Որոնք են ոտքերի եղունգների հաստացման պատճառներն ու բուժման միջոցները

Ոտքերի եղունգների հաստացման պատճառները կարող են բավականին շատ լինել, ուստի հստակ ախտորոշման համար բժիշկները ստիպված են մանրակրկիտ կերպով ուսումնասիրել հիվանդի անամնեզը:

Ոտքերի եղունգների հաստացման պատճառները

Երկարատև ուսումնասիրությունները թույլ են տվել պարզել, թե որոնք են ամենահաճախ հանդիպող գործոնները, որոնք բացասաբար են ազդում ոտքերի եղունգների վրա: Հնարավոր պատճառների շարքին են դասվել.

·        գենետիկ նախատրամադրվածությունը կամ պախիոնիխիա հիվանդությունը, որն օրգանիզմի ընդհանուր վիճակի համար վտանգ չի ներկայացնում,

·        ոտքերի եղունգների սնկային հիվանդությունը (օնիխոմիկոզ), որն առաջանում է միկոզով վարակվելու հետևանքով,

·        նեղ ու սխալ ընտրված կոշիկը, որը երկար կրելու հետևանքով եղունգը դեֆորմացվում է և խանգարվում է արյան հոսքը,

·        սխալ սննդակարգն ու վիտամինների պակասը,

·        օրգանիզմի ընդհանուր հիվանդությունները, ռևմատիզմը, հոդատապը, աթերոսկլերոզը, որոնք նպաստում են մատների ծայրերում արյան հոսքի նվազմանը,

·        եղունգների վնասվածքները,

·        մաշկային հիվանդությունները (պսորիազ, էկզեմա և այլն),

·        ծռաթաթությունն ու հարթաթաթությունը:

Հարկ է հիշել, որ եղունգների հաստացման պատճառը պետք է ախտորոշի միայն համապատասխան մասնագետը, որն էլ կնշանակի անհրաժեշտ բուժումը:

Ոտքերի եղունգների հաստացման դեղորայքային բուժումը

Այս խնդրի ժամանակ նշանակվում է դեղորայքային բուժում, եթե այն պայմանավորված է սնկային հիվանդությամբ: Այս դեպքում բուժումը երկարատև է և հարկավոր է խստորեն հետևել բոլոր ցուցումներին:

Սովորաբար նշանակվում են հակասնկային քսուքներ, սակայն դրանց ազդեցությունն ուժեղացնելու համար բժիշկը կարող է նշանակել նաև նույն դեղամիջոցների հաբերը: Բուժումն իրականացվում է բժշկի հսկողության տակ:

Եթե եղունգների հաստացման պատճառն այլ հիվանդության առաջացրած բարդացումն է, բուժումը հարկավոր է սկսել հիմնական հիվանդությունից: Սա նշանակում է, որ եղունգների բուժումը կիրականացվի հիմնական հիվանդության բուժման հետ համատեղ:

Ցավոք՝ գենետիկական հակվածությամբ պայմանավորված եղունգների հաստացման դեպքում բուժումը ոչ միշտ է արդյունավետ լինում: Հիվանդությունն արգելակվում է ֆոլաթթվի, A և B խմբի վիտամինների միջոցով: Դեֆորմացված եղունգը հեռացվում է, իսկ նոր եղունգի աճի ժամանակ օգտագործվում են կորտիկոստերոիդային քսուքներ: Սակայն մեծ է հավանականությունը, որ բուժումից հետո խնդիրը կրկին կվերադառնա:

Եղունգների հաստացման բուժումը ժողովրդական բաղադրատոմսերով

Ժողովրդական բժշկության մեջ կան բազմաթիվ բաղադրատոմսեր, որոնք կօգնեն բուժել հաստացած եղունգները: Ձեր ուշադրությանն ենք ներկայացնում դրանցից մի քանիսը:

1.      Հիվանդ եղունգին ձյութօճառ կամ տնտեսական օճառ քսել, այնուհետև ավելացնել մի փոքր աղ և վիրակապել: Կոմպրեսը թողնել մոտ 1 ժամ, որպեսզի խառնուրդը չորանա, այնուհետև լավանալ ոտքերը գոլ ջրով:

2.      Թեյի սունկի ոչ մեծ շերտը դնել եղունգին, փաթաթել մատը պոլիէթիլենային թաղանթով, այնուհետև վիրակապել: Այս պրոցեդուրան հարկավոր է կատարել քնելուց առաջ, թողնել վիրակապն ամբողջ գիշեր, իսկ առավոտյան լվանալ մատը գոլ ջրով:

3.      Կարելի է նաև օրական մի քանի անգամ ախտահարված եղունգներին խաղողի կամ խնձորի քացախ քսել: Սակայն հարկավոր է ուշադիր լինել և մաշկային հյուսվածքներին քացախ չքսել:

4.      Խառնել հավասար քանակությամբ ակնամոմն ու ծիծեռնախոտը, խառնուրդին ավելացնել մի փոքր ծովի աղ կամ յոդացված աղ, այնուհետև ավելացնել նաև քիչ քանակությամբ ջուր և լավ խառնել: Ստացված խյուսը դնել եղունգին, փաթաթել մատը պոլիէթիլենային թաղանթով, այնուհետև վիրակապել: Վիրակապը հարկավոր է թողնել մեկ ժամ, այնուհետև լվանալ մատը:

5.      Քնելուց առաջ ոտքերը լվանալ և եղունգին անանուխի յուղ քսել: Կրկնել պրոցեդուրան մեկ ամիս:

6.      Խառնել մեկական թեյի գդալ գլիցերինը, քացախահյութը և սպիրտը, այնուհետև ստացված խառնուրդը զգուշորեն քսել եղունգին: Շարունակել բուժումն այնքան ժամանակ, մինչև կաճի նոր եղունգ:

Հարկավոր է հաշվի առնել, որ բոլոր ժողովրդական բաղադրատոմսերն օգնում են միայն եղունգների սնկային հիվանդության դեպքում: Մյուս բոլոր դեպքերում հարկավոր է խորհրդակցել բժշկի հետ:

Ինչպես կանխել եղունգների հաստացումը

Գոյություն ունեն եղունգների հաստացմանը նպաստող գործոններ, որոնք կարելի է կանխել՝ դրանով իսկ կանխելով խնդրի առաջացումը:

1.      Հարկավոր է կրել միայն հարմարավետ ու որակյալ կոշիկ, որը չի սեղմի և չի ազդի արյան շրջանառության վրա:

2.      Սննդակարգը հարկավոր է հարստացնել վիտամիններով և էկոլոգիապես մաքուր սննդամթերքով: Անհրաժեշտ է ճիշտ սնվել, ամրապնդել իմունային համակարգը և հաճախ զբոսնել մաքուր օդին:

3.      Հասարակական վայրերում սնկային հիվանդությամբ չվարակվելու համար հարկավոր է սեփական կոշիկներն ու հողաթափերը կրել և բոկոտն չքայլել:

4.      Եղունգների հաստացմանը նպաստող հիվանդությունների առկայության դեպքում հարկավոր է ժամանակին դիմել բժշկին՝ հիվանդությունը բուժելու և բարդությունները կանխելու համար:

Բացի այդ, հարկ է հիշել, որ եղունգների հաստացման բուժումը կախված է հիվանդի առանձնահատկություններից ու խնդրի առաջացմանը նպաստող գործոններից, ուստի ինքնաբուժությունը կարող է էլ ավելի վատացնել իրավիճակը:

Նյութի աղբյուրը՝ lisavika.ru