6 ախտանշան, որոնք վկայում են, որ մարդն անհապաղ օգնության կարիք ունի

17:12 • 04.01.18

Ցավը բնական երևույթ է և այն բացակայում է միայն մահից հետո: Սակայն մարդիկ պետք է կարողանան տարբերել հասարակ ցավոտ զգացողություներն ավելի լուրջ խնդիրների մասին վկայող ցավից: Սա է պատճառը, որ մասնագետները խորհուրդ են տալիս ավելի ուշադիր լինել օրգանիզմի տված ազդանշանների հանդեպ և ուժեղ ու արտասովոր ցավերի դեպքում անմիջապես դիմել բժշկին:

Սակայն ցավը միակ ազդանշանը չէ, որ պայմանավորված է լինում առողջական լուրջ խնդիրներով: Ձեր ուշադրությանն ենք ներկայացնում 6 ախտանշան, որոնց առկայությունը վկայում է, որ օրգանիզմն ունի շտապ օգնության կարիք:

1. Ոտքերի ու ձեռքերի թուլություն

Ձեռքերի, ոտքերի կամ դեմքի թմրածությունը կամ թուլությունը կարող է լինել գլխուղեղի կաթվածի ախտանշան: Հատկապես ուշադիր պետք է լինել, եթե այդ ախտանշանները նկատվում են մարմնի միայն մի կողմում: Այս դեպքում անհրաժեշտ է շտապ դիմել բժշկին՝ հատկապես, եթե այդ ախտանշաններն ուղեկցվում են տեսողության վատացմամբ, ուժեղ գլխացավով ու գիտակցության մթագնումով կամ ի հայտ են գալիս խնդիրներ՝ կապված մտքերն արտահայտելու կամ լսածն ընկալելու հետ:

2. Կրծքի ցավեր

Առատ քրտնարտադրությունը, բարձր ճնշումը, հևոցն ու սրտխառնոցը, որոնք ուղեկցվում են կրծքի ցավով, կարող են վկայել սրտի հիվանդությունների կամ սրտի նոպայի մասին: Բացի այդ, նման ցավը կարող է լինել նաև թրոմբոզի ախտանշան: Բժիշկների խոսքով՝ ծանրության ու ճնշման զգացողության դեպքում հարկավոր է շտապ դիմել մասնագետին՝ հետագա խնդիրներից ու բարդություններից խուսափելու համար:

3. Սրունքների գերզգայունություն ու ցավ

Այս ախտանշանները կարող են վկայել խորը անոթների թրոմբոզի մասին: Սովորաբար ցավոտ զգացողություններն ի հայտ են գալիս երկար ժամանակ կանգնած լինելու կամ քայլելու դեպքում: Բացի այդ, ոտքերը կարող են նաև կարմրել ու այտուցվել: Նման ախտանշանների դեպքում հարկավոր է անպայման խորհրդակցել բժշկի հետ, քանի որ ժամանակին քայլեր չձեռնարկելու դեպքում թրոմբը կարող է խցանել անոթն ու խանգարել արյան շրջանառությունը:

4. Արյունոտ մեզ

Արյունոտ մեզը կարող է պայմանավորված լինել միզաքարային հիվանդությամբ, որի դեպքում երիկամներիում աղերի ու հանքանյութերի բյուրեղներից քարեր են առաջանում: Այդ քարերն աստիճանաբար են առաջանում և շարժվում են միզուղիներով: Հաճախակի միզարձակության դեպքում, որն ուղեկցվում է ցավով ու այրոցով, արյունոտ մեզը կարող է վկայել երիկամների կամ միզապարկի վարակի մասին: Եթե մեզի մեջ նկատվում են արյան հետքեր, սակայն չկան ցավոտ զգացողություններ, ապա հարկավոր է անհապաղ բուժզննում անցնել, քանի որ դա կարող է վկայել երիկամների ու միզապարկի քաղցկեղի մասին:

5. Հևոց

Հևոցի, ինչպես նաև արտասովոր ձայներով ուղեկցվող շնչառության պատճառը կարող են լինել ասթման, թոքերի հիվանդությունները, ուժեղ ալերգիկ ռեակցիան կամ քիմիական նյութերի ազդեցությունը: Բացի այդ, հևոցը կարող է պայմանավորված լինել նաև թոքաբորբով (պնևմոնիա) կամ բրոնխաբորբով (բրոնխիտ), ուստի շնչառական ցանկացած խնդրի դեպքում հարկավոր է դիմել բժշկին:

6. Սուիցիդալ մտքեր

Կյանքի հանդեպ հետաքրքրության կորստի կամ դեպրեսիայի դեպքում մարդը պետք է միշտ դիմի մասնագետի օգնությանը: Բանն այն է, որ դեպրեսիաներն ու խուճապային վիճակը հաճախ են ուղեկցվում սուիցիդալ մտքերով, ինչը կարող է անդառնալի հետևանքներ ունենալ, ուստի նման դեպքերում մարդը պետք է ստանա փորձառու հոգեթերապևտի օնություն:

Նյութի աղբյուրը՝ marketium.ru