կարողանա պահպանել իր մտավոր կարողությունները: Սա է պատճառը, որ հարկավոր է անընդհատ շփման մեջ լինել մարդկանց հետ: Բացի ընկերների ու հարազատների հետ շփումից, կարելի է փորձել ծանոթանալ նոր մարդկանց հետ, կատարել կամավորական աշխատանքներ ու նոր հոբբի գտնել:

2. Նոր բաներ ուսումնասիրել

Մասնագետները նշում են, որ որևէ նոր բան սովորելու համար երբեք էլ ուշ չէ: Ձեռք բերած նոր հմտությունները հիանալի միջոց են մտավոր առողջությունը պահպանելու համար: Առհասարակ՝ գերիատրիկ հիվանդությունները կանխարգելելու համար մարդը պետք է պատրաստ լինի անընդհատ նոր փորձ ձեռք բերել ու նոր զբաղմունք գտնել:

3. Միջոցներ ձեռնարկել ռիսկի գործոնների դեմ

Թույլ սրտամկանն ու սրտի հիվանդությունները նույնպես նպաստում են դեմենցիայի զարգացմանը, իսկ օրգանիզմում խոլեստերինի բարձր մակարդակը, զարկերակային բարձր ճնշումը, ավելորդ քաշն ու արյան մեջ շաքարի բարձր մակարդակը կարող են դառնալ ժամանակի ընթացքում սրտամկանի ու զարկերակների վնասվածքների առաջացման պատճառ: Սա է պատճառը, որ հարկավոր է շատ ուշադիր լինել և հոգ տանել սրտանոթային համակարգի առողջության մասին:

Բացի այդ, հարկ է հիշել, որ առանցքային նշանակություն ունի նաև հոգեկան առողջությունը, քանի որ թուլամտության զարգացման հավանականության բարձրացմանը կարող են նպաստել նաև դեպրեսիաները:

4. Վարել առողջ կենսակերպ

Ամերիկացի գիտնականների անցկացրած ուսումնասիրությունները ցույց են տվել, որ առողջ սննդակարգն ու պարբերաբար ֆիզիկական վարժություններ կատարելը կարող է նվազեցնել դեմենցիայի զարգացման հվանականությունը 60%-ով: Մասնագետները խորհուրդ են տալիս հարստացնել սննդակարգն օմեգա-3 ճարպաթթուներ պարունակող մթերքով, քանի որ այդ ճարպաթթուները նպաստում են մտավոր կարողությունների զարգացմանն ու պաշտպանում են սրտանոթային հիվանդություններից:

Բացի այդ, դեմենցիայի կանխարգելման հիանալի միջոց է միջերկրածովյան դիետան, քանի որ այդ սննդակարգում ներառված են մեծ քանակությամբ մրգեր, բանջարեղեն, ընկուզեղեն ու ամբողջահատիկ սննդամթերք: Նաև խորհուրդ է տրվում կարագի ու մարգարինի փոխարեն օգտագործել բարձրորակ ձիթայուղ:

5. Հրաժարվել ծխելու սովորությունից

Ուսումնասիրությունները ցույց են տվել, որ ծխող մարդկանց հիշողությունը զգալիորեն թուլանում է այդ վատ սովորությունը ձեռք բերելուց ընդամենը 5 տարի անց: Բացի այն, որ ծխախոտը խիստ վնասակար է առողջության համար, այն նաև բարձրացնում է թուլամտության զարգացման հավանականությունը: Չնայած, որ ծխախոտն օգնում է կարճ ժամանակով բարելավել կենտրոնանալու կարողությունը, հետագայում այն կարող է լուրջ հետևանքներ ունենալ գլխուղեղի համար: Բանն այն է, որ ծխախոտի գործածությունը բացասաբար է ազդում թոքերի ու զարկերակների վրա, ինչի հետևանքով գլխուղեղը բավարար քանակությամբ թթվածին չի ստանում:

Հարկ է հիշել, որ դեմենցիայի առաջացման հավանականությունը սովորաբար բարձրանում է տարիքի հետ մեկտեղ: Սա անբուժելի հիվանդություն է, որն ավելի հաճախ հանդիպում է կանանց շրջանում, սակայն այս պարզ քայլերը կօգնեն զգալիորեն նվազեցնել նման խնդրի առաջացման հավանականությունը:

Նյութի աղբյուրը՝ healthhacks.me