Լեղաքարային հիվանդության առաջացման պատճառներն ու հիմնական ախտանշանները

Լեղաքարային հիվանդությունը զարգանում է շատ դանդաղ և բնորոշվում է լեղապարկում և լեղածորաններում քարերի առաջացմամբ: Սովորաբար հիվանդության առաջացումն ու զարգացումը պայմանավորված են լինում նյութափոխանակության  խանգարումով, լեղապարկում ընթացող բորբոքային գործընթացներով կամ լեղու լճացմամբ:

Այս հիվանդության առաջացմանը նպաստող գործոններն են համարվում նստակյաց կենսակերպն ու ժառանգական նախատրամադրվածությունը:

Լեղաքարային հիվանդության հիմնական ախտանշանն է բերանում դառը համի առկայությունը և աջ կողատակում առաջացող ծանրության զգացողությունը ալկոհոլային ըմպելիքների, ճարպոտ, տապակած, աղի, ապխտած կամ մարինացված սննդամթերքի գործածությունից հետո: Նման դեպքերում հարկավոր սկսել բուժումը, այլապես ի հայտ կգան նաև սուր ցավեր:

Որպես կանոն՝ մարդիկ անմիջապես նկատում են լեղաքարային հիվանդության ախտանշանները, սակայն երբեմն հիվանդը կարող է տարիներ շարունակ գլխի չընկներ հիվանդության առկայության մասին: Բանն այն է, որ լեղապարկում քարերի առկայության մասին վկայող ախտանշանները շատ նման են մարսողական խնդիրների դեպքում ի հայտ եկող ախտանշաններին:

Լեղապարկում քարերի առաջացման հիմնական պատճառներն են արյան մեջ խոլեստերինի բարձր մակարդակը և բիլիռուբինի մեծ քանակությունը:

Լեղաքարային հիվանդության ախտանշաններն են.

·         աջ կողատակի ուժգին ցավը, որը կարող է տարածվել նաև մեջքի և աջ ուսի հատվածում,

·         որովայնային խոռոչի (լեղապարկի հատվածում) ուժգին ցավը:,

·         հաճախակի փսխումը,

·         գազերի կուտակումը,

·         ստամոքսի այրոցը,

·         գխտոցը,

·         շնչելիս առաջացող ցավը,

·         մարմնի բարձր ջերմաստիճանը,

·         առատ քրտնարտադրությունը:

Նշված ախտանշաններից մեկի կամ մի քանիսի հաճախակի առկայության դեպքում խորհուրդ է տրվում դիմել մասնագետին և բուժզննում անցնել, քանի որ նման ախտանշանները կարող են պայմանավորված լինել լեղաքարային հիվանդությամբ:

Հարկ է նաև հիշել, որ այս հիվանդությունը ոչ մի դեպքում չի կարելի բուժել ինքնուրույն, քանի որ ինքնաբուժությունը կարող է խիստ վտանգավոր լինել առողջության համար: Բացի այդ, միայն որակավորված մասնագետը կարող է ճիշտ ախտորոշել հիվանդությունն ու նշանակել համապատասխան բուժումը:

Նյութի աղբյուրը՝ healthinfo.ua