Ինչպե՞ս «բուժել» դաշտանը և ձվարանների համար «արձակուրդ» կազմակերպել

Դեռ 2 դար առաջ հասուն կանանց մեծ մասը կամ հղի էր, կամ կերակրում էր երեխային: Իրենց կյանքի ընթացքում նրանք ունենում էին ընդամեն 160 դաշտանային ցիկլ: Սակայն հակաբեղմնավորիչ միջոցների արտադրման հետ մեկտեղ, այդ ցիկլերի թիվը զգալիորեն աճել է: Այսօր կանայք իրենց կյանքի ընթացքում կարող են ունենալ ավելի քան 450 դաշտանային ցիկլ, իսկ գիտնականների շրջանում նույնիսկ կան մտքեր, որ այս անիմաստ ձվազատումներն ու անդադար դաշտանները «մաշում» են կնոջ օրգանիզմը:

Ինչպե՞ս է կանոնավոր դաշտանն ազդում կնոջ օրգանիզմի վրա

Այն մասին, որ ժամանակակից կանաց վերարտադրողական «պահվածքը» տարբերվում է բնությամբ սահմանվածից սկսել են խոսել դեռ 20-րդ դարի 90-ական թվականներին: Կանայք հետաձգում են երեխայի ծնունդը՝ երիտասարդությունը նվիրելով կրթությանն ու կարիերային: Այդ պատճառով վերարտադրողական համակարգն անիմաստ է աշխատում, ինչի հետևանքով դաշտանն ավելի առատ ու երկարատև է դառնում:

Կանոնավոր դաշտանը կնոջ օրգանիզմի համար ոչ մի արժեք չի ներկայացնում: Այդ գործընթացը նորմալ է, սակայն անհրաժեշտ է միայն վերարտադրողական ֆունկցիա կատարելու համար: Այս ամենը հասկանալով հանդերձ՝ կանայք շարունակում են տառապել նախադաշտանային սինդրոմի պատճառով: Մի քանի տարի առաջ, սակայն, ամերիկացի գիտնականներն առաջարկել են «բուժել» դաշտանը և ձվարանների համար «արձակուրդ» կազմակերպել:

Ինչպե՞ս են հորմոնալ հակաբեղմնավորիչները դադարեցնում դաշտանը

Ձվարանների գործառույթը ճնշելու համար համակցված ներընդունման հակաբեղմնավորիչների ընդունումն այդքան էլ նոր մեթոդ չէ: Նախկինում այս մեթոդն օգտագործվում էր մի շարք գինեկոլոգիական հիվանդությունների բուժման համար, սակայն այսօր այն ավելի ու ավելի հաճախ է խորհուրդ տրվում կանանց, ովքեր երազում են ազատվել երկարատև ու ցավոտ դաշտանից:

Հորմոնալ դեղամիջցներն օգնում են երկարացնել դաշտանային ցիկլի տևողությունը՝ հասցնելով դաշտանների քանակը տարեկան 13-ից մինչև 3-4 անգամի:

Դաշտանը հորմոնալ դեղորայքով ճնշելու կողմնակիցներն ու որոշ բժիշկներ կարծում են, որ այս մեթոդը ոչ միայն դարձնում է կանաց կյանքն ավելի հարմարավետ, այլև կանխում է քաղցկեղի առաջացումը, իսկ հակառակորդները պնդում են, որ այն կարող է հանգեցնել արգանդի վզիկի ու լյարդի քաղցկեղի:

2014 թվականին Շվեդիայում անցկացված ուսումնասիրության արդյունքում պարզվել է, որ համակցված հակաբեղմնավորիչների երկարատև ընդունումը կարող է բարձրացնել երակային տրոմբոէմբոլիայի, զարկերակային տրոմբոզի և քաղցկեղի մի քանի տեսակների առաջացման հավանականությունը: Այնուամենայնիվ, դրանք ունեն նաև մի շարք առավելություններ. նվազում է ձվարանների քաղցկեղի, էնդոմետրիումի քաղցկեղի կամ կոլոռեկտալ քաղցկեղի առաջացման վտանգը: Բացի այդ, համակցված ներընդունման հակաբեղմնավորիչները համարվում են լավագույն լուծումը ծանր դաշտանային արյունահոսություններով, ակնեով ու մազակալությամբ տառապող կանանց համար:

Ինչպե՞ս դադարեցնել դաշտանը հորմոնալ միջոցներով

Համակցված հակաբեղմնավորիչները օրգանիզմը «վերարտադրողական հանգստի» վիճակի են բերում: Դեղահաբերը պարունակում են էստրոգենի և պրոգեստերոնի սինթետիկ համարժեքներ, որոնք խոչընդոտում են ձվազատմանը և թույլ չեն տալիս, որ ձվաբջիջը հասունանա ու դուրս գա ձվարաններից:

2003 թվականին ԱՄՆ-ի Սննդամթերքի ու դեղորայքի որակի վերահսկման վարչությունը հաստատել է Seasonale դեղահաբերի վաճառքը: Այն օգտագործվում է ոչ միայն որպես հակաբեղմնավորիչ կամ դաշտանը դադարեցնող միջոց, այլ նաև ձվարանների պոլիկիստոզային համախտանիշի կանխարգելման ու բշտիկների բուժման համար:

Ինչպես ցանկացած այլ դեղամիջոց, Seasonale-ը նույնպես կարող է առաջացնել կողմնակի բարդություններ (սրտխառնոց, փսխում, գլխացավեր, փորափքանք, կրծքերի զգայունություն, այտուցվածություն, քաշի տատանումներ և արյունահոսություններ օգտագործման առաջին ամիսների ընթացքում): Այդ պատճառով, այս դեղամիջոցի վաճառքն իրականացվումն է միայն բժշկի նշանակման դեպքում, իսկ ընդունումը՝ բժշկի հսկողությամբ:

Դաշտանի ճնշումը բարդ խնդիր է, ուստի գիտնականները դեռ երկար ժամանակ կվիճեն դրա անվտանգության հարցի շուրջ: Այնուամենայնիվ, պետք է հիշել, որ առանց գինեկոլոգի հետ խորհրդակցելու դաշտանը դադարեցնելը շատ վտանգավոր է և կարող է տհաճ հետևանքներ ունենալ:

Նյութի աղբյուրը՝ med2.ru