Ինչ առողջական խնդիրներ կարող են առաջանալ նստակյաց կենսակերպ վարելու դեպքում

Վիճակագրությունը ցույց է տվել, որ մարդկանց մոտ 65%-ն օրական 7-10 ժամ է անցկացնում համակարգչի առջև նստած: Սա խոսում է այն մասին, որ ներկայում շատերն են վարում նստակյաց կենսակերպ՝ չնայած, որ դա կապված է առողջական բազմաթիվ խնդիրների հետ, որոնց շարքին են դասվում ճարպակալումը, զարկերակային բարձր ճնշումը, արյան մեջ շաքարի մակարդակի բարձրացումը, դեպրեսիաներն ու սթրեսը:

Սակայն նշված խնդիրները միակը չեն, որոնց կարող են բախվել նստակյաց կենսակերպ վարող մարդիկ: Ձեր ուշադրությանն ենք ներկայացնում առողջական այն խնդիրները, որոնք կարող են առաջանալ օրվա ընթացքում երկար ժամանակ նստած մնալու դեպքում:

1.      Մեջքի, ուսերի և պարանոցի ցավեր

Երկար ժամանակ նստած մնալու դեպքում ողնաշարը խիստ ծանրաբեռնված է լինում, իսկ անհարմար դիրքի հետևանքով պարանոցը դեֆորմացվում է և առաջանում են մեջքի ու ուսերի ցավեր:

2.      Կյանքի տևողության նվազում

Ուսումնասիրությունները ցույց են տվել, որ համակարգչի առջև երկար նստելն ու նստակյաց կենսակերպ վարելը նպաստում է կյանքի տևողության նվազմանն ու բազմաթիվ կողմնակի բարդությունների առաջացմանը:

3.      Դեպրեսիա, սթրես ու անհանգստություն

Նստակյաց կենսակերպն ազդում է ոչ միայն ֆիզիկական, այլև հոգեկան առողջության վրա:

4.      Քաշի ավելացում

Երկար ժամանակ նստած մնալու դեպքում մկանների էլեկտրական ակտիվությունը նվազում է և օրգանիզմն ավելի դանդաղ է այրում կալորիաները:

5.      Ոտքերի թուլացում

Ոտքերը քիչ շարժելու հետևանքով կարող է վատանալ նաև մկանների առողջությունը: Մարդու ոտքերը պահում են նրա մարմնի ծանրությունը, ուստի նստակյաց կենսակերպը խիստ բացասաբար է ազդում ոտքերի առողջության վրա:

6.      Գլխուղեղի աշխատանքի վատացում

Ֆիզիկական ակտիվության շնորհիվ մկանները գլխուղեղին թթվածին ու արյուն են մատակարարում, ինչը ոչ միայն բարելավում է գլխուղեղի աշխատանքը, այլև խթանում է տրամադրության բարձրացմանը նպաստող հատուկ նյութի արտադրությունը:

7.      Սրտանոթային համակարգի հետ կապված անբուժելի խնդիրներ

Նստակյաց կենսակերպի հետևանքով արյան շրջանառությունը դանդաղում է, իսկ մկանները բավարար քանակությամբ ճարպ չեն այրում, ուստի ճարպաթթուները հայտնվում են արյան մեջ և խցանում արյունատար անոթները, ինչի հետևանքով էլ տարատեսակ սրտանոթային հիվանդություններ են առաջանում:

8.      Սխալ կեցվածք

Երկար ժամանակ նստած լինելու հետևանքով մարդու ողնաշարը, ուսերն ու պարանոցն անդադար լարված են լինում, ինչն էլ հանգեցնում է կեցվածքի խախտման:

9.      Երակների վարիկոզ լայնացում

Երկար ժամանակ նստած լինելու դեպքում արյունը կուտակվում է ոտքերում և ճնշում է գործադրում երակների վրա, ինչի հետևանքով դրանք ուռչում են և առաջանում է երակների վարիկոզ լայնացում:

10.  Մարսողության հետ կապված խնդիրներ

Ուտելուց անմիջապես հետո նստելու դեպքում սնունդը ստամոքսում սեղմվում է, ինչի հետևանքով մարսողությունը դանդաղում է: Պարբերաբար կրկնվելու դեպքում այս գործընթացը հանգեցնում է փորափքանքի, փորկապության, ստամոքսի այրոցի և մարսողության հետ կապված մի շարք այլ խնդիրների առաջացման:

Նյութի աղբյուրը՝ myworkingremedies.com