Ինչ է հաստ աղիքի գրգռման համախտանիշը և որոնք են դրա ախտանշաններն ու առաջացման պատճառները

17:14 • 11.01.18

Հաստ աղիքի գրգռման համախտանիշը հիվանդություն չէ և չի դասվում աղեստամոքսային տրակտի հիվանդությունների շարքին: Մասնագետները նշում են, որ սա խանգարում է, որն ինքնաբերաբար է առաջանում: Այս խնդրի դեպքում մարդը կարող է առողջ լինել, սակայն գանգատվել որովայնում առաջացող տհաճ զգացողություններից և անգամ ցավից:

Հաստ աղիքի գրգռման համախտանիշը սովորաբար դրսևորվում է հետևյալ ախտանշաններով.

· փորափքանք,

· որովայնից լսվող արտասովոր ձայներ,

· սպազմներ ու ցավեր,

· հաճախակի կամ հազվադեպ կղելու ցանկություն,

· աղիների ոչ լիարժեք դատարկման զգացողություն,

· փորկապություն:

Ախտանշաններն առավել ակնհայտ են լինում կանանց մոտ դաշտանի ժամանակ, ինչը պայմանավորված է արյան մեջ սեռական հորմոնների մակարդակի բարձրացմամբ:

Հաստ աղիքի գրգռման համախտանիշի առաջացման պատճառները

Բժիշկների խոսքով՝ այս երևույթի առաջացման հիմնական պատճառը նյարդային գերլարվածությունն է: Հաստ աղիքի գրգռման համախտանիշին հատուկ ախտանշաններ կարող են առաջանալ մշտական սթրեսների, դեպրեսիաների, քնի պակասի, քրոնիկական հոգնածության և հոգեկան առողջության հետ կապված այլ խնդիրների դեպքում, սակայն աղիների հետազոտության ժամանակ սովորաբար ոչ մի խնդիր չի հայտնաբերվում:

Բացի այդ, նման ախտանշաններ կարող են առաջանալ նաև աղեստամոքսային տրակտի վարակիչ հիվանդություններից հետո: Մարդու ինքնազգացողության հարցում շատ մեծ նշանակություն կարող են ունենալ նաև սոցիալական գործոնները, որոնք հաճախ հանգեցնում են մարսելախանգարման ու աղիների աշխատանքի խանգարման:

Սակայն, այնուամենայնիվ, բժիշկները խորհուրդ են տալիս ավելի ուշադիր լինել և չանտեսել այս խնդիրը: Պետք չէ սպասել, որ այն կանցնի առանց միջամտության: Փոխարենը հարկավոր է կարգավորել սննդակարգն ու կենսակերպը և փորձել հանգստացնել նյարդային համակարգը:

նյութի աղբյուրը՝ med2.ru