Առողջական ինչ խնդիրների ախտանշան կարող է լինել կրծքավանդակի ցավը

Կրծքավանդակի ցավը բավական տարածված ախտանշան է, որը, ցավոք, կարող է վկայել բազմաթիվ լուրջ հիվանդությունների մասին: Ձեր ուշադրությանն ենք ներկայացնում առողջական այն խնդիրները, որոնք հաճախ դրսևորվում են կրծքավանդակի ցավով:

Սրտամկանի ինֆարկտ

Այս դեպքում ցավն անտանելի է ու չափազանց ուժգին, իսկ երբեմն էլ կարող է լինել ճնշող և առաջացնել ծանության ու սեղմվածության զգացողություն: Սովորաբար այն ի հայտ է գալիս կտրուկ և հաճախ գիշերվա ժամերին կամ վաղ առավոտյան: Ցավը կարող է պարբերաբար մեղմվել, սակայն այն չի անհետանում և աստիճանաբար էլ ավելի է ուժգնանում:

Այս դեպքում ցավի նոպան տևում է 30 րոպե, իսկ երբեմն էլ անգամ մի քանի ժամ: Ստամկանի ինֆարկտով պայմանավորված ցավի առանձնահատկություններից մեկն այն է, որ այս ցավը կարող է մեղմվել կամ անհետանալ հանգստի ժամանակ կամ նիտրոգլիցերին ընդունելու դեպքում:

Ստենոկարդիա

Ստենոկարդիան բնորոշվում է կրծքավանդակի ետևում այրոցի, ծանրութան ու ճնշման զգացողությամբ, որն առաջանում է ֆիզիկական ծանրաբեռնվածության դեպքում: Այս հիվանդության դեպքում ցավը կարող է տարածվել նաև ձախ ձեռքի, ձախ թիակի և պարանոցի, իսկ ավելի հազվադեպ նաև ստորին ծնոտի, որովայնի վերին հատվածի, կրծքավանդակի աջ կողմի և աջ ձեռքի հատվածում:

Ստենոկարդիայի ժամանակ ցավի նոպան տևում է 1-15 րոպե: Այն ի հայտ է գալիս ֆիզիկական ծանրաբեռնվածության ժամանակ և առանց որևէ ախտանշանի: Հաճախ նման խնդիր է առաջացնում սառը քամու ժամանակ քայլելու, մեծ քանակությամբ սնունդ ընդունելու կամ աստիճաններով բարձրանալու ժամանակ: Որպես կանոն՝ ցավը մեղմվում է ֆիզիկական ակտիվությունը նվազեցնելուց կամ առհասարակ դադարեցնելուց անմիջապես հետո կամ նիտրոգլիցերինի ընդունումից 2-3 րոպե անց:

Աղեստամոքսային տրակտի հիվանդություններ

Կերակրափողի հիվանդությունների դեպքում ցավն ի հայտ է գալիս սննդի ընդունման ժամանակ: Բացի այդ, նման ցավով կարող է բնորոշվել նաև ստամոքսի խոցային հիվանդությունը, սակայն այս դեպքում ցավը բութ է և առաջանում է սննդի ընդունումից հետո:

Կրծքավանդակի և ողնաշարի հիվանդություններ

Ցավի այս տեսակն ախտորոշելը շատ հեշտ է: Որպեսզի ցավոտ զգացողություններն ի հայտ գան, պարզապես հարկավոր է շոշափել ցավոտ հատվածը կամ մի քանի անգամ խոնարհվել: Նման դեպքերում ցավն ուժեղանում է նաև շնչելիս:

Թոքերի հիվանդություններ

Ցավի այս տեսակը բնորոշվում է ախտահարված հատվածի շարժունության կտրուկ սահմանափակմամբ, քանի որ անգամ չնչին շարժումը սուր ցավ է պատճառում:

Այսպիսով՝ հարկ է հիշել, որ կրծքավանդակի ցավը լուրջ ախտանշան է, որը ոչ մի դեպքում չի կարելի անուշադրության մատնել: Նման խնդրի դեպքում հարկավոր է անմիջապես դիմել համապատասխան մասնագետին (սրտաբանին, վարակաբանին, թերապևտին կամ գաստրոէնտերոլոգին) և հետևել նրա բոլոր ցուցումներին:

Բացի այդ, ոչ մի դեպքում չի կարելի զբաղվել ինքնաբուժությամբ, քանի որ դա կարող է խիստ վնասակար լինել առողջության համար և դառնալ էլ ավելի լուրջ բարդությունների առաջացման պատճառ: Հարկ է հիշել, որ միայն որակավորված մասնագետը կարող է ճիշտ ախտորոշել հիվանդությունն ու նշանակել համապատասխան բուժումը:

Նյութի աղբյուրը՝ eurolab.ua