Ինչպես է եղունգի լաքն ազդում մարդու օրգանիզմի վրա

Եղունգների լաքը շատ տարածված կոսմետիկ միջոց է կանանց շրջանում, սակայն այն կարող է շատ ավելի վտանգավոր լինել, քան թվում է առաջին հայացքից: Դյուկի համալսարանի գիտնականները պարզել են, որ լաքի շատ տեսակներ կարող են վնասակար լինել առողջության համար: Մասնագետների անցկացրած գիտափորձին մասնակցել են կանայք, որոնք օգտագործում էին եղունգների լաքի տարբեր տեսակներ:

Ուսումնասիրությունները ցույց են տվել, որ լաքն օգտագործելուց 10 ժամ անց կանանց արյան մեջ 7 անգամ գերազանցել է տրիֆենիլֆոսֆատի թույլատրելի մակարդակը, մինչդեռ այս նյութը խիստ տոքսիկ է և կարող է բացասաբար ազդել ներզատական համակարգի և գլխուղեղի առողջության վրա՝ առաջացնելով բազմաթիվ լուրջ խնդիրներ:

Մասնագետները նշում են, որ եղունգների լաքի բաղադրության մեջ օգտագործվող քիմիական տարրերն այնքան վնասակար են, որ արտադրողները հաճախ սրվակի վրա չեն նշում կիրառվող բաղադրիչները:

Բացի նշված նյութից, եղունգների լաքերը հաճախ պարունակում են նաև մի շարք այլ վնասակար տարրեր, որոնց շարքին են դասվում ֆորմալդեհիդը, տոլուոլն ու դիբուտիլֆտալատը:

Ֆորմալդեհիդը սուր հոտով քաղցկեղածին նյութ է, որը լուծվում է և՛ ջրում, և՛ օդում: Սա է պատճառը, որ այն կարող է առաջացնել խնդիրներ՝ կապված կոկորդի ու շնչառության հետ: Բացի այդ, այն կարող է դառնալ նաև ինտոքսիկացիայի և քրոնիկական հիվանդությունների առաջացման պատճառ:

Տոլուոլը նույնպես խիստ վնասակար է, քանի որ խանգարում է երեխաների զարգացումն ու կարող է աղտոտել մայրական կաթը: Բացի այդ, այս նյութը կարող է առաջացնել նաև տարատեսակ մաշկային խնդիրներ:

Շատ վտանգավոր է նաև դիբուտիլֆտալատը, որը կարող է դառնալ հորմոնալ խանգարումների և վերարտադրողական համակարգի հետ կապված խնդիրների առաջացման պատճառ:

Ներկայում կան նաև այնպիսի լաքեր, որոնք չեն պարունակում նշված վտանգավոր քիմիական տարրերը և պատրաստված են բնական հումքից: Սակայն նմանատիպ լաքեր կարելի է պատրաստել նաև ինքնուրույն՝ օգտագործելով միայն ոչ վնասակար բնական բաղադրիչներ:

Բաղադրությունը.

·        1 ճաշի գդալ ձիթապտղի յուղ,

·        ½ ճաշի գդալ կավի փոշի,

·        բնական հինա (փոշի):

Պատրաստման եղանակը.

Հարկավոր է խառնել կավն ու ձիթապտղի յուղը մինչև ստացվի համասեռ զանգված, այնուհետ ավելացնել անհրաժեշը քանակությամբ հինան և կրկին լավ խառնել: Հինան կարելի է գնել դեղատներից և ընտրել ցանկացած գույնն ու երանգը:

Ստացված խառնուրդը հարկավոր է լցնել եղունգի լաքի տարրայի մեջ և օգտագործել որպես լաքին փոխարինող միջոց: Բնական լաքը քսելուց հետո հարկավոր է թողնել մոտ 10 րոպե, որպեսզի չորանա, իսկ այնուհետև ցանկության դեպքում կարելի է նաև հասարակ եղունգի լաք քսել:

Նյութի աղբյուրը՝ brainum.ru